ភ្នំពេញៈ តុលាការបើកសវនាការជំនុំជម្រះលើសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍ នៅព្រឹកថ្ងៃទី២៦ ខែវិច្ឆិកា ឆ្នាំ២០២០ នេះ។ នៅក្នុងសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍ គឺមានមនុស្សសរុបចំនួន ១៣៩នាក់ ត្រូវបានកោះឲ្យចូលខ្លួនទៅក្នុងសវនាការនៅថ្ងៃទី២៦ ខែវិច្ឆិកា ឆ្នាំ២០២០។ ក្នុងសវនាការព្រឹកនេះ គឺមានជនជាប់ចោទតែចំនួន ៣៤នាក់តែប៉ុណ្ណោះបានចូលខ្លួននៅក្នុងសវនាការតាមការកោះហៅរបស់តុលាការ។ ចំណែកលោក សម រង្ស៊ី និងបក្ខពួកចំនួន ១០៤នាក់ទៀត គឺមិនបានចូលខ្លួននៅក្នុងសវនាការននោះទេ។
លោកគុជ គឹមឡុង អ្នកនាំពាក្យសាលាដំបូងរាជធានីភ្នំពេញបានឲ្យដឹងថា សវនាការនៅព្រឹកថ្ងៃទី២៦ ខែវិច្ឆិកា នេះ គឺលើបួនសំណុំរឿង ហើយក្រុមប្រឹក្សាជំនុំជម្រះបានសម្រេចបញ្ចូលជាពីរសំណុំរឿង ដោយសំណុំរឿងទី១. គ្រោងនឹងបន្តសវនាការនៅព្រឹកថ្ងៃទី១៤ ខែមករា ឆ្នាំ២០២១ និងសំណុំរឿងទី២. បន្តសវនាការនៅថ្ងៃទី៤ ខែមីនា ឆ្នាំ២០២១។
អ្នកនាំពាក្យសាលាដំបូងរាជធានីភ្នំពេញបានបញ្ជាក់ថា នៅក្នុងសវនាការនាព្រឹកថ្ងៃទី២៦ ខែវិច្ឆិកា គឺមានជនជាប់ចោទចំនួន ៣៤នាក់ បានចូលនៅក្នុងសវនាការ។
សមាសភាពចៅក្រមជំនុំជម្រះនៅថ្ងៃទី២៦ ខែវិច្ឆិកា ឆ្នាំ២០២០ រួមមាន : លោករស់ ពិសិដ្ឋប្រធានក្រុមប្រឹក្សាជំនុំជម្រះ លោកកើតសាំង ចៅក្រមប្រឹក្សាជំនុំជម្រះ លោកអ៊ឹម វណ្ណៈ ចៅក្រមប្រឹក្សាជំនុំជម្រះ។
លោកគុជ គឹមឡុង អ្នកនាំពាក្យសាលាដំបូងរាជធានីភ្នំពេញ បានឲ្យដឹងថា លោកសម រង្ស៊ី និងបក្ខពួកជាង ១០០នាក់ ត្រូវបានចោទប្រកាន់ពីបទ “រួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍” ប្រព្រឹត្តនៅប្រទេសកម្ពុជានិងទីកន្លែងផ្សេងៗទៀតកាលពីថ្ងៃទី២០-២១-២២-២៥-២៦ និងនៅថ្ងៃទី២៧ ខែមករា ឆ្នាំ២០១៩ និងកាលពីអំឡុងខែមិថុនា ឆ្នាំ២០១៩ តាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា៕ដោយ៖CEN
