ខេត្តព្រះសីហនុ៖ មនុស្សម្នាក់បានរងរបួសធ្ងន់ ករណីគ្រោះថ្នាក់ចរាចរណ៍ បុកបន្តកន្ទុយគ្នារវាងរថយន្ត២គ្រឿង និងម៉ូតូសណ្តោងរ៉ឺម៉ក១គ្រឿង។ ហេតុការណ៍នេះបានកើតឡើងនាថ្ងៃទី២១ ខែវិច្ឆិកា ឆ្នាំ២០២០ វេលាម៉ោងជាង៣រសៀល នៅចំណុចចន្លោះគីឡូម៉ែត្រលេខ១៤៨-១៤៩ ស្ថិតក្នុងភូមិគីរីវ័ន្ត ឃុំស្ទឹងឆាយ ស្រុកកំពង់សីលា ខេត្តព្រះសីហនុ។
សមត្ថកិច្ចបានឱ្យដឹងថា ហេតុការណ៍នេះបង្កឡើងដោយរថយន្តធន់ធំម៉ាកHyundai ពណ៌ត្រួយចេក ពាក់ផ្លាកលេខ កំពង់ស្ពឺ ៣A ២៦១៨ (អ្នកបើកបរមិនទាន់ស្គាល់អត្តសញ្ញាណ) បានបុកពីក្រោយរថយន្តម៉ាក Starex ពណ៌ខ្មៅ ពាក់ផ្លាកលេខ ភ្នំពេញ ២AY ២៤៨១ (អ្នកបើកបរមិនទាន់ស្គាល់អត្តសញ្ញាណដូចគ្នា) រួចជ្រុលទៅបុកបន្តនិងម៉ូតូសណ្តោងរ៉ឺម៉ក១គ្រឿងទៀងម៉ាកwave ពាក់ផ្លាកលេខ ព្រៃវែង ១M ០០១១ បើកបរដោយបុរសម្នាក់ឈ្មោះ ឆន សំអូន អាយុ៣០ឆ្នាំ មានទីលំនៅ ភូមិអង្កាញ់ ឃុំប្រធាតុ ស្រុកកំពង់ត្របែក ខេត្តព្រៃវែង បណ្តាលឱ្យអ្នកបើកបរម៉ូតូរ៉ឺម៉ករងរបួសធ្ងន់ ត្រូវបញ្ជូនទៅកាន់មន្ទីរពេទ្យបង្អែកស្រែអំបិល។
ក្រោយកើតហេតុអ្នកបើកបររថយន្តទាំង២គ្រឿងបានរត់គេចខ្លួនបាត់ស្រមោល ចំណែកវត្ថុតាងទាំង៣គ្រឿង ផ្នែកជំនាញបានយកទៅរក្សាទុកនៅអធិការដ្ឋាននគរបាលស្រុកកំពង់សីលា ដើម្បីដោះស្រាយបន្តតាមច្បាប់៕ ដោយ៖ កូលាប ក្រហម
