ភ្នំពេញ៖ សហរដ្ឋអាមេរិក បានផ្តល់ជំនួយបន្ថែមចំនួន ៦០ម៉ឺនដុល្លារអាមេរិក ដើម្បីឆ្លើយតបទៅនឹងគ្រោះជំនន់ទឹកភ្លៀងកន្លងមក ដល់កម្ពុជា សម្រាប់ឧបត្ថម្ភទៅលើស្បៀងអាហារជួយដល់គ្រួសាររងគ្រោះចំនួន ៣.៧២៥គ្រួសារ ដែលជំនួយបន្ថែមនេះ ធ្វើឡើងក្នុងសន្និសីទសារព័ត៌មាន ក្រោមអធិបតីភាព ឯកឧត្តម W.Patrick Murphy ឯកអគ្គរដ្ឋទូតសហរដ្ឋអាម៉េរិកប្រចាំកម្ពុជា តំណាងទីភ្នាក់ងារជំនួយសហរដ្ឋអាម៉េរិក (USAID) តំណាងអង្គការស្បៀងពិភពលោក (WFP) នៅរាជធានីភ្នំពេញ នាព្រឹកថ្ងៃទី២៤ ខែវិច្ឆិកា ឆ្នាំ២០២០ ។
សូមបញ្ជាក់ផងដែរ កន្លងមកថ្មីៗនេះសហរដ្ឋអាម៉េរិក បានផ្តល់ជំនួយបន្ទាន់ ឆ្លើយតបទៅនឹងគ្រោះទឹកជំនន់នៅកម្ពុជា ចំនួន ១០ម៉ឺនដុល្លារអាម៉េរិក ម្តងរួចមកហើយ ។
សហរដ្ឋអាមេរិក នឹងផ្តល់ជំនួយសង្គ្រោះជាបន្ថែមក្នុងស្មារតីសាមគ្គីភាពជាមួយសហគមន៍ដែលរងគ្រោះដោយគ្រោះទឹកជំនន់ទាំងនេះ។ ឯកឧត្ដមឯកអគ្គរដ្ឋទូតបានបន្ដថា ជាមួយនឹងថវិកាបន្ថែមនេះការិយាល័យផ្តល់ជំនួយមនុស្សធម៌របស់ទីភ្នាក់ងារ ជំនួយអាម៉េរិក USAID នឹងជួយដល់អង្គការកម្មវិធីស្បៀងអាហារពិភពលោក(WFP) ក្នុងការផ្តល់ជំនួយក្នុងគ្រាបន្ទាន់ដើម្បីជួយគ្រួសារចំនួន ៣.៧២៥ គ្រួសារ ដែលរងផលប៉ះពាល់ដើម្បីឱ្យគេទិញស្បៀងអាហារ។ ឯកឧត្ដមបានបន្ថែមថា ជំនួយនេះ បានបន្ថែមទៅលើទឹកប្រាក់ចំនួន ១០០ .០០០ ដុល្លារ ដែលទីភ្នាក់ងារ USAID បានផ្តល់ឱ្យដំបូងដល់អង្គការ WFP បន្ទាប់ពីមានគ្រោះទឹកជំនន់ភ្លាមសម្រាប់ជួយក្នុងការចែកចាយស្បៀងជាបន្ទាន់ដល់គ្រួសារចំនួនជាង ២៥៦០ គ្រួសារនៅក្នុងតំបន់ដែលរងគ្រោះខ្លាំងជាងគេក្នុងខេត្តពោធិ៍សាត់។
លោកអគ្គរដ្ឋទូតអាមេរិកប្រចាំកម្ពុជា បានថ្លែងថា រដ្ឋាភិបាលអាមេរិកសម្រេចផ្ដល់ជំនួយបន្ថែមបែបនេះ ក៏ព្រោះតែតម្រូវការចាំបាច់របស់ប្រជាជនកម្ពុជាជាច្រើនដែលរងគ្រោះដោយទឹកជំនន់នៅឆ្នាំនេះ ហើយវាបង្ហាញនូវសាមគ្គីភាពជាមួយសហគមន៍រងគ្រោះផងដែរ។ លោកបានចុះទៅកាន់ខេត្តមួយចំនួននៅភាគពាយព្យប្រទេសកម្ពុជា ដែលរងគ្រោះដោយទឹកជំនន់កាលពីខែតុលាកន្លងមកនេះ ហើយលោកថា លោកបានឃើញដោយផ្ទាល់នូវពលរដ្ឋកម្ពុជារងគ្រោះយ៉ាងធ្ងន់ធ្ងរដោយសារទឹកជំនន់។
លោកស្រី Claire Conan តំណាងអង្គការស្បៀងអាហារពិភពលោក(WFP) បានគូសបញ្ជាក់ថា “យើងសូមអរគុណដល់ទីភ្នាក់ងារ USAID ចំពោះជំនួយបន្ថែមនេះសម្រាប់គ្រួសារខ្សត់ខ្សោយដែលរងគ្រោះដោយទឹកជំនន់។ ជំនួយនេះមានសារសំខាន់ណាស់សម្រាប់ស្តារស្ថានភាពរបស់គេពិសេសដោយពួកគេជាច្រើនក៏រងគ្រោះផងដែរដោយសារបញ្ហាជំងឺរាតត្បាតជាសកល។ អង្គការ WFP នឹងធ្វើការជិតស្និទ្ធជាមួយរដ្ឋាភិបាលនិងដៃគូនៅក្នុងដំណាក់កាលថ្មីនេះនៃការឆ្លើយតបនឹងគ្រោះទឹកជំនន់”។ ក្រៅពីនេះទៀតជាមួយ នឹងជំនួយរបស់ទីភ្នាក់ងារ USAID អង្គការ WFP បានជួយពង្រឹងប្រព័ន្ធព័ត៌មានលើការគ្រប់គ្រងគ្រោះមហន្តរាយថ្នាក់ជាតិរបស់គណៈកម្មាធិការជាតិគ្រប់គ្រងគ្រោះមហន្តរាយ។ ចំពោះការជួយនេះបានរួមចំណែកធ្វើឱ្យគណៈកម្មាធិការជាតិគ្រប់គ្រងគ្រោះមហន្ដរាយ អាចតាមដានហានិភ័យនិងផលប៉ះពាល់នៅពេលមានគ្រោះទឹកជំនន់ ហើយអាច កៀរគរធនធានបានឆាប់រហ័ស សម្រាប់ធ្វើការឆ្លើយតបនៅតាមតំបន់ដែលរងផលប៉ះពាល់។
អ្នកស្រី គ្លែរ ខូនែន (Claire Conan) នាយកអង្គការកម្មវិធីស្បៀងអាហារពិភពលោកប្រចាំប្រទេសកម្ពុជា បានថ្លែងថា គ្រោះទឹកជំនន់នៅកម្ពុជាកាលពីខែតុលាកន្លងមកនេះ បានប៉ះពាល់ពលរដ្ឋកម្ពុជាដល់ទៅ៨សែននាក់ និងផ្ទះសម្បែងពលរដ្ឋដល់ទៅជាង១៦ម៉ឺនខ្នង។
លោកស្រីបានលើកឡើងថា ដោយមានជំនួយរបស់ទីភ្នាក់ងារ USAID អង្គការ WFP បានជួយដល់វេទិកាឆ្លើយតបមនុស្សធម៌ដោយជួយធ្វើការសម្របសម្រួលការឆ្លើយតបនឹងគ្រោះទឹកជំនន់នៅក្នុងវិស័យនានា ហើយធ្វើសេចក្តីរាយការណ៍អំពីស្ថានភាពទឹកជំនន់នៅក្នុងពេលមានវិបត្តិកើតឡើង។ ជំនួយជាថវិកា១០ម៉ឺនដុល្លារដែលអាមេរិកផ្ដល់លើកដំបូងនោះ ត្រូវបានយកទៅប្រើប្រាស់សម្រាប់បែងចែកស្បៀងអាហារដល់ពលរដ្ឋ ២.៥៦០គ្រួសារនៅក្នុងខេត្តពោធិ៍សាត់ ជាខេត្តដែលរងគ្រោះដោយទឹកជំនន់ធ្ងន់ធ្ងរជាងគេ៕ដោយ៖បញ្ញាស័ក្តិ