ភ្នំពេញ : ពាក់ព័ន្ធនឹងរបាយការណ៍វាស់វែងអំពីអំពើពុករលួយកម្ពុជា របស់អង្គការតម្លាភាពកម្ពុជា (TI) ដែលចេញផ្សាយនាពេលថ្មីៗនេះ ត្រូវបានប្រធានអង្គភាពប្រឆាំងអំពើពុករលួយអះអាងថា “នឹងសិក្សានូវរាល់ទិន្នន័យ ដែលអង្គការតម្លាភាពកម្ពុជា បានធ្វើការផ្សព្វផ្សាយអំពីលទ្ធផល នៃការវាស់វែងនូវអំពើពុករលួយនៅកម្ពុជាយើង ដើម្បីគួបផ្សំជាមួយលទ្ធផលនៃការសិក្សាផ្សេងៗទៀត ក៏ដូចជាលទ្ធផលនៃការសិក្សាវាស់វែង អំពើពុករលួយរបស់អង្គភាព ប្រឆាំងអំពើពុករលួយយើងផ្ទាល់”។
នៅព្រឹកថ្ងៃព្រហស្បតិ៍ ទី២៦ ខែវិច្ឆិកា ឆ្នាំ ២០២០ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រីប្រធានអង្គភាពប្រឆាំងអំពើពុករលួយបានផ្តល់បទសម្ភាសជាមួយអ្នកសារព័ត៌មានមួយ គឺលោកស្រី Anna ពាក់ព័ន្ធនឹងរបាយការណ៍វាស់វែងអំពីអំពើពុករលួយរបស់អង្គការតម្លាភាពកម្ពុជា (TI) ដែលចេញផ្សាយនាពេលថ្មីៗនេះ ។
បើតាមប្រសាសន៍តបរបស់ឯកឧត្តម ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ បានបញ្ជាក់យ៉ាងដូច្នេះថា “ខ្ញុំក៏ដូចជាអង្គភាពប្រឆាំងអំពើពុកលួយដែរ តែងតែយកចិត្តទុកដាក់ជាប្រចាំអំពីការវាស់វែងអំពើពុករលួយ ព្រោះថានេះជា ឧបករណ៍សិក្សាមួយ ដើម្បីយល់បានថា ប្រជាជនរបស់យើងគិតដូចម្តេច និងវាយតម្លៃដូចម្តេចខ្លះចំពោះអំពើពុករលួយ និងចំពោះការប្រយុទ្ធប្រឆាំងទៅលើអំពើពុករលួយ។ សម្រាប់អាណត្តិទី៣ នេះទៀត ក្រុមប្រឹក្សាជាតិប្រឆាំងអំពើពុករលួយ របស់កម្ពុជាយើងក៏បានដាក់ចេញនូវចំណុចនេះ ឱ្យលេចធ្លោមួយដើម្បីឱ្យអង្គភាពប្រឆាំងអំពើពុករលួយ យកចិត្តទុកដាក់ធ្វើការ វាស់វែងអំពីអំពើពុករលួយនេះផងដែរ”។
ឯកឧត្តម ទេសរដ្ឋមន្ត្រី បានបញ្ជាក់ថា ទន្ទឹមនឹងយើងកំពុងដំណើរការវាស់វែង អំពីអំពើពុករលួយនៅកម្ពុជារបស់យើង យើងក៏បានឃើញមានការផ្សព្វផ្សាយនូវលទ្ធផល ដែលស្ថាប័ននេះ ឬស្ថាប័ននោះរាប់ទាំងស្ថាប័នតម្លាភាពកម្ពុជាផង បានផ្សព្វផ្សាយជាសាធារណៈនូវលទ្ធផលនៃការវាស់វែង អំពីអំពើពុករលួយឆ្នាំ 2020 នេះផងដែរ។
ប្រធានអង្គភាពប្រឆាំងអំពើពុករលួយ បានមានប្រសាសន៍ថា ” ខ្ញុំផ្ទាល់បានស្តាប់ បានអានដោយយកចិត្តទុកដាក់ ព្រោះការសិក្សានេះមានការ ពាក់ព័ន្ធត្រង់ និងពាក់ព័ន្ធច្រើនចំណុចមកលើការងារដែលខ្ញុំទទួលខុសត្រូវ នៅអង្គភាពប្រឆាំងអំពើពុករលួយ។ ខ្ញុំនឹងសិក្សា នូវរាល់ទិន្នន័យដែលអង្គការតម្លាភាពកម្ពុជា បានធ្វើការផ្សព្វផ្សាយអំពីលទ្ធផល នៃការវាស់វែងនូវអំពើពុករលួយនៅកម្ពុជាយើង ដើម្បីគួបផ្សំជាមួយលទ្ធផលនៃការសិក្សាផ្សេងៗទៀត ក៏ដូចជាលទ្ធផលនៃការសិក្សាវាស់វែង អំពើពុករលួយរបស់អង្គភាព ប្រឆាំងអំពើពុករលួយយើងផ្ទាល់ផងដែរ។ ខ្ញុំគិតថា ក្រុមប្រឹក្សាជាតិប្រឆាំងអំពើពុករលួយកម្ពុជាយើង ក៏យកចិត្តទុកដាក់ទៅ លើការផ្សព្វផ្សាយនៃលទ្ធផល នៃការវាស់វែងអំពើពុករលួយ ដែលបានលេចឡើងលើបណ្តាញព័ត៌មានទាំងអស់ ដោយមិនមានការភ្លេច មិនមានការរំលងចោល ឬបោះចោលនូវលទ្ធផល នៃការវាស់វែងអំពីអំពើពុករលួយមួយណាឡើយ”៕ដោយ៖បញ្ញាស័ក្តិ
