ភ្នំពេញ៖ កាលពីសប្តាហ៍កន្លងទៅ លោកឯកអគ្គរាជទូតរង Luke Arnold បានជួបជាមួយ លោកស្រី សៀង សុខចាន់ ដែលជាសហ គ្រិនមួយរូប ហើយក៏ជាអ្នកតំណាង ឱ្យជនមានពិការភាព នៅក្នុងខេត្តបាត់ដំបង។ នេះបើតាមការផ្សាយព័ត៌មានរបស់ស្ថានទូតអូស្ត្រាលីប្រចាំកម្ពុជា។
ដោយមានការគាំទ្រពី កម្មវិធីសហប្រតិបត្តិការអូស្ត្រាលី-កម្ពុជា ដើម្បីការផ្តល់សេវាប្រកបដោយនិរន្តរភាព និងសមធម៌ (ACCESS) របស់អូស្ត្រាលី លោកស្រី សុខចាន់ មានលទ្ធភាពទទួលបាននូវកម្ចី ដែលមិនត្រូវការវត្ថុបញ្ចាំ ដើម្បីពង្រីកមុខរបរកាត់ដេររបស់គាត់។ ទោះជាមានផលប៉ះពាល់ដល់ការបញ្ជាទិញ ដែលបណ្តាលមកពីជំងឺកូវីដ-១៩ ក៏ដោយ តែសុខចាន់ បានសម្របមុខរបររបស់គាត់ ហើយឥឡូវនេះគាត់បាន បន្ថែមជាការដេរម៉ាសការពារជំងឺកូវីដ-១៩ ដ៏ស្រស់ស្អាត។
លោកស្រី សុខចាន់ ដែលជាជនមានពិការភាពអង្គុយលើរទេះរុញ និងជាប្រធាន អង្គការវេទិកាស្ត្រីពិការក្នុងខេត្តបាត់ដំបង បានកោតសរសើរដល់កម្មវិធី ACCESS ដែលបានជួយរូបគាត់ ក្នុងការកសាងបណ្តាញទំនាក់ទំនង ជាមួយអាជ្ញាធរមូលដ្ឋាន។ គាត់បាននិយាយថា “ដោយឥឡូវនេះ ខ្ញុំស្គាល់អាជ្ញាធរមូលដ្ឋាន តាមរយៈការចូលរួមវគ្គបណ្តុះបណ្តាលផ្សេងៗ គាំទ្រដោយកម្មវិធី ACCESS ធ្វើឱ្យខ្ញុំមានទំនុកចិត្ត ក្នុងការធ្វើការជាមួយពួកគាត់ និងស្វែងរកការគាំទ្រពីពួកគាត់ ដើម្បីចាត់វិធានការផ្សេងៗ ធានាបាននូវបរិយាបន្នពិការភាព ដូចជាការបង្កលក្ខណៈងាយស្រួលនៅតាមអាគារសាធារណៈក្នុងខេត្តបាត់ដំបង សម្រាប់ជនមានពិការភាពប្រើរទេះរុញ” ៕ដោយ៖បញ្ញាស័ក្តិ