បុរសម្នាក់នៅទីក្រុងហាណូយត្រូវបានកាត់ទោសប្រហារជីវិត ពីបទធ្វើឃាតលើកូនស្រីចុងអាយុ ៣ ឆ្នាំ របស់ខ្លួន ខណៈដែលម្តាយបង្កើតក្មេងស្រីរងគ្រោះក៏ត្រូវបានតុលាការ កាត់ទោសឲ្យជាប់គុកអស់មួយជីវិតផងដែរ។
តុលាការប្រជាជន ក្នុងទីក្រុងហាយណូយ នៅថ្ងៃទី១៨ ខែវិច្ឆិកា ឆ្នាំ២០២០ បានបញ្ចប់ការជំនុំជម្រះក្តីរយៈពេល ២ ថ្ងៃ របស់បុរសឈ្មោះ ង្វៀង មិញទួន (Nguyen Minh Tuan) អាយុ ៣១ ឆ្នាំ និងស្ត្រីជាប្រពន្ធឈ្មោះ ង្វៀន ធីឡានអាន (Nguyen Thi Lan Anh) អាយុ ២៩ ឆ្នាំ ដែលទទួលខុសត្រូវចំពោះការស្លាប់កូនស្រីអាយុ ៣ ឆ្នាំ របស់ពួកគេ និងក៏ជាកូនស្រីបង្កើតរបស់ Anh។
យោងតាមការតុលាការ នាង Anh មានកូនស្រីអាយុ ៣ ឆ្នាំម្នាក់ ឈ្មោះ N.N.M ដែលជាកូនជាមួយប្តីមុនរបស់នាង។ បន្ទាប់ពីការលែងលះ Anh និង Tuan (ប្តីក្រោយ) បានរៀបការជាមួយគ្នានៅក្នុងឆ្នាំ ២០១៨ ខណៈពេលដែលកូនស្រីរងគ្រោះ រស់នៅជាមួយម្តាយរបស់ Anh។ ហើយ Anh និង Tuan ក៏បង្កើតបានកូនក្រោយម្នាក់ទៀតជាមួយគ្នាផងដែរ។
យ៉ាងណាមិញ កាលពីដើមខែកុម្ភៈ Tuan បានទិញគ្រឿងញៀនចំនួន ២,៣ លានដុង (៩៩ ដុល្លារអាមេរិក) សម្រាប់ប្រើប្រាស់ផ្ទាល់ខ្លួន។
នៅថ្ងៃទី ៥ ខែមីនា Anh ក៏បាននាំកូនស្រីខ្លួន N.N.M ពីម្តាយ មកលេងផ្ទះរបស់នាង ជាមួយប្តីក្រោយ Tuan។
នាង Anh និង Tuan បាននិយាយថា ពួកគេបានដាក់ក្មេងស្រីរងគ្រោះនៅខាងក្នុងអាងលាងប្លាស្ទិច បន្ទាប់ពីនាងមានអាកប្បកិរិយាមិនល្អ ហើយក៏បានវាយកូនស្រីតូចនោះ ជាមួយដែកពេញមួយយប់ថ្ងៃទី២៩ ខែមីនា។ លើសពីនេះ Tuan ដែលបានប្រើប្រាស់គ្រឿងញៀន ក៏បានបន្តវាយដុំលើក្មេងស្រីចុង រហូតរងរបួសធ្ងន់ធ្ងរ។
នៅម៉ោងប្រហែល ៨ ព្រឹក នៅព្រឹកបន្ទាប់ ក្មេងស្រីរងគ្រោះ បានលេចឡើងនូវអាការពិបាកដកដង្ហើម ហើយត្រូវបានបញ្ជូនទៅមន្ទីរពេទ្យមួយ ជាកន្លែងដែលនាងបានទទួលមរណភាពនៅម៉ោង ១១ និង ០០ នាទី ដោយសាររបួសខួរក្បាល។
នៅក្នុងសវនាការ Tuan បាននិយាយថា គាត់គ្រាន់តែវាយកូនស្រីចុងពីរបីដងប៉ុណ្ណោះ ហើយបន្ថែមថា ក្មេងស្រីនោះប្រហែលជាស្លាប់ដោយសារជំងឺផ្តាសាយ។
តែយ៉ាងណា គណៈវិនិច្ឆ័យបានអះអាងថា ពួកគេមានភស្តុតាងគ្រប់គ្រាន់ ទាក់ទងនឹងករណីនេះដើម្បីកាត់ទោសប្រហារជីវិត Tuan។
នៅពេលដែល Anh ខកខានមិនបានការពារកូនស្រីរបស់ខ្លួន គណៈវិនិច្ឆ័យបាននិយាយថា នាងក៏សមនឹងទទួលបានការដាក់ទណ្ឌកម្មប្រហាក់ប្រហែលគ្នាផងដែរ ដោយត្រូវផ្តន្ទាទោសនាងឱ្យជាប់គុកអស់មួយជីវិត ព្រោះនាងនៅតែមានកូនតូចម្នាក់ទៀត ដើម្បីចិញ្ចឹមអប់រំស្របតាមច្បាប់ក្នុងតំបន់។
ជាមួយគ្នានេះផងដែរ នាង Anh ក្រោយពីបានឮតុលាការកាត់ទោសឲ្យជាប់គុកអស់មួយជីវិត ក៏បានស្រែកទ្រហ៊ោយំពេញក្នុងតុលាការ និងលុតជង្គង់សុំការអភ័យទោសពីតុលាការ ចំពោះកំហុសដ៏ធ្ងន់ធ្ងរនេះមកលើកូនស្រីរបស់ខ្លួន៕ ដោយ៖ លឹម ហុង