ដូចដែលប្រិយមិត្តបានដឹងថាហើយ ក្មេងស្រី យ៉ង់ ស្រីនីត អាយុ ១១ ឆ្នាំ អ្នករស់នៅខេត្តមណ្ឌលគិរី ឃើញថានៅតែកំពុងទទួលការចាប់អារម្មណ៍ និងតាមដានពីសំណាក់មហាជននៅឡើយ ជាពិសេសអ្នកប្រើប្រាស់បណ្តាញសង្គមហ្វេសប៊ុក។
ពិតណាស់ ក្មួយស្រីនីត បានល្បីឈ្មោះមកទល់ពេលនេះ ក៏ព្រោះតែដោយសាររូបសម្រស់របស់នាងស្រស់ស្អាតប្លែកពីធម្មជាតិ ហើយអ្វីដែលធ្វើឲ្យមហាជនកាន់តែអាណិតខ្លាំងនោះ នៅពេលដឹងថាគ្រួសាររបស់នាងពិតជាក្រក្សត់ខ្លាំង ខណៈផ្ទះក៏គ្មាននៅឲ្យប្រាកដ។
តែយ៉ាងណា ដោយសារតែរូបភាពជាច្រើនសន្លឹករបស់នាង បានផ្ទុះល្បី ជាហេតុធ្វើឲ្យនាងមានឱកាសបង្ហាញខ្លួននៅលើស្ថានីយទូរទស្សន៍ និងថតឲ្យសំអាងការមួយចំនួនផងដែរ ខណៈស្រីនីតបានឡើងមកទីក្រុងភ្នំពេញ និងមកស្នាក់នៅផ្ទះនាយពាក់មី។
ដោយឡែក មុនរៀបចំដំណើរចេញទៅផ្ទះឯមណ្ឌលគិរីវិញ ស្រីនីត ក៏ត្រូវបានគ្លីនិកពេទ្យធ្មេញមួយកន្លែង ហៅទៅព្យាបាលធ្មេញ និងព្រមទាំងបានឧបត្ថម្ភថវិកាមួយចំនួន សម្រាប់ផ្គត់ផ្គង់ដល់ការសិក្សារបស់នាងទៀតផង។
ក្នុងនោះ បើយោងតាមទំព័រហ្វេសប៊ុកឈ្មោះ Chun Soursdey នៅថ្ងៃទី២៣ ខែវិច្ឆិកា ឆ្នាំ២០២០ នេះបានបង្ហោះឲ្យដឹងថា៖ «ថ្ងៃនេះក្មួយស្រី យ៉ង់ ស្រីនីត បានមកជួបខ្ញុំផ្ទាល់ហើយ នៅក្រៅគាត់គួរឲ្យស្រឡាញ់និងរួសរាយណាស់។ ខ្ញុំបានធ្វើការសម្អាតធ្មេញ និង ពិនិត្យធ្មេញជូនក្មួយស្រី ព្រមទាំងឧបត្ថម្ភថរិកាមួយចំនួនសម្រាប់ផ្គត់ផ្គង់ការសិក្សា។ ថ្ងៃនេះគាត់ត្រឡប់ទៅមណ្ឌលគិរីវិញហើយ ជូនពរក្មួយស្រីរៀនពូកែ ដើម្បីសម្រេចបំណងនាពេលអនាគត»៕ ដោយ៖ លឹម ហុង
