ភ្នំពេញ៖ បន្ទាប់ពីរកឃើញវិជ្ជមានវីរុសកូវីដ១៩ លើស្ត្រីខ្មែរម្នាក់ ដែលបានចូលទៅកាន់ផ្សារអ៊ីអន១ ដើម្បីញ៉ាំអាហារ និងទិញអីវ៉ាន់ រាជរដ្ឋាភិបាល បានសម្រេចបិទផ្សារនេះ ជាបណ្តោះអាសន្ន ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងប្រាប់កាសែតក្នុងស្រុកនាយប់ថ្ងៃទី២៨ ខែវិច្ឆិកា ឆ្នាំ២០២០នេះថា ស្ត្រីខ្មែររូបនេះ ត្រូវបានធ្វើតេស្តឃើញថា មានវិជ្ជមានមេរោគកូវីដ១៩ នៅល្ងាចថ្ងៃទី២៨ ខែវិច្ឆិកា ឆ្នាំ២០២០នេះ បន្ទាប់ពីរូបគាត់ចេញរោគសញ្ញាសង្ស័យ ហើយភ្លាមៗនេះក្រសួងសុខាភិបាល ក៏បាន និងកំពុងស្វែងរកអ្នកពាក់ព័ន្ធជាមួយគាត់នៅក្នុងផ្សារអ៊ីអន១ ដើម្បីយកមកធ្វើតេស្ត និងធ្វើចត្តាឡីស័កផងដែរ។ ការសម្រេចបិទផ្សារអ៊ីអន១ រយៈពេលប៉ុន្មានថ្ងៃសិន ដើម្បីតាមដានរកអ្នកពាក់ព័ន្ធមកធ្វើតេស្ត និងទប់ស្កាត់ការចម្លងមេរោគកូវីដ១៩ បន្តទៀត។
លោកស្រី បានបញ្ជាក់ថា ស្ត្រីដែលមានផ្ទុកមេរោគកូវីដនោះ រស់នៅក្នុងបុរីប៉េងហួត ផ្លូវ៦០ម៉ែត្រ។
លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធជំងឺឆ្លង បានប្រាប់ថា ពិតជាមានការបិទផ្សារអ៊ីអន១ ជាបណ្តោះអាសន្ន ពិតប្រាកដមែន បន្ទាប់ពីលទ្ធផលតេស្តវិជ្ជមានលើស្ត្រីខ្មែរម្នាក់នៅថ្ងៃនេះ ហើយដែលគាត់បានទៅផ្សារនេះ។
លោកបញ្ជាក់ថា ករណីស្រ្តីរូបនេះគឺឆ្លងវីរុសនេះពីណានោះទេ ប៉ុន្តែស្ត្រីរូបនេះត្រូវបានរកឃើញថា វិជ្ជមានមេរោគកូវីដ-១៩ នៅល្ងាចថ្ងៃទី២៨ ខែវិច្ឆិកា ឆ្នាំ២០២០នេះ បន្ទាប់ពីរូបគាត់ចេញរោគសញ្ញាសង្ស័យ ហើយភ្លាមៗនេះក្រសួងសុខាភិបាល ក៏បាន និងកំពុងស្វែងរកអ្នកពាក់ព័ន្ធជាមួយគាត់នៅក្នុងផ្សារអ៊ីអន១ ដើម្បីយកមកធ្វើតេស្ត និងធ្វើចត្តាឡីស័កផងដែរ៕ដោយ៖បញ្ញាស័ក្តិ