បាត់ដំបង៖មុខសញ្ញាដែលសមត្ថកិច្ចធ្វើការ បង្ក្រាប និងឃាត់ខ្លួននា ពេលនេះជាមុខសញ្ញាចាស់ធ្លាប់ធ្វើសកម្មភាព ល្មើសកន្លងមកហើយ ក៏ធ្លាប់ជាប់ពន្ធនាគារចំនួន៣លើករួចមកហើយ ។
កាលពីថ្ងៃទី ២៦ ខែវិច្ឆិកា ឆ្នាំ២០២០ អនុវត្តតាមបទបញ្ជារបស់លោកឧត្តមសេនីយ៍ត្រី សាត គឹមសាន ស្នងការនៃស្នងការដ្ឋាននគរ បាលខេត្តបាត់ដំបង និងស្របតាមការសម្របសម្រួលលើនីតិវិធីពីឯកឧត្តម គឺ ប៊ុណ្ណារ៉ា ព្រះរាជអាជ្ញាអមសាលាដំបូងខេត្តបាត់ដំបង និងដោយអនុវត្តតាមយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាន បានដឹកនាំ កម្លាំងក្រុមអន្តរាគមន៍ បង្ការបង្ក្រាបស្រាវជ្រាវនិងចុះប្រតិបត្តិការបង្ក្រាបករណី លួចមានស្ថានទម្ងន់ទោស ( កាច់សោយកម៉ូតូ ) ១ ករណីនៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង ដោយបានធ្វើ ការឃាត់ខ្លួនជនសង្ស័យចំនួន២នាក់ ជាមុខសញ្ញាចាស់គឺ៖ ១-ឈ្មោះ ជា ចាន់ថន ភេទប្រុស អាយុ ៣៥ឆ្នាំ បច្ចុប្បន្នស្នាក់នៅបន្ទប់ជួលភូមិអូរខ្ជាយ សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ។ ២-ឈ្មោះ ជា ចាន់ថុល ភេទប្រុស អាយុ ៣១ឆ្នាំ បច្ចុប្បន្នស្នាក់នៅបន្ទប់ជួលភូមិអូរខ្ជាយ សង្កាត់ ព្រែកព្រះស្តេច ក្រុងបាត់ដំបង ខេត្តបាត់ដំបង ។ វត្ថុតាងដកហូតរួមមាន ៖ ១- ម៉ូតូ ១ គ្រឿងម៉ាក ហុងដាឌ្រីម សេ ១២៥ ពណ៌ខ្មៅស៊េរីឆ្នាំ២០១៨ លេខតួ ៥២៦៥០២០ លេខម៉ាស៊ីន ៥២៦៥០២០ ពាក់ផ្លាកលេខបាត់ដំបង 1AD 8405 ( ជាម៉ូតូរបស់ជន រងគ្រោះ ) ។ ២- ម៉ូតូ ១ គ្រឿងម៉ាក ស៊ូស៊ូគី ស្មាស់វី ពណ៌ក្រហម ស៊េរីឆ្នាំ ២០១១ ពាក់ផ្លាកលេខ ភ្នំពេញ 1BA 6367 ( ជាម៉ូតូជនសង្ស័យជិះធ្វើសកម្មភាព ) ។
លោកវរសេនីយ៍ឯក ឈឿង គឹមសុង បានបញ្ជាក់ថា មុខសញ្ញាដែលសមត្ថកិច្ចធ្វើការ បង្ក្រាប និងឃាត់ខ្លួននាពេលនេះ ជាមុខសញ្ញាចាស់ធ្លាប់ធ្វើសកម្មភាពល្មើសកន្លងមក ហើយក៏ធ្លាប់ជាប់ពន្ធនាគារចំនួន៣លើករួចមក ហើយបើគិតទាំងលើកនេះផង គឺគាត់ត្រូវជាប់ពន្ធនាគារចំនួន៤លើក។
នៅពេលនេះ ការិយាល័យជំនាញកំពុងតែធ្វើការកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបង ចាត់ការបន្តតាមនីតិវិធី ៕ដោយ៖បញ្ញាស័ក្តិ