ស្វាយរៀង៖ មន្ត្រីនគរបាលចរាចរណ៍បួននាក់ ដែលពាក់ព័ន្ធករណីប៉ះទង្គិចដោយប្រើអំពើហិង្សារវាង មន្ត្រីនគរបាលចរាចរណ៍ និងអ្នកបើកបររថយន្តតាក់ស៊ី វាយអ្នកបើកតាក់ស៊ីមួយដៃបែកមាត់និងបាក់ធ្មេញអស់មួយនេះ ត្រូវបានលោកឧត្តមសេនីយ៍ទោ ស្នងការនគរបាលខេត្តស្វាយរៀង បញ្ជាឲ្យដក មកបញ្ឈរជើង នៅការិយាល័យបុគ្គលិក នៃស្នងការដ្ឋាននគរបាលខេត្ត ដើម្បីដាក់វិន័យ តាមវិន័យ របស់កងកម្លាំងនគរបាលជាតិ។
អ្នកនាំពាក្យស្នងការដ្ឋាននគរបាលខេត្តស្វាយរៀង នៅថ្ងៃទី ២៣ ខែវិច្ឆិកាឆ្នាំ ២០២០ នេះបានជម្រាបជូនសាធារណជន អំពីករណីមានការប៉ះទង្គិចដោយប្រើអំពើហិង្សារវាង មន្ត្រីនគរបាលចរាចរណ៍ និងអ្នកបើកបររថយន្តល្មើសច្បាប់។
អ្នកនាំពាក្យស្នងការដ្ឋាននគរបាលខេត្តស្វាយរៀង បានឲ្យដឹងថា ករណីមានការប៉ះ ទង្គិចដោយប្រើអំពើហិង្សារវាងមន្ត្រីនគរបាលចរាចរណ៍ និងអ្នកបើកបររថយន្តល្មើសច្បាប់ កើតហេតុនៅវេលាម៉ោង ៩និង១៧នាទីព្រឹក នៅថ្ងៃទី២២ ខែវិច្ឆិកា ឆ្នាំ២០២០ នៅចំណុចភូមិត្របែក ឃុំស្វាយជ្រំ ស្រុកស្វាយជ្រំ ខេត្តស្វាយរៀង ។
ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តស្វាយរៀង បានដាក់គោលដៅត្រួត ពិនិត្យល្បឿន លើផ្លូវជាតិលេខ ១ ចន្លោះគីឡូម៉ែត្រលេខ ១១៦-១១៧ បានពិនិត្យឃើញរថយន្តម៉ាកស៊ីណា ពាក់ ផ្លាកលេខភ្នំពេញ 2BI-6754 បើកបរដោយឈ្មោះ លាស់ ពុធធា ភេទប្រុស អាយុ ៣០ឆ្នាំ មុខរបរអ្នកបើកតាក់ស៊ី បើកបរល្មើសច្បាប់ ដោយប្រើប្រាស់ល្បឿន ៩៦គីឡូម៉ែត្រ ក្នុង១ម៉ោង។ សមត្ថកិច្ចនគរបាលបានធ្វើការឃាត់ រថយន្តខាងលើ ប៉ុន្តែអ្នកបើកបររថយន្តខាងលើបានបើករត់គេចចូលតាមផ្លូវលំ សមត្ថកិច្ចនគរបាលក៏បានដេញតាម ទើបឃាត់រថយន្តខាងលើ រួចអញ្ជើញអ្នកបើកបររថយន្តឲ្យមកប៉ុស្តិ៍នគរបាលរដ្ឋបាល ប៉ុន្តែអ្នកបើកបររថយន្តមិន ព្រមមកតាមសមត្ថកិច្ច រហូតមានការប៉ះទង្គិចប្រើអំពើហិង្សារវាងសមត្ថកិច្ចនឹងអ្នកបើកបររថយន្ត។ ក្រោយមានការ អប់រំ និងពន្យល់ណែនាំពីសមត្ថកិច្ច អ្នកបើកបររថយន្តខាងលើ បានយល់ព្រមទទួលការផាកពិន័យតាមច្បាប់។ ចំណែកឯសមត្ថកិច្ចនគរបាលចរាចរណ៍ដែលបានប្រើអំពើហិង្សាលើអ្នកបើកបររថយន្ត បានសូមទោស និងសម្របសម្រួល ជាមួយអ្នកបើកបរ រួចហើយ។
ដោយឡែកមន្ត្រីនគរបាលចរាចរណ៍ទាំងបួននាក់ ត្រូវបានលោកឧត្តមសេនីយ៍ទោ ស្នងការនគរបាលខេត្ត បញ្ជាអោយដក មកបញ្ឈរជើង នៅការិយាល័យបុគ្គលិក នៃស្នងការដ្ឋាននគរបាលខេត្ត ដើម្បីដាក់វិន័យ តាមវិន័យ របស់កងកម្លាំងនគរបាលជាតិ។ សំណូមពរបងប្អូនប្រជាពលរដ្ឋចូលរួមគោរពច្បាប់ចរាចរណ៍ផ្លូវគោកទាំងអស់គ្នា ៕ ដោយ៖បញ្ញាស័ក្តិ