ភ្នំពេញ៖ សមត្ថកិច្ចនគរបាលប៉ុស្តិ៍សង្កាត់ជ័យជំនះប្រចាំការគោលដៅព្រះអង្គដងកើ បានឃាត់ខ្លួនបុរសម្នាក់ជាទមិឡអត់សាសនា ដែលយកញញូរទៅវាយព្រះពុទ្ធបដិមានៅព្រះអង្គដងកើ បណ្តាលឲ្យបែកបាក់ព្រះហស្តស្តាំ កាលពីវេលាម៉ោង ២និង៣០នាទីរសៀល ថ្ងៃទី២៥ ខែវិច្ឆិកា ២០២០ ផ្លូវព្រះស៊ីសុវត្ថិ ភូមិ១ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
នគរបាលប៉ុស្តិ៍សង្កាត់ជ័យជំនះឱ្យដឹងថា ជនសង្ស័យឈ្មោះ ឡោ គឹមសួ អាយុ២៧ឆ្នាំ បានដើរមកដល់ព្រះអង្គដងកើឈរខាងក្រៅបង្អួច លើកដៃសំពះ បន្ទាប់មកបានលោតចូលតាមបង្អួចខាងត្បូង ដៃកាន់ញញួរ ធ្វើសកម្មភាពវាយទៅលើរូបសំណាកព្រះអង្គដងកើ បណ្តាលឱ្យប្រះស្រាំព្រះហស្តខាងស្តាំ ។
សមត្ថកិច្ចបន្តថា ពេលនោះឈ្មោះ ហាស់ សឿន ភេទប្រុស ជាអ្នកបម្រើការងារ ក្នុងព្រះអង្គដងកើឃើញបានស្រែកឆោឡោឡើង ស្របពេលនោះកម្លាំង សមត្ថកិច្ចប៉ុស្តិ៍ជ័យជំនះប្រចាំការគោលដៅនោះ មកដល់កន្លែងកើតហេតុអន្តរាគមន៍ឈានដល់ការបង្ក្រាប និងឃាត់ខ្លួនជនសង្ស័យ ព្រមទាំងដកហូតវត្ថុតាង ញញួរដងឈើ១ ជាឧបករណ៍ធ្វើសកម្មភាព នាំយកមកប៉ុស្តិ៍នគរបាលជ័យជំនះ ដើម្បីដំណើរការជំនាញនឹងអនុវត្តន៍នីតិវិធី ៕ដោយ៖បញ្ញាស័ក្តិ