ភ្នំពេញ៖ជនសង្ស័យលោកស័ក្តិ៥ ហ៊ីម សំបូរ ដែលយកកាំភ្លើង មកជេរប្រមាថ សំឡុត និង គំរាម កំហែងសម្លាប់ទាំងគ្រួសារដល់អ្នកភូមិផងរបងជាមួយនោះ បានត្រូវកម្លាំងកងរាជអាវុធហត្ថរាជធានីភ្នំពេញ ចាប់ខ្លួនបញ្ជូនមកតុលាការ កាលពីរសៀលថ្ងៃទី២២ ខែវិច្ឆិកា ឆ្នាំ២០២០ ដើម្បីចាត់ការតាមច្បាប់ ។
តាមប្រភពព័ត៌មានឲ្យដឹងថា រហូតមកដល់រសៀលថ្ងៃទី២៣ ខែវិច្ឆិកា ឆ្នាំ២០២០ នេះ លោក ស៊ិត វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ កំពុងធ្វើការសាកសួរ លោកស័ក្តិ៥ ហ៊ីម សំបូរ ដោយពុំទាន់សម្រេចយ៉ាងណានៅឡើយទេ ។
ជនសងស័យលោកស័ក្តិ៥ ហ៊ីម សំបូរ បានត្រូវកម្លាំងមូលដ្ឋានកងរាជអាវុធហត្ថខណ្ឌសែនសុខ ឃាត់ខ្លួនកាលពីព្រលប់ថ្ងៃទី២០ ខែវិច្ឆិកា ឆ្នាំ២ ០២០ រួចបញ្ជូនមកបញ្ជាការដ្ឋានកងរាជអាវុធហត្ថរាជធានីភ្នំពេញ ។
ការឃាត់ខ្លួនជនសង្ស័យតាមបណ្តឹងរបស់នារីរងគ្រោះ បានរៀបរាប់ថា កាលពីថ្ងៃទី១៦ ខែ វិច្ឆិកា ឆ្នាំ២០២០ វេលាម៉ោង២០និង២០នាទី នៅចំណុចមុខផ្ទះលេខ២៤៦ ផ្លូវលេខ២៧១ ២៧១ ភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ជនសង្ស័យឈ្មោះ ហ៊ីម សំបូរ ដែលមានដីផ្ទះជិតជនរងគ្រោះ បានដើរកាន់កាប់អាវុធខ្លីមិនស្គាល់ម៉ាកចំនួន១ដើម កាត់មុខផ្ទះជនរងគ្រោះ ឆ្ពោះទៅហាងអ៊ុតរបស់ជនរងគ្រោះ មាន យីហោ «ជី ជី សាឡន» ដោយបានធ្វើការសំឡុត និង គំរាមកំហែងសម្លាប់ទាំងគ្រួសារដោយអាវុធខ្លី ។
ក្នុងពាក្យបណ្តឹង នារីរងគ្រោះបានរៀបរាប់ចោទប្រកាន់ទៀតថា ឈ្មោះ ហ៊ីម សំបូរ តែងតែរករឿងឈ្លោះជាមួយគ្រួសារជនរងគ្រោះជាញឹកញាប់ ចាប់តាំងពីជនរងគ្រោះបានសាងសង់ផ្ទះល្វែងអំពីថ្មរួចមក ឈ្មោះនេះ តែងតែមិនពេញចិត្តនឹងគ្រួសារជនរងគ្រោះឡើយ ។
នេះគ្រាន់តែជាព័ត៌មានដែលទទួលបានពីប្រភពតុលាករបន្តទៀត ឈ្មោះ ហ៊ីម សំបូរ តែងតែកាន់អាវុធខ្លីដើរគំរាមកំហែងអ្នកជិតខាងណា ដែលបានឈ្លោះជាមួយគេ ហើយសំឡុតនិងបានបោះពាក្យសម្តីថា «ហែងធ្វើមិនឈ្នះអញទេ» ដែលទង្វើនេះ គឺជាទង្វើខុសច្បាប់ទាំងស្រុង ព្រោះឈ្មោះនេះ ក្នុងនាមជាសមត្ថកិច្ចផងដែរ ដឹងច្បាប់ហើយនៅតែប្រព្រឹត្តខុស ។
ជនរងគ្រោះ បន្តថា ទង្វើទាំងអស់នេះ ធ្វើឲ្យជនរងគ្រោះរស់នៅមិនបានសុខ ដោយការគំរាមកំហែងថា នឹងសម្លាប់ទាំងគ្រួសារ ដោយឈ្មោះ ហ៊ីម សំបូរ សុខចិត្តស្លាប់ ផងដែរ ។
ទោះបយ៉ាងណាតុលាការកំពុងសាកសួរជនសង្ស័យតាមពាក្យណ្តឹងរបស់ជនរងគ្រឬដើមបណ្តឹង៕ដោយ៖CEN
