ក្រុងសៀមរាប ៖ ជនសង្ស័យជាមុខសញ្ញាចាស់អាយុ៤១ឆ្នាំម្នាក់ ចេញពីភ្នំពេញមកសម្ងំលាក់ខ្លួនធ្វើសកម្មភាពកាច់សោកម៉ូតូ នៅក្នុងក្រុងសៀមរាប ត្រូវបានលោកឧត្តមសេនីយ៍ត្រី ភឹង ចន្តារ៉េតស្នងការរង ទទួលផែនការងារព្រហ្មទណ្ឌកំរិតធ្ងន់ សហការកម្លាំង នគរបាលកំរិតស្រាល ចាប់ខ្លួនបាន ។
កម្លាំងនគរបាលខេត្តសៀមរាប សហការគ្នាដេញតាមបង្ក្រាបបានក្រុមជនសង្ស័យដែលជំនាញខាងកាច់សោកម៉ូតូបានម្នាក់និងរត់រួចខ្លួនម្នាក់ ។ ហេតុការណ៍ដេញបង្ក្រាបនេះធ្វើឡើងនៅវេលាម៉ោងប្រមាណជាង១០ព្រឹកថ្ងៃទី២១ខែតុលាឆ្នាំ២០២០ ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប។
លោកវរសេនីយ៍ឯក ហង្ស សូផាតភីរម្យ នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានឲ្យដឹងថា ដោយមានការដឹកនាំបញ្ជាដោយលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋាននគរបាលខេត្តសៀមរាប ទើបកម្លាំងនគរបាលព្រហ្មទណ្ឌកម្រិតស្រាល និងកម្លាំងនគរបាលព្រហ្មទណ្ឌកម្រិតធ្ងន់ ព្រមទាំងអធិការដ្ឋាននគរបាលក្រុងសៀមរាប បានសហការគ្នា ស្រាវជ្រាវដេញល្បាតរហូតឈានដល់ឃាត់ខ្លួនជនសង្ស័យម្នាក់ឈ្មោះ មុត សុភា ហៅ ចាន់ នី ភេទប្រុស អយុ៤១ឆ្នាំ ទីលំនៅសង្កាត់ទួលពង្រ ខណ្ឌពោធិ៍សែនជ័យ រាជធានីភ្នំពេញ ករណីលួចមានស្ថានទម្ងន់ទោស (កាច់សោកម៉ូតូ) ។
លោកបន្តថា កម្លាំងការិយាល័យនគរបាលព្រហ្មទណ្ឌកម្រិតស្រាល បានល្បាតប្រទះឃើញមុខសញ្ញាសង្ស័យលួចម៉ូតូ(កាច់សោរ.ក)ចំនួន២នាក់ ដែលជាមុខសញ្ញាចាស់ដែលធ្លាប់បានប្រព្រឹត្តបទល្មើសលួចម៉ូតូ(កាច់សោក)កន្លងមក ហើយបម្រុងនិងធ្វើសកម្មភាពលួចម៉ូតូបន្តទៀត។ ពេលនោះកម្លាំងការិយាល័យនគរបាលព្រហ្មទណ្ឌកម្រិតស្រាល និងនគរបាលព្រហ្មទណ្ឌកម្រិតធ្ងន់ និងនគរបាលក្រុងសៀមរាប បានសហការគ្នា ដេញបង្ក្រាបបានភ្លាមៗ។
លោកបញ្ជាក់ថា សង្ស័យម្នាក់ ដែលបង្ក្រាបបាននោះ គឺដោយសារពួកគេប្រឹងជិះរត់ធ្លាក់ពីលើម៉ូតូ និងម្នាក់ទៀតជិះម៉ូតូរត់គេចខ្លួនបាត់។ លោកបញ្ជាក់ទៀតថា ករណីនេះ ដកហូតវត្ថុតាងរួមមាន ៖សោសម្រាប់កាច់សោកម៉ូតូចំនួន៣ដើមគ្រាប់ដែកឆក់តូចៗ សម្រាប់បើកសោសុវត្ថិភាពចំនួន៣គ្រាប់, ដងទួណឺវីសចំនួន១ដើម។ លោកបន្ថែមថា ជនសង្ស័យខាងលើបានសារភាពថាខ្លួនពិតជាបានបម្រុងធ្វើសកម្មភាពលួចម៉ូតូ(កាច់សោក)ពិតប្រាកដមែន ប៉ុន្ដែត្រូវបានសមត្ថកិច្ចចាប់ខ្លួនមុន។ កម្លាំងនគរបាលជំនាញនៃខេត្តសៀមរាប កំពុងកសាងសំណុំរឿងចាត់ការបន្តតាមផ្លូវច្បាប់៕ដោយ៖បញ្ញាស័ក្តិ