បុរសម្នាក់ដែលត្រូវគេស្គាល់ថា ជាសមាជិកក្រុមម៉ូតូធំ បានស្លាប់ក្រោយបញ្ជូនដល់មន្ទីរពេទ្យ ករណីគ្រោះថ្នាក់ចរាចរណ៍រវាងម៉ូតូនិងម៉ូតូ បន្សល់ទុកនូវសារយ៉ាងវែងអន្លាយពីសង្សាររបស់ខ្លួន ផ្តែផ្តាំគ្នាមុនពេលចេញដំណើរ បង្ករការសោកស្តាយអាណិតអាសូរពេញបណ្តាញសង្គម។
ដោយមុនថ្ងៃកើតហេតុមួយថ្ងៃ នារីដែលត្រូវជាសង្សារបុរសរងគ្រោះបានផ្ញើសារជូនពរផ្តែផ្តាំ ដូចលាគ្នាចុងក្រោយយ៉ាងដូចច្នេះថា «ថ្ងៃស្អែកបងចេញ trip ហើយ មើលថែខ្លួនប្រយ័ត្នប្រយែងផងណាអូនបារម្ភ អូនស្តាយណាស់ដែលអូនមិនបានទៅជាមួយបងឲ្យបងជិះម្នាក់ឯង ទោះអូនមិនបានទៅមិនបាននៅក្បែរបងតែអូននៅតែជា power របស់បងណា។ ពេលអូនមិនបាននៅជិតមើលថែរបង បងត្រូវចេះប្រយ័ត្នប្រយែងមើលថែរការពារខ្លួនឲ្យបានល្អផងណា ឧស្សាហ៍លាងដៃជាមួយអាល់កុលផងអូនបារម្ភ ពេលបើកម៉ូតូប្រយ័ត្នប្រយែងណាបងសម្លាញ់ ភ្នែកមើលតែផ្លូវបានហើយ តែមិនមែនភ្លៅស្រីទេ ហើយហាមមើលស្រីណា ក្រឡេកឃើញបានតែហាមស្រឡាញ់ ចិត្តនិងបេះដូងបងត្រូវតែមានអូនម្នាក់គត់ ដឹងឬនៅមាសស្នេហ៍។ ជិះតាមផ្លូវប្រយ័ត្នប្រយែងណាបងណា តាមសម្រួលដឹងនៅ អូនចង់ឲ្យមនុស្សអូនស្រឡាញ់មានសុវត្ថិភាព ទៅដល់កន្លែងណាឈប់កន្លែងណាប្រាប់អូនផងណា អូននៅចាំបង បើបងងងុយគេងបើកកញ្ជក់មួក ឬឈប់រកអីញាំឲ្យស្វាងសិនទៅណាចាំទៅមុខទៀតអូខេណា។ អូនអត់មានអីនិយាយច្រើនទេ ព្រោះអូនដឹងច្បាស់ពីបងថាបងពូកែបងជិះនិងល្អណាស់ បងប្រាកដជាសុវត្ថិភាព តែអូនស្រឡាញ់និងបារម្ភបានចេះតែចង់និយាយប្រាប់បង ពេលមិនមានអូននៅក្បែរកុំរញ៉េរញ៉ៃជាមួយមនុស្សស្រីផ្សេង អូនអត់សប្បាយចិត្តទេ អូនមើលឃើញបងល្អ បងត្រឹមត្រូវស្រាប់ហើយចឹងកុំទៅធ្វើអ្វីដែលមិនគប្បីមិនល្អចំពោះអូន កុំភ្លេចនឹកនិងស្រឡាញ់អូនផងណា កូនកណ្តុរតូចនឹកបារម្ភនិងស្រឡាញ់បងជានិច្ចណាពូពូ ស៊ូស៊ូណាបងសម្លាញ់សំណព្វចិត្តអូន»។
គួរបញ្ជាក់ថា កាលពីវេលាម៉ោងជាង៨ព្រឹក ថ្ងៃទី២១ វិច្ឆិកា ឆ្នាំ២០២០ មុខវត្តទួលវិហារ ស្ថិតក្នុងឃុំជ្រាប់ ស្រុកសន្ទុក ខេត្តកំពង់ធំ មានករណីគ្រោះថ្នាក់ចរាចរណ៍មួយ បានកើតឡើងរវាងម៉ូតូធំនិងម៉ូតូមួយគ្រឿងទៀតម៉ាកHonda Dream 010 បើកបរដោយគ្រូបង្រៀនម្នាក់ស្លាប់ភ្លាមៗនៅនិងកន្លែង ហើយជនរងគ្រោះដែលជាភាគីខាងម៉ូតូធំ បានស្លាប់ពេលបញ្ជូនដល់មន្ទីរពេទ្យបង្អែកខេត្តកំពង់ធំ៕ ដោយ៖ កូលាប ក្រហម
