អ្នកគុននិយមទើបលេចមុខម្នាក់ បាននិងកំពុងទទួលបានចាប់អារម្មណ៍យ៉ាងខ្លាំង បន្ទាប់ពីវីដេអូមួយត្រូវបានមហាជនធ្វើការចែករំលែកយ៉ាងផុសផុល ដោយបង្ហាញឲ្យឃើញពីសកម្មភាពអ្នកគុនខ្មែរលាក់មុខរូបនេះ បញ្ចេញសមត្ថភាព ពិសេសគឺភាពខ្លាំងមាំមួនរបស់ខ្លួន តាមរយៈការឡាំនឹងដើមចេក និងគល់ត្នោតយ៉ាងអស្ចារ្យបំផុត។
តាមរយៈវីដេអូ អ្នកក្បាច់គុនរូបនេះ ដែលក្រឡេកមួយភ្លែតច្រឡំប៊ូខាវ បានធ្វើឲ្យគ្រប់គ្នាស្រឡាំងកាំងតែម្តង ខណៈឡាំស្មងជើង និងជង្គង់ ដោយទាត់បំបាក់ដើមចេក១ដើមស្ទើរមិនគួរឲ្យជឿ និងបន្ទាប់មក សាកស្មងនឹងគល់ត្នោតយ៉ាងសាហាវ ដែលមើលទៅហាក់ដូចជាគ្មានឈឺសោះឡើយ។
នេះបើយោងតាមសាម៉ីខ្លួនផ្ទាល់ដែលមានគណនីហ្វេសប៊ុកឈ្មោះ Sophal Osmach (សុផល អូស្មាច់) បានបង្ហោះវីដេអូចំនួន២ឡាំនឹងដើមចេក និងគល់ឆ្នោត ដោយភ្ជាប់សារបញ្ជាក់ពីបំណងរបស់ខ្លួនថា៖ «បើសិនជាអាច សូមពុកម៉ែបងប្អូនជួយសែរ Share រូបខ្ញុំបាតម្នាក់1 ដើម្បីជាការលើកទឹកចិត្ត មុននឹងខ្ញុំឈានទៅឡើងការប្រកួតប្រដាល់ក្បាច់គុណបុរាណខ្មែរ នៅលើសង្វៀន ព្រោះខ្ញុំចង់ស្នងត្រកូល (គុណខ្មែរ) ខ្មែរស្រឡាញ់ខ្មែរ មួយជីវិត»។
តែទោះយ៉ាងណា ក្រោយពីបានឃើញបែបនេះ ក៏បងប្អូនអ្នកប្រើប្រាស់បណ្តាញសង្គមបានចូលខមិនប្រាប់ក្នុងបំណងល្អថា៖ «សុំសរសើរដល់កម្លាំងរឹងមាំ ប៉ុន្តែ មិនគួរទៅទាត់គល់ត្នោតទេ សាច់ឆ្អឹងអាចខូច ពិការនៅពេលបន្ទាប់ សូមមេត្តា ហាត់ឲ្យត្រូវក្បូន បំប៉នសុខភាព និងប្រឹងហ្វឹកហាត់ ជាមួយក្លឹបដែលជំនាញ។ សូមជូនពរ សំណាងល្អគ្រប់យ៉ាងដូចបំណង »៕ ដោយ៖ លឹម ហុង