ស្ត្រីជនជាតិម៉ាឡេស៊ីម្នាក់អាយុ ៣៤ ឆ្នាំ បានធ្វើឲ្យគ្រប់គ្នាមានការហួសចិត្តយ៉ាងខ្លាំង បន្ទាប់ពីបានដឹង នាងបានផ្លាស់ប្តូរគំនិតពីការធ្វើអត្តឃាតខ្លួនឯងវិញ ក្រោយពីបានលោតចុះទឹកស្រាប់តែនាងបានឃើញ “ក្រពើ” ដ៏ធំមួយក្បាលនៅក្នុងទន្លេ ។ ហេតុការណ៍បង្កការភ្ញាក់ផ្អើលនេះបានកើតឡើងកាលពីថ្ងៃទី២៣ ខែវិច្ឆិកា ឆ្នាំ ស្ថិតនៅឯក្បែរស្ពានមួយកន្លែង នៅក្នុងតំបន់ Jalan Dato Mohd Sidin នៃទីក្រុង Klang។
យោងតាម Kosmo នារីជាវិស្វករម្នាក់មកពីក្រុមហ៊ុនឯកជនមួយ ត្រូវបានដឹងថា នាងកំពុងទទួលនូវភាពតានតឹងផ្លូវចិត្តជាខ្លាំង ហើយនាងក៏បានសម្រេចចិត្តទៅកាន់ស្ពាន ដើម្បីធ្វើអត្តឃាតលោតចូលក្នុងទឹកទន្លេ។ តែទោះយ៉ាងណា នាងបានអះអាងថា បានប្តូរចិត្តវិញ បន្ទាប់ពីបានឃើញក្រពើដ៏ធំ១ក្បាល និងបានហែលស្រវេស្រវ៉ាមកច្រាំងទន្លេ ហើយក៏ត្រូវបានអ្នកដំណើរជួយសង្គ្រោះផងដែរ។
ទន្ទឹមនោះផងដែរ អធិការប៉ូលិសស្រុក South Klang លោក Shamsul Amar Ramli បាននិយាយថា នាយកដ្ឋានរបស់លោកបានទទួលការហៅជាបន្ទាន់ពីបុរសម្នាក់ ដែលនិយាយថាមានស្ត្រីម្នាក់បានលោតចូលទន្លេក្នុងតំបន់នោះនៅម៉ោងប្រហែល ៦ និង ៥៧ ល្ងាច។ ប៉ុន្តែ ទោះយ៉ាងណា ខណៈប៉ូលីសបានទៅដល់កន្លែងកើតហេតុ គេក៏បានឃើញស្ត្រីនោះស្ថិតក្នុងសម្លៀកបំពាក់សើមជោគ នៅក្បែរផ្លូវក្បែរកន្លែងកើតហេតុ នាវេលាម៉ោង ១១ និង ៣០ យប់ និងពុំមានរងរបួសអ្វីនោះទេ។
តាមរយៈការស៊ើបអង្កេតដំបូង ប៉ូលីសបានរកឃើញថា ស្ត្រីដែលនៅលីវនោះ កំពុងមានអារម្មណ៍តានតឹងផ្លូវចិត្តជាខ្លាំង ប៉ុន្តែ នាងពុំបានប្រាប់ពីមូលហេតុនោះទេ៕ ដោយ៖ លឹម ហុង
