ក្រុងព្រះសីហនុ៖ បុរស ស្ត្រី២នាក់ប្តីប្រពន្ធ ភាគីខាងម៉ូតូ បានស្លាប់ដោយគ្រោះថ្នាក់ចរាចរណ៍ រវាងរថយន្តនិងម៉ូតូ កាលពីយប់ពាក់កណ្តាលអធ្រាត្រថ្ងៃទី២០ ខែវិច្ឆិកា ឆ្នាំ២០២០ លើផ្លូវជាតិលេខ៤ ត្រង់ចំណុច មុខរោងចក្រក្រោន ស្ថិតនៅភូមិ១ សង្កាត់លេខ១ ក្រុងព្រះសីហនុ ។
របាយការណ៍ពីសមត្ថកិច្ចបញ្ជាក់ដាគ្រោះថ្នាក់ចរាចរណ៍នេះកើតឡើង រវាងរថយន្ត ០១គ្រឿងម៉ាក LEXUS 400h ពណ៌ ស គ្មានផ្លាកលេខ មានទិសដៅចេញពីក្រុងព្រះសីហនុ បានបុកពីខាងក្រោយម៉ូតូ ០១គ្រឿងម៉ាក HONDA WAVE ពណ៌ ខ្មៅ-ក្រហម គ្មានផ្លាកលេខ ជិះឌុបគ្នា ០២នាក់ប្តីប្រពន្ធ មានទិសដៅស្របគ្នា បណ្តាលឲ្យស្ត្រីជាប្រពន្ធ ស្លាប់នៅនឹងកន្លែងកើតហេតុ ចំណែកបុរសជាប្តីរបួសធ្ងន់ ក្រោយមកបានស្លាប់ពេលបញ្ជូនទៅមន្ទីរពេទ្យបង្អែកខេត្តព្រះសីហនុ។
របាយការណ៍សមត្ថកិច្ចបន្ថែមថា ក្រោយកើតហេតុអ្នកបើកបររថយន្តបានបើករត់គេចរហូតដល់ហួសរោងចក្រញ៉ូវស្តា រួចចតទុករថយន្តចោល រត់គេចខ្លួនបាត់ បច្ចុប្បន្នសមត្ថកិច្ចជំនាញកំពុងស្រាវជ្រាវរកអត្តសញ្ញាណ ។
សូមបញ្ជាក់ថា ជនរងពីរនាក់ប្តី ប្រពន្ធដែលស្លាប់ដោយគ្រោះថ្នាក់ចរាចរណ៍នេះ បានបន្សល់ទុកកូនស្រីភ្លោះ២នាក់ ក្លាយជាកូនកំព្រាឳពុក ម្តាយទាំងវយ័ក្មេង មានទីលំនៅក្នុងសង្កាត់លេខ១ក្រុងព្រះសីហនុ។
បើតាម page facebook ប្រជាជនខេត្តព្រះសីហនុបានផ្សាយព័ត៌មានថា តើអ្នក នឹងមានវិប្បដិសារី ឬទេ ពេលដែលអ្នកបានធ្វើអោយមនុស្សបាត់បង់ជីវិត និងធ្វើអោយកុមារក្លាយជាក្មេងកំព្រា ។
សូមជម្រាបជូនសាធារណជន មេត្តាជ្រាបថា ៖ គិតត្រឹមម៉ោង ១០យប់ ថ្ងៃទី២១ ខែវិច្ឆិកា ឆ្នាំ២០២០ទទួលបានថវិកាចូលរួមឧបត្ថម្ភ ចំនួន $1,500 ស្មើនឹង 6,000,000រៀល ចំពោះក្រុមគ្រួសារសព លោក ស៊ត់ វណ្ឌី និងប្រពន្ធ គឺ សោភ័ណ្ឌ ដែលបានបាត់បង់ជីវិតដោយគ្រោះថ្នាក់ចរាចរណ៍ ហើយបន្សល់ទុកនូវកូនៗកំព្រា ឪពុកម្ដាយទាំងក្មេងខ្ចី ។
ប្រជាជន ខេត្តព្រះសីហនុ សូមចូលរួមរំលែកទុក្ខដ៏ក្រៀមក្រំ និងសូមអំពាវនាវមេត្តាបើកបរមានការប្រុងប្រយ័ត្ន គោរពអធ្យាស្រ័យគ្នាទៅវិញទៅមក ចៀសវាងគ្រោះថ្នាក់ ដូចជាក់ស្ដែងដូចករណី ម្ដាយឪពុកស្លាប់ចោល ដោយសារគ្រោះថ្នាក់ចរាចរណ៍ ៕ដោយ៖បញ្ញាស័ក្តិ
