ត្បូងឃ្មុំ៖ លោក អ៊ុក វិបុល ប្រធាននាយកដ្ឋានអភិរក្សជលផល នៃរដ្ឋបាលជលផលបានថ្លែងថា ផ្សោតទឹកសាប ឬជាភាសាឡាតាំង “Irrawaddy Dolphin” ជាថនិកសត្វដ៏កម្រមួយរបស់កម្ពុជា មានវត្តមាននៅទន្លេមេគង្គក្នុងខេត្តក្រចេះ និងពុំមានវត្តមានរស់នៅក្នុងទន្លេមេគង្គ ក្នុងខេត្តត្បូងឃ្មុំទេ។ ប៉ុន្តែប្រមាណមួយខែមកនេះ មានសាកសពសត្វផ្សោតចំនួន២ក្បាល ត្រូវបានរកឃើញក្នុងទឹកដីខេត្តត្បូងឃ្មុំ។
បើតាមសេចក្តីរាយការណ៍របស់នាយកដ្ឋានអភិរក្សជលផល នៃរដ្ឋបាលជលផល និងសេចក្តីថ្លែងការរបស់អង្គការ WWF ទាក់ទងនឹងបញ្ហាការស្លាប់នៃសត្វផ្សោតទឹកសាបទាំងពីរនេះ៖ កាលពីសប្តាហ៍កន្លងទៅ មានសត្វផ្សោតចំនួន០២ក្បាល បានស្លាប់ក្នុងខេត្តត្បូងឃ្មុំ ដោយផ្សោត១ក្បាលមានអាយុប្រមាណ ២៨ឆ្នាំ ហើយដែលត្រូវបានសន្និដ្ឋានថាបានងាប់ដោយចាស់ជរា ហើយវង្វេងធ្លាក់មកដល់ខេត្តត្បូងឃ្មុំនេះ បន្ទាប់មក គឺនៅថ្ងៃទី១៥ ខែវិច្ឆិកា កូនផ្សោត០១ក្បាលទៀត មានអាយុប្រហែល១អាទិត្យ មានទម្ងន់១២គីឡូក្រាម ក៏បានងាប់ផងដែរ នៅទីតាំងដូចខាងលើ ដោយពុំមានស្លាកស្នាម។ យើងអាចសន្និដ្ឋានជាបឋមថា ផ្សោតទាំងពីរក្បាលនេះអាចជាមេនិងកូន ហើយមេងាប់ដោយចាស់ជរា ឯកូនងាប់ដោយគ្មានចំណីអាហារ (ទឹកដោះ)។
លោក អ៊ុក វិបុល បានជម្រាបជូនបន្ថែមទៀតថា នៅឆ្នាំ២០១៥ មានផ្សោតមេពូជនិងជំទង់ចំនួនសរុប ៨០ក្បាល ឆ្នាំ២០១៧ មានចំនួនសរុប៩២ក្បាល និងឆ្នាំ២០២០នេះ មានចំនួន៨៩ក្បាល។ ទោះជាចំនួនផ្សោតក្នុងឆ្នាំ២០២០ត្រូវបានរកឃើញថា មានចំនួនតិចជាងបន្តិបន្តួច បើប្រៀបធៀបនឹងឆ្នាំ២០១៧ តែតាមការវិភាគពីកំរិតលំអៀង បានបង្ហាញថា ពុំមានភាពខុសគ្នាទេ ហើយម្យ៉ាងទៀត ក្នុងអំឡុងពេលស្រាវជ្រាវ ផ្សោតចំនួន២៥ក្បាលដែលបានរកឃើញក្នុងឆ្នាំ២០១៧ ពុំត្រូវបានរកឃើញក្នុងឆ្នាំ២០២០នេះទេ យើងសង្ឃឹមថា ផ្សោតទាំង២៥នេះនៅតែមានវត្តមាននៅឡើយ។ ដោយឡែក ក្នុងឆ្នាំ២០២០ មានកូនផ្សោតថ្មីចំនួន៧ក្បាលបានកើត តែគួរឱ្យសោកស្តាយ កូនផ្សោតចំនួន៥ក្បាលបានងាប់ទៅវិញ៕ ដោយ៖បញ្ញាស័ក្តិ