ភ្នំពេញៈ លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា គ.ជ.ប នឹងរៀបចំការបោះឆ្នោតសាកល្បងនៅឆ្នាំ២០២១ តាមប្រព័ន្ធបច្ចេកវិទ្យាព័ត៌មាន និងបានស្នើសុំភាគីជប៉ុន បន្តជួយសម្ភារ បរិក្ខារ ដែលរួមមានកុំព្យូទ័រយួរដៃ និង Power Bank ដើម្បីបម្រើឱ្យការបោះឆ្នោតសាកល្បងតាមប្រព័ន្ធបច្ចេកវិទ្យាព័ត៌មាន នៅឆ្នាំ២០២១។
ការបញ្ជាក់នេះ បានធ្វើឡើងនៅក្នុងជំនួបពិភាក្សាលោកស្រី ហារូកូ កាម៉ី ប្រធានថ្មីរបស់អង្គការ JICA ប្រចាំកម្ពុជា កាលពីព្រឹកថ្ងៃទី២៦ ខែវិច្ឆិកា ឆ្នាំ២០២០។ ប្រធាន គ.ជ.ប បានស្នើសុំឱ្យមានកិច្ចសហការជាបន្តទៅទៀត ដោយស្នើសុំភាគីជប៉ុន បន្តជួយសម្ភារ បរិក្ខារ ដែលរួមមាន´ កុំព្យូទ័រយួរដៃ ២ពាន់គ្រឿង និង Power Bank ២ពាន់គ្រឿង ដើម្បីបម្រើឱ្យការបោះឆ្នោតសាកល្បងតាមប្រព័ន្ធបច្ចេកវិទ្យាព័ត៌មាន នៅឆ្នាំ២០២១ រួមមានៈ ការចុះឈ្មោះគណបក្សនយោបាយ និងបញ្ជីបេក្ខជន តាមប្រព័ន្ធអនឡាញ (Online) ការបូកសរុបលទ្ធផលនៃការបោះឆ្នោតតាមប្រព័ន្ធអនឡាញ (Online) ការបញ្ជូន និងការទទួលលទ្ធផលបោះឆ្នោតបឋម ការបែងចែកអាសនៈ ការស្រង់ឈ្មោះបេក្ខជនជាប់ឆ្នោត សុទ្ធតែត្រូវធ្វើតាមប្រព័ន្ធកុំព្យូទ័រ។
លោក ស៊ិក ប៊ុកហុក បានបញ្ជាក់ថា ប្រសិនបើការបោះឆ្នោតសាកល្បងក្នុងឆ្នាំ២០២១ ទទួលជោគជ័យ នោះការរៀបចំការបោះឆ្នោតនៅឆ្នាំ២០២២ និងឆ្នាំ២០២៣ ដោយប្រើប្រព័ន្ធបច្ចេកវិទ្យាទំនើបក៏ទទួលបានជោគជ័យដែរ ដែលធ្វើឱ្យគ្រប់ភាគីទទួលយកលទ្ធផលនៃការបោះឆ្នោតដែលរៀបចំដោយ គ.ជ.ប ដោយយើងទាំងអស់គ្នាបានដឹងហើយថា ការបោះឆ្នោត គឺជាស្នូលនៃលទ្ធិប្រជាធិបតេយ្យ ដូច្នេះបើយើងរៀបចំការបោះឆ្នោតបានល្អ នោះលទ្ធិប្រជាធិបតេយ្យកាន់តែល្អ និងរឹងមាំនៅកម្ពុជា បំណងប្រាថ្នាដ៏ធំរបស់ប្រធាន គ.ជ.ប គឺត្រូវធ្វើឱ្យទាល់តែបានការបោះឆ្នោតមួយប្រកបដោយសេរី ត្រឹមត្រូវ និងយុត្តិធម៌ ក្នុងនោះគឺអ្នកដែលគ្រប់អាយុ ១៨ឆ្នាំឡើងទៅ នៅពេលដែលបានបំពេញលក្ខខណ្ឌត្រឹមត្រូវស្របតាមច្បាប់ត្រូវតែមានឈ្មោះក្នុងបញ្ជីបោះឆ្នោត ហើយសំឡេងឆ្នោតត្រូវតែរាប់ឱ្យបានត្រឹមត្រូវជាទីបំផុត។ លទ្ធផលនៃការបោះឆ្នោតទាំង ៣ដំណាក់កាល (លទ្ធផលបឋម បណ្ដោះអាសន្ន និងផ្លូវការ) មិនត្រូវខុសគ្នាជាដាច់ខាត។
ប្រធាន គ.ជ.ប ក៏បានស្នើសុំជំនាញការ ៣រូប លើផ្នែកច្បាប់ បច្ចេកទេស និងផ្នែកបណ្ដុះបណ្ដាល និងអប់រំអ្នកបោះឆ្នោត។
ជាការឆ្លើយតប លោកស្រី ហារូកូ កាម៉ី នាយិកាអង្គការ JICA បានមានប្រសាសន៍ថា លោកស្រីមានកិត្តិយសណាស់ ដែលលោកស្រីមានឱកាសបានជួបសម្ដែងការគួរសមជាមួយនឹង គ.ជ.ប ជាពិសេសប្រធានគ.ជ.ប និងគណៈប្រតិភូ។
លោកស្រីបានធ្វើការវាយតម្លៃខ្ពស់ចំពោះកិច្ចសហប្រតិបត្តិការយ៉ាងស្អិតរមួត និងស្និទ្ធស្នាលជាទីបំផុត រវាងអ្នកជំនាញការជប៉ុន និង គ.ជ.ប ហើយលោកស្រីទទួលស្គាល់ថា ការបោះឆ្នោតគឺជាស្នូលនៃលទ្ធិប្រជាធិបតេយ្យ ហើយលោកស្រីក៏ជឿជាក់ថា គ.ជ.ប នឹងរៀបចំការបោះឆ្នោតបន្តទៀតដោយសេរី ត្រឹមត្រូវ និងយុត្តិធម៌។
ពាក់ព័ន្ធនឹងសំណើរបស់ គ.ជ.ប បើតាមប្រធានថ្មីរូបនេះបានឱ្យដឹងថា អង្គការ JICA បានទទួលរួចហើយកាលពីខែសីហា ឆ្នាំ២០២០ ដែល គ.ជ.ប បានដាក់តាមរយៈក្រុមប្រឹក្សាអភិវឌ្ឍន៍កម្ពុជា (CDC)។ ដោយសារអង្គការ JICA ជាអង្គការអនុវត្តជំនួយឥតសំណងរបស់ប្រទេសជប៉ុន ដូចនេះលោកស្រីនៅតែបន្តការអនុវត្តតាមគោលការណ៍របស់រដ្ឋាភិបាលជប៉ុន ក៏ដូចជាការងាររបស់ស្ថានទូតជប៉ុនប្រចាំកម្ពុជាផងដែរ។
សម្រាប់សំណើនេះ លោកស្រីពុំទាន់បានទទួលព័ត៌មានលម្អិតនៅឡើយទេ ពីព្រោះត្រូវរង់ចាំការសម្រេចពីរដ្ឋាភិបាលជប៉ុន ហើយលោកស្រីនឹងផ្ដល់ព័ត៌មានជាបន្តបន្ទាប់ដល់ គ.ជ.ប ប្រសិនបើទទួលបានចម្លើយវិជ្ជមាននៃសំណើនោះ បន្ទាប់មកលោកស្រីស្នើសុំឱ្យមានជំនួបក្នុងក្របខ័ណ្ឌបច្ចេកទេស ដើម្បីពិនិត្យមើលសំណើនេះ ពីព្រោះថាកន្លងមកជប៉ុនបានជួយរួចហើយពាក់ព័ន្ធនឹងការងារមួយចំនួនដូចជា ការចុះឈ្មោះបោះឆ្នោត ដូច្នេះត្រូវពិនិត្យមើលឡើងវិញនូវអ្វីដែលត្រូវជួយជាបន្តទៀតតាមលក្ខណៈបច្ចេកទេស៕
ដោយ៖CEN
