ភ្នំពេញ៖ លោកកើត រិទ្ធ រដ្ឋមន្ត្រីក្រសួងយុត្តិធម៌ នៅថ្ងៃទី២៥ ខែវិច្ឆិកា ឆ្នាំ២០២០ បានចេញសេចក្តីណែនាំ ស្តីពីការកំណត់អាទិភាពនៃការអនុវត្តសំណើសុំការជួយផ្នែកច្បាប់ក្នុងវិស័យព្រហ្មទណ្ឌនៃក្រសួងយុត្តិធម៌។
ក្រសួងយុត្តិធម៌បានកត់សម្គាល់ឃើញថា ក្នុងនាមជាអាជ្ញាធរកណ្តាល ក្រសួងយុត្តិធម៌បានទទួល សំណើសុំការជួយផ្នែកច្បាប់ក្នុងវិស័យព្រហ្មទណ្ឌជាច្រើនពីបណ្តាប្រទេសនានា អនុលោមតាមច្បាប់ស្តីពីការជួយគ្នា ទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។ ដើម្បីធានាការអនុវត្តសំណើទាំងនោះប្រកបដោយប្រសិទ្ធភាព និង ទាន់ពេលវេលា ការកំណត់អាទិភាពនៃការអនុវត្តសំណើសុំការជួយផ្នែកច្បាប់ក្នុងវិស័យព្រហ្មទណ្ឌមានភាពចាំបាច់ និងមានសារសំខាន់។
ហេតុនេះ ក្រសួងយុត្តិធម៌សូមធ្វើការណែនាំដល់ឯកឧត្តម លោកជំទាវ លោក លោកស្រី ដែលជាមន្ត្រីទទួលបន្ទុកការងារពាក់ព័ន្ធនឹងសំណើសុំការជួយផ្នែកច្បាប់ក្នុងវិស័យព្រហ្មទណ្ឌ នៃក្រសួងយុត្តិធម៌ ឱ្យធ្វើការកំណត់អាទិភាពនៃការអនុវត្តសំណើសុំការជួយផ្នែកច្បាប់ក្នុងវិស័យព្រហ្មទណ្ឌ ដោយពិចារណាលើចំណុច សំខាន់ៗដូចខាងក្រោម៖
ក -ទំនាក់ទំនងរវាងព្រះរាជាណាចក្រកម្ពុជានិងរដ្ឋធ្វើសំណើ៖ គប្បីពិចារណាផ្តល់អាទិភាពលើ សំណើពីរដ្ឋដែលមានកិច្ចព្រមព្រៀងទ្វេភាគី ពាក់ព័ន្ធនឹងការជួយផ្នែកច្បាប់ ក្នុងវិស័យព្រហ្មទណ្ឌជាមួយព្រះរាជាណាចក្រកម្ពុជា រដ្ឋដែលធ្លាប់អនុវត្តសំណើរបស់ព្រះរាជាណាចក្រកម្ពុជាតាមគោលការណ៍បដិការ រដ្ឋដែលមានទំនាក់ទំនង កិច្ចសហប្រតិបត្តិការច្រើនជាមួយព្រះរាជាណាចក្រកម្ពុជា រដ្ឋដែលជាភាគីហត្ថលេខីនៃកិច្ចព្រមព្រៀងពាក់ព័ន្ធការជួយ ផ្នែកច្បាប់ក្នុងវិស័យព្រហ្មទណ្ឌរួមគ្នាជាមួយព្រះរាជាណាចក្រកម្ពុជា ដូចជាសន្ធិសញ្ញាស្តីពីការជួយគ្នាទៅវិញ ទៅមកផ្នែកច្បាប់ក្នុងវិស័យព្រហ្មទណ្ឌរបស់អាស៊ាន រដ្ឋដែលមានព្រំប្រទល់ជាប់ព្រះរាជាណាចក្រកម្ពុជា រដ្ឋក្នុងតំបន់ រួមគ្នាជាមួយព្រះរាជាណាចក្រកម្ពុជាជាអាទិ៍។
ខ-ប្រភេទនៃបទល្មើស ៖ គប្បីពិចារណាផ្តល់អាទិភាពលើ សំណើពាក់ព័ន្ធនឹងបទល្មើសដែលមាន លក្ខណៈធ្ងន់ធ្ងរដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ ដូចជាបទល្មើសពាក់ព័ន្ធនឹងការរំលោភបំពាន លើឬកុមារ បទល្មើសជួញដូរមនុស្ស បទល្មើសឆ្លងដែន បទល្មើសសម្អាតប្រាក់ បទល្មើសគ្រឿងញៀនជាអាទិ៍។
គ- កម្រិតនៃភាពស្មុគស្មាញនៃសំណើ ៖ គប្បីពិចារណាផ្តល់អាទិភាពលើសំណើដែលមានភាពសាមញ្ញ មិនស្មុគស្មាញពេក ហើយមិនទាមទារការចំណាយពេលវេលាច្រើនក្នុងការសិក្សាលើសំណើនោះ។
ឃ-កាលបរិច្ឆេទកំណត់នៃការអនុវត្តសំណើ៖ គប្បីពិចារណាផ្តល់អាទិភាពលើសំណើដែលកំណត់កាលបរិច្ឆេទអនុវត្តដែលមានភាពចាំបាច់ និងសមស្រប៕ដោយ៖បញ្ញាស័ក្តិ