នេះបើយោងតាមទំព័រហ្វេសប៊ុកលោក ផែង វណ្ណៈ បានបង្ហោះនូវរឿងរ៉ាវនៃក្តីឈឺចាប់របស់ស្ត្រីជាប្រពន្ធដើមដ៏កម្សត់ម្នាក់ នៅថ្ងៃទី២៨ ខែវិច្ឆិកា ឆ្នាំ២០២០ នេះឲ្យដឹងថា “នៅវេលាម៉ោង ១២ ថ្ងៃត្រង់ថ្ងៃទី២៨ ខែវិច្ឆិកាឆ្នាំ២០២០ ប្អូនស្រី ស៊ូ សុវណ្ណ ជាប្រជាពលរដ្ឋស់នៅភូមិក្បៀរ ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ បានមកដល់ផ្ទះខ្ញុំ គ្រាន់តែឃើញខ្ញុំបើកឡានចូលផ្ទះភ្លាម គាត់រត់ចូលមកតាមក្រោយ ហើយលុតជង្គង់យំសំពះអង្វរសុំឲ្យខ្ញុំជួយ ព្រោះប្អូនស្រីជួបរឿងឈឺចាប់ខ្លាំង ទាំងផ្លូវកាយនិងផ្លូវចិត្ត ។
ប្អូនស្រីបាននិយាយថា ដោយក្ដីឈឺចាប់ខ្លាំងពេក ប្អូនស្រីចង់សម្លាប់ខ្លួនម្ដងៗហើយ តែមុននឹងសម្លាប់ខ្លួន ប្អូន ស្រីតាមរកជួបខ្ញុំសិន ។ ពេលបានជួបខ្ញុំ ប្អូនស្រីថា មានសង្ឃឹមខ្លះហើយ ។ ហ៊ឹម ពេលលឺប្អូនស្រីនិយាយបែបនេះ ធ្វើឲ្យខ្ញុំស្រក់ទឹកភ្នែក ដោយមិនដឹងខ្លួន តែខ្ញុំប្រឹងទប់ទឹកភ្នែកមិនឲ្យហូរ ដើម្បី កុំឲ្យប្អូនស្រីមើលមកខ្ញុំថាជាមនុស្សទន់ខ្សោយធ្វើឲ្យគាត់អស់សង្ឃឹម ។
ប្អូនស្រីបានរៀបការជាមួយប្ដី ឈ្មោះ លី ប៊ុនឈឿន នៅឆ្នាំ២០០៧ តាមប្រពៃណី បានកូន២នាក់ កូនបងអាយុ ១២ឆ្នាំ កូនប្អូនអាយុ៥ឆ្នាំ ។ ដោយប្ដីមានស្រី ចេះតែវាយធ្វើបាបខ្លាំងពេក ប្អូនស្រីទ្រាំមិនបានក៏ដាក់ពាក្យសុំលែងលះ ទៅសាលាដំបូងខេត្តកំពង់ស្ពឺ ។ នៅឆ្នាំ២០១៩ ចៅក្រមសាលាដំបូងខេត្តកំពង់ស្ពឺ បានសម្រេចឲ្យប្អូនស្រី និងប្ដីលែងលះគ្នា និងបានប្រគល់កូនទាំងពីរឲ្យប្អូនស្រី មើលថែ និងបានសម្រេចបែងចែកទ្រព្យសម្បត្តិជាពីរចំណែកស្មើគ្នា ។ ខាងប្ដីមិនព្រមក៏ប្ដឹងបន្តទៅឧទ្ធរណ៍។ ប្អូនស្រីបញ្ជាក់ថា ពេលប្ដីមានស្រី គាត់បានបណ្ដេញប្អូនស្រីជាប្រពន្ធដើមចេញពីផ្ទះ ហើយនាំស្រីមកនៅលើផ្ទះតែម្ដង ។
ដោយគ្មានសម្ភារប្រើប្រាស់ នៅថ្ងៃមួយប្អូនស្រីបានទូរស័ព្ទទៅប្ដី ដើម្បីសុំយកអីវ៉ាន់ប្រើប្រាស់ខ្លះ តែខាងប្ដី មិនព្រមឲ្យហើយគំរាមប្ដឹងចាប់ដាក់គុក បើហ៊ានមកយក ។ ពេលនោះក្នុងនាមជាម្ចាស់ផ្ទះម្ចាស់ទ្រព្យ ប្អូនស្រី បានមកយកអីវ៉ាន់មួយចំនួន ដោយបានហៅមេភូមិ មេនគរបាលប៉ុស្តិ៍មកធ្វើសាក្សីផង ។ ក្រោយមកប្ដីប្ដឹងថា លួច តំណាងអយ្យការអមសាលាដំបូងខេត្តកំពង់ស្ពឺ ក៏ចោទប្រកាន់បញ្ជូនទៅចៅក្រមស៊ើបសួរ ។
ប្អូនស្រីបានសំណូមពរឲ្យថ្នាក់ដឹកនាំ និងស្ថាប័នពាក់ព័ន្ធមេត្តាជួយរកយុត្តិធម៌ឲ្យប្អូនស្រីផង ព្រោះប្អូនស្រីគ្មានជំនឿលើតុលាការខេត្តកំពង់ស្ពឺទេ»៕ ដោយ៖ លឹម ហុង