ខេត្តព្រះសីហនុ ៖ យោងតាមការផ្សាយរបស់ព័ត៌មានក្នុងស្រុកមួយបានឱ្យដឹងថា ចាប់ពីពេលនេះតទៅខេត្តព្រះសីហនុ នឹងចាប់ផ្ដើមអនុវត្តវិធានការផាកពិន័យអ្នកបោះចោលសំរាមពាសវាលពាសកាលចាប់ពី ២ម៉ឺនរៀល ទៅ ៤០ម៉ឺនរៀល។
វិធានការនេះផ្តើមឡើង នាឱកាសដែលឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានចុះពិនិត្យហេដ្ឋារចនាសម្ព័ន្ធក្នុងក្រុង និងតាមតំបន់ឆ្នេរ។ ឯកឧត្តមបានធ្វើការណែនាំដល់ក្រុមការងារ និងមន្ត្រីជំនាញ ឱ្យឆ្លាក់អក្សរលើថ្មម៉ាប ដាក់តាមសួនច្បារ តំបន់ឆ្នេរ “ហាមបោះចោលសំរាម” ហើយប្រសិនបើមានករណីរំលោភ បំពាន និងត្រូវផាកពិន័យតាមអនុក្រឹត្យលេខ ១១៣ មាត្រា៤៣ ស្តីពីការផាកពិន័យអន្តរកាលចាប់ពី ២០.០០០ រៀល ដល់ ៤០០.០០០រៀល។
ជាចុងក្រោយឯកឧត្តមអភិបាល នៃគណៈអភិបាលខេត្ត ក៏បានធ្វើការអំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិដែលមកលេងកម្សាន្តតាមតំបន់ឆ្នេរ និងរមនីយដ្ឋាននានា ក្នុងខេត្តព្រះសីហនុ សូមចូលរួមសហការថែរក្សាអនាម័យបរិស្ថានទាំងអស់គ្នា៕ ដោយ៖ កូលាប ក្រហម
