ខេត្តក្រចេះ ៖ អំពើហិង្សារវាងបងប្អូនបង្កើតនឹងគ្នាចំនួន៣នាក់ ក្នុងពេលផឹកស៊ីជុំគ្នា ឈានដល់ការវាយតប់គ្នា ដោយជនបង្កជាបងប្រុសទាញកាំបិតកាប់ប្អូនៗ២នាក់បណ្តាលឲ្យរងរបួស ហើយត្រូវសមត្ថកិច្ចនគរបាលបានធ្វើការឃាត់ខ្លួនជនសង្ស័យម្នាក់ បញ្ជូនទៅអធិការដ្ឋាននគរបាលស្រុកសំបូរ។
បើតាមរបាយការណ៍របស់ស្នងការដ្ឋាននគរបាលខេត្តក្រចេះ បានឲ្យដឹងថា នៅយប់ថ្ងៃទី២៤ ខែវិច្ឆិកា ឆ្នាំ២០២០ វេលាម៉ោង១៩និង៤០នាទី មានករណីអំពើហឹង្សាដោយចេតនា (រវាងបងប្អូនបង្កើត) នៅចំណុចភូមិសំបូរ ឃុំសំបូរ ស្រុកសំបូរ ខេត្តក្រចេះ។ ជនសង្ស័យឈ្មោះទុំ បូរ៉ា អាយុ៣៤ឆ្នាំ មានទីលំនៅភូមិ ឃុំខាងលើ។ ចំណែកជនរងគ្រោះ ១-ឈ្មោះ ទុំ រដ្ឋា ហៅតាក់ ភេទប្រុស អាយុ៣០ឆ្នាំ រងរបួសត្រូវចំពោះផ្នែកខាងឆ្វេង។ ២-ជនរងគ្រោះឈ្មោះ ទុំ មករា ភេទប្រុស អាយុ២១ឆ្នាំ រងរបួសត្រូវចំខ្ទង់ច្រមុះ។
នៅយប់ថ្ងៃកើតហេតុ ជនដៃដល់ជាបងប្រុសស្រវឹងស្រានិងបានមកផ្ទះស្រែកជេរឡូឡា ហើយប្អូនៗបានទៅឃាត់តែមិនស្តាប់ និងថែមទាំងយកកាំបិតមកគំរាមសម្លាប់ប្អូនៗ ក៏កើតជាជម្លោះប្រតាយប្រតប់គ្នា ធ្វើអោយប្អូនប្រុសពីរនាក់របួសលើរាងកាយ។ ក្នុងម្នាក់របួសធ្ងន់ត្រង់ចង្កេះ ដោយសារមុតនិងកាំបិត និងម្នាក់ទៀតរបួសផ្ទៃមុខ។ ក្រោយបង្កហេតុជនដៃដល់ជាបងប្រុស ត្រូវបាននគរបាលព្រហ្មទណ្ឌស្រុកសំបូរ ឃាត់ខ្លួនបានភ្លាមៗ។
លោកវរសេនីយ៍ឯក ប៊ុន ឈឿន អធិការនគរបាលស្រុកសំបូរ បានឲ្យដឹងថា មុនពេលកើតហេតុបងប្អូនទាំង៣នាក់ បាននាំគ្នាផឹកស៊ីជុំគ្នា ក៏បានទាស់ពាក្យសំដី ហើយបានទាញកាំបិតប្រតាយប្រតប់គ្នា បណ្តាលឲ្យរងរបួស២នាក់ ត្រូវនាំយកទៅព្យាបាលនៅមណ្ឌលសុខភាពសំបូរ ហើយបន្ទាប់មកគ្រូពេទ្យក៏បានបញ្ជូនជនរងគ្រោះទាំង២នាក់បន្តទៅសង្គ្រោះនៅមន្ទីរពេទ្យបង្អែកខេត្តក្រចេះ ដោយមានសភាពរបួសធ្ងន់ធ្ងរ៕ដោយ៖បញ្ញាស័ក្តិ