រថយន្តស៊េរីទំនើប១គ្រឿង បានបង្កការភ្ញាក់ផ្អើលជាខ្លាំង ដោយសារតែរថយន្តនេះបានជួបគ្រោះថ្នាក់ ខណៈពេលកំពុងឈប់រង់ចាំភ្លើងស្តុបសុខៗ ស្រាប់តែធ្លាក់ជង្ហុកលូដែលបានស្រុតកណ្តាលផ្លូវយ៉ាងជ្រៅ បណ្តាលឲ្យរងការខូចខាតផ្នែកខាងក្រោមយ៉ាងដំណំ។ ហេតុការណ៍ដែលគ្រប់គ្នាមានការហួសចិត្តនេះ បានកើតឡើងនៅជិតស្តុបអាងទឹក ស្តាតអូឡាំពិច កាលពីរសៀលថ្ងៃទី២៣ ខែវិច្ឆិកា ឆ្នាំ២០២០។
ចំពោះហេតុការណ៍នេះផងដែរ ម្ចាស់រថយន្តរងគ្រោះក៏បានប្រាប់ឲ្យដឹងថា មុនពេលហេតុការណ៍កើតឡើង ពោលគឺខណៈគាត់កំពុងឈប់ស្តុបតម្រង់ជួរគ្នា ហើយសុខៗ ស្រាប់តែកន្លែងបង្កហេតុហ្នឹង បាក់ស្រុតបាក់ចុះក្រោមតែម្តង។ ប៉ុន្តែ ដោយមិនចង់មានរឿងវែងឆ្ងាយ គាត់ក៏បានសម្រេចចិត្តយកឡានទៅជួសជុលខ្លួនឯង ខណៈអ្នកខ្លះជួយផ្តល់យោបល់យ៉ាងចាក់ដោតថា យកឡានទៅ ជួសជុលខ្លួនឯងជា សេចក្តីសុខ ជា ត្រេីយសុខសាន្តភិរម្យ បើបងចង់នៅ តវ៉ា ខ្លាចតែ រដ្ឋចាប់ឲ្យធ្វើ ផ្លូវសងវិញ ធ្ងន់ជាងអា ជួសជុលឡានទៀត។
ម្ចាស់រថយន្ត ដែលមានគណនីហ្វេសប៊ុកឈ្មោះ Huong Putthea បន្ទាប់មកក៏បានបង្ហោះប្រាប់បងប្អូននៅក្នុងបណ្តាញសង្គម ឲ្យបានដឹងពីទំហំនៃការខូចខាត និងតម្លៃជួសជួល ប្តូរគ្រឿងបន្លាស់រថយន្ត ដែលបូកសរុបត្រួសៗក្បែរម៉ឺនដុល្លារ ដល់ថ្នាក់គាត់បោះសម្តីចុងក្រោយថា៖ «ដាច់កបូមធ្លាយខ្យល់ក្រោយខាងឆ្វែងមួយ ដែលជាបូម ប្រភេទ Air suspension កម្មង់ Designers ពីប្រទេសថៃ តម្លៃក្បែរ 3 ពាន់ $ សុីម៉ាំង ប្រភេទ Long Tube ceramic កំពិតមួយជំហៀងក្រោយខាងឆ្វេង មួយដេីម 1400$ នឹងសម្បកកង់ Dunlop tire 21 inch មួយ ដែលបានមុតនឹងជាយកៅស៊ូថ្នល់នឹងរយះដាច់ តម្លៃមួយគ្រាប់ 335$ , បូកមេីលទៅ»៕ ដោយ៖ លឹម ហុង
