លោក ជា ចំរើន ដែលគេធ្លាប់ស្គាល់ថាជាប្រធាន «អង្គការអភិវឌ្ឍន៍យុវជនខ្មែរ (KYDO)» និងបច្ចុប្បន្ន ត្រូវបានអ្នកលេងបណ្តាញសង្គមហ្វេសប៊ុកភាគច្រើនហៅថាលោកគ្រូៗ ថ្មីៗនេះ បានសម្រេចតែងតាំង លោក ស្រី ចំរើន ជា ប្រធានអង្គការ ដើម្បីចូលរួមអភិវឌ្ឍន៍ធនធានមនុស្ស និងរកការងារជូនយុវជនយុវនារី បន្តវេនជាតិ។
នេះបើយោងតាមទំព័រហ្វេសប៊ុករបស់លោក កាលពីថ្ងៃទី២៥ ខែវិច្ឆិកា ឆ្នាំ២០២០ ម្សិលមិញ បានបង្ហោះឲ្យដឹងថា៖ «ក្នុងនាមខ្ញុំផ្ទាល់ ជា ចំរើន និងក្រុមប្រឹក្សាភិបាលអង្គការអភិវឌ្ឍន៍យុវជនខ្មែរ (KYDO) សម្រេចតែងតាំងលោក ស្រី ចំរើន ជាប្រធានអង្គការ ដើម្បីចូលរួមអភិវឌ្ឍន៍ធនធានមនុស្ស និង រកការងារជូនយុវជនយុវនារីបន្តវេនជាតិ។ សូមបងប្អូនកូនក្មួយមេត្តាជួយគាំទ្រគាត់ក្នុងការដឹកនាំគ្រប់គ្រងអង្គការឲ្យមានប្រសិទ្ធភាពខ្ពស់ និងជោគជ័យចាប់ពីពេលនេះតទៅ»។
តែយ៉ាងណាមិញ អ្វីដែលគួរឲ្យភ្ញាក់ផ្អើលនោះ គឺការសម្រេចចិត្តនេះ ត្រូវបានធ្វើឡើងប៉ុន្មានម៉ោងប៉ុណ្ណោះ ខណៈលោក ស្រី ចំរើន ដែលធ្លាប់ប្រកាសថាខ្លួនជា តំណាងឲ្យនិស្សិត និងជាពិសេសគឺលេចធ្លោល្បីខ្លាំងក្នុងរឿងអាស្រូវសាសងស្នេហា អូនបងរវាងលោក កឹម សុខា និងនាង ខុម ចាន់ដារាទី ឬហៅថា ស្រីមុំ កាលពីអំឡុងឆ្នាំ២០១៦ ដែលកាលពីពេលថ្មីៗនេះ ស្រាប់តែបានបង្ហោះសារប្លែកៗហាក់ធ្លាក់កាលីបខ្លាំង និងបច្ចុប្បន្ន គ្មានជម្រើសអ្វីក្រៅពីចាប់យករបរជ្រក់ជើងមាន់ ដឹកតាមអនឡាញជាដើម ខណៈ ផ្ទះក៏គ្មាននៅនិងថែមទាំងថា ស្ថាប័ន និងក្រុមហ៊ុនក៏គេមិនហ៊ានទទួលឲ្យធ្វើការថែមទៀត។
គួរបញ្ជាក់ផងដែរថា អង្គការអភិវឌ្ឍន៍យុវជនខ្មែរ (KYDO) ត្រូវបានបង្កើតឡើងក្នុងខែមិថុនា ឆ្នាំ១៩៩៣ ដោយមានលោក ជា ចំរើន ជាប្រធានអង្គការ ដែលទទួលបានការប្រោសព្រះរាជទានហត្ថលេខា ដោយព្រះករុណាព្រះបាទ នរោត្ដម សីហនុ៕ ដោយ៖ លឹម ហុង
