ភ្នំពេញ ៖ លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានថ្លែងឲ្យដឹងថា ក្រុមគ្រូពេទ្យបានបង្ហាញលទ្ធផលធ្វើតេស្ត រកឃើញ៤ករណីទៀតវិជ្ជមានវីរុសកូវីដ ជាប់ពាក់ព័ន្ធនឹងក្រុមគ្រួសារលោក ឆែម សាវុធ អគ្គនាយកពន្ធនាគារ ដែលរស់នៅជាមួយគ្នានៅក្នុងបុរីប៉េងហួត ផ្លូវ៦០ម៉ែត្រ សរុប៦នាក់។ មន្ទីរពិសោធន៍បាននិងកំពុងធ្វើតេស្តជាប់រហូត និងបង្ហាញលទ្ធផលបន្តបន្ទាប់។
លោកស្រីរដ្ឋលេខាធិការ បានបន្ថែមថា នៅព្រឹកថ្ងៃទី២៩ ខែវិច្ឆិកា ក្រុមគ្រូពេទ្យដាក់ពង្រាយ៥ក្រុម នៅផ្សារអ៉ីអន, គេហដ្ឋានសម្តេចក្រឡាហោ ស ខេង, ក្រសួងមហាផ្ទៃ ពន្ធនាគារព្រៃស និងនៅខេត្តសៀមរាប ព្រមទាំងស្វែងរកអ្នកជាប់ពាក់ព័ន្ធ។
អគ្គនាយកពន្ធនាគារ លោក ឆែម សាវុធ ដែលត្រូវជាប្តីរបស់ស្ត្រីមានផ្ទុកមេរោគកូវីដ១៩ ក៏ត្រូវបានពិនិត្យសុខភាពរកឃើញវិជ្ជមានកូវីដ១៩។
ក្រសួងសុខាភិបាល បានចេញសេចក្តីប្រកាសព័ត៌មានថា មានករណីជាសះស្បើយ ចំនួន ០២នាក់ – បុរសជនជាតិខ្មែរអាយុ ៥៩ឆ្នាំ មានអាសយដ្ឋាននៅសង្កាត់កំបូល ខណ្ឌកំបូល រាជធានីភ្នំពេញ បានធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី ១៩ ខែវិច្ឆិកា ឆ្នាំ២០២០ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុស កូវីដ-១៥ ចំនួន ០២ដង និងត្រូវបានអនុញ្ញាតឲ្យចេញពីមណ្ឌលសុខភាពចាក់អង្រែ រាជធានីភ្នំពេញ ។
– បុរសជនជាតិខ្មែរ អាយុ ៣១ឆ្នាំ ជាអង្គរក្សការពារផ្ទាល់ជូនគណៈប្រតិភូហុងគ្រី ក្នុងព្រឹត្តិការណ៍ ៣វិច្ឆិកា មានអាសយដ្ឋាន សង្កាត់អូរបែកក្អម ខណ្ឌសែនសុខ រាជធានីភ្នំពេញ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន ០២ដង និងត្រូវបានអនុញ្ញាតឲ្យ ចេញពីមន្ទីរពេទ្យមិត្តភាពខ្មែរ-សូវៀត។
មានករណីវិជ្ជមានវីរុសកូវីដ-១៩ថ្មី ៖ ចំនួន ០៧នាក់ – ស្ត្រីជនជាតិខ្មែរអាមេរិកកាំង អាយុ ៣១ឆ្នាំ មានអាសយដ្ឋានស្នាក់នៅក្រុងប៉ៃលិន ខេត្តប៉ៃលិន ធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី២៧ ខែវិច្ឆិកា ឆ្នាំ២០២០ លទ្ធផលធ្វើតេស្កវត្ថុសំណាករបស់បុគ្គលខាងលើ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺ វិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាលនៅ មណ្ឌលសុខភាពចាក់អង្រែ រាជធានីភ្នំពេញ។សូមកត់សម្គាល់ថា៖ អ្នកដំណើរតាមយន្តហោះជាមួយអ្នកជំងឺខាងលើ សរុបមានចំនួន ៥៧នាក់ ដែលនៅក្នុងចំនួននេះ មានបុគ្គលខាងលើនេះផងដែរ។ រីឯអ្នកដំណើរចំនួន ៥៦នាក់ ដែលមានលទ្ធផលតេស្តអវិជ្ជមានវីរុសកូវីដ-១៩ នោះ ត្រូវបានដាក់ឲ្យធ្វើចត្តាឡីស័កចំនួន ១៤ថ្ងៃ នៅសណ្ឋាគារមួយក្នុង រាជធានីភ្នំពេញចំនួន ១៩នាក់ សណ្ឋាគារមួយទៀតក្នុងរាជធានីភ្នំពេញចំនួន ២២នាក់ នៅស្ថានទូតរុស្ស៊ី ចំនួន ១០នាក់ និងនៅស្ថានទូតចិន ០៥នាក់។
– ស្ត្រីជនជាតិខ្មែរអាយុ ៥៦ឆ្នាំ មានអាសយដ្ឋាននៅសង្កាត់ជ្រាវ ក្រុងសៀមរាប ខេត្តសៀមរាបនិងនៅបុរីប៉េងហួត ផ្លូវ៦០ម៉ែត រាជធានីភ្នំពេញ ដែលគាត់មានអាការៈមិនស្រួលខ្លួន (មានចេញរោគសញ្ញាផ្តាសាយចំនួន ៣ថ្ងៃ) ក៏បានទៅមន្ទីរពេទ្យមិត្តភាពខ្មែរ-សូវៀតនៅថ្ងៃទី២៨ ខែវិច្ឆិកា ឆ្នាំ២០២០ដើម្បីពិនិត្យជំងឺ ហើយត្រូវបានគ្រូពេទ្យយកវត្ថុសំណាករបស់គាត់ទៅពិនិត្យ ដែលលទ្ធផលវិភាគផ្ដល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺ វិជ្ជមានវីរុសកូវីដ-១៩ ហើយបច្ចុប្បន្ន អ្នកជំងឺត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ – ស្វាមីស្ត្រីអាយុ៥៦ឆ្នាំខាងលើ ជាអគ្គនាយកពន្ធធនាគារនៃក្រសួងមហាផ្ទៃ រួមជាមួយសមាជិក គ្រួសារចំនួន ០៤នាក់ទៀតដែលនៅផ្ទះជាមួយគ្នា (ស្ត្រីអាយុ ៣៦ឆ្នាំ, កុមារ៉ាអាយុ ១២ឆ្នាំ, បុរសអាយុ ៣៦ឆ្នាំ, និងបុរសអាយុ ៣០ឆ្នាំ) បានធ្វើតេស្តវត្ថុសំណាក ដោយទទួលបានលទ្ធផលវិជ្ជមានវីរុសកូវីដ-១៩ ពីវិទ្យាស្ថាន ប៉ាស្ទ័រកម្ពុជា ហើយបច្ចុប្បន្ន ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
វិធានការ និងការណែនាំរបស់ក្រសួងសុខាភិបាល គឺក្រសួងសុខាភិបាល សូមជម្រាបជូនដល់អ្នកដែលប៉ះពាល់ជាមួយអ្នកជំងឺ (ស្វាមី និងភរិយា ព្រមទាំងក្រុមគ្រួសារ ០៤នាក់) ខាងលើទាំងអស់ ចាំបាច់ត្រូវធ្វើចត្តាឡីស័កចំនួន ១៤ថ្ងៃនៅតាមផ្ទះ របស់ខ្លួនឲ្យបានត្រឹមត្រូវ និងនៅមណ្ឌលចត្តាឡីស័កនៅខេត្តសៀមរាប ខេត្តស្ទឹងត្រែង ខេត្តមណ្ឌលគីរី និងខេត្តបន្ទាយមានជ័យ (សម្រាប់អ្នកដែលប៉ះពាល់នៅតាមខេត្ត) និងអនុវត្តន៍ទៅតាមសារសំឡេងណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាយប់ថ្ងៃទី២៨ ខែវិច្ឆិកា ឆ្នាំ២០២០ និងរបស់ក្រសួងសុខាភិបាលឲ្យបានហ្មត់ចត់ជា ទីបំផុត ហើយកុំដើរចេញក្រៅផ្ទះ ឬចេញពីមណ្ឌលចត្តាឡីស័ក ក្នុងអំឡុងពេលធ្វើចត្តាឡីស័កនេះឲ្យសោះ ដើម្បីទប់ស្កាត់ការចម្លងវីរុសដ៏កាចសាហាវនេះ ពីមនុស្សម្នាក់ទៅម្នាក់ និងកុំឲ្យមានការ រាតត្បាតទ្រង់ទ្រាយធំនៅក្នុងសហគមន៍។ អាជ្ញាធរថ្នាក់ក្រោមជាតិ និងមន្ទីរសុខាភិបាលខេត្តដែលពាក់ ព័ន្ធ ត្រូវបន្តរុករកស្រាវជ្រាវរកអ្នកប៉ះពាល់ និងធ្វើការតាមដានការងារធ្វើចត្តាឡីស័កចំនួន ១៤ថ្ងៃនេះ ជាបន្តទៀត ដើម្បីទប់ស្កាត់ការចម្លងវីរុសកូវីដ-១៩ បន្តគ្នា ក្នុងលក្ខណៈទ្រង់ទ្រា យធំនៅសហគមន៍ផងដែរ។ រីឯផ្សារទំនើបអីអនទី១ ត្រូវបានបិទជាបណ្តោះអាសន្នក្នុងរយៈពេល ២-៣ថ្ងៃសិន ដើម្បីធ្វើការស្រាវជ្រាវរកអ្នកប៉ះពាល់។
ដោយឯកឧត្តមអគ្គនាយកពន្ធធនាគារនៃក្រសួងមហាផ្ទៃ មានការជួបប្រជុំជាមួយថ្នាក់ដឹកនាំជាន់ខ្ពស់មួយចំនួននៅសប្តាហ៍កន្លងទៅនេះ និងដោយសារអ្នកជំងឺមានប្រវត្តិ ធ្វើដំណើរទៅខេត្តសៀមរាប និងទៅទីកន្លែងផ្សេងៗទៀត ដូចជាផ្សារទំនើបអ៊ីអនទី១ រាជធានីភ្នំពេញ និងខេត្តបន្ទាយមានជ័យ ជាដើម ហើយអ្នកប៉ះពាល់ផ្ទាល់មួយចំនួន ក៏បានធ្វើដំណើរទៅខេត្តស្ទឹងត្រែង ខេត្តមណ្ឌលគីរី និងអាចមានខេត្តផ្សេងៗទៀត (កំពុងស្រាវជ្រាវបន្ត) នៅក្នុងរយៈពេលមួយសប្តាហ៍កន្លងទៅនេះ ក្រសួងសុខាភិបាល បានរៀបចំក្រុមការងារយកវត្ថុសំណាក ហើយសូមអំពាវនាវដល់បុគ្គលទាំងអស់ដែលបានពាក់ព័ន្ធ ឬបានប្រាស្រ័យទាក់ទងជាមួយអ្នកជំងឺខាងលើ សូមអញ្ជើញមកធ្វើតេស្តនៅបរិវេណក្រសួងមហាផ្ទៃ នៅបរិវេណផ្សារទំនើបអ៊ីអនទី១រាជធានីភ្នំពេញ និងនៅពន្ធធនាគារព្រៃស ចាប់ពីម៉ោង ០៧និង៣០នាទីព្រឹកនៃថ្ងៃទី២៩ ខែវិច្ឆិកា ឆ្នាំ២០២០។ ដោយឡែក ក្រុមការងារក្រសួង នឹងយកវត្ថុសំណាកនៅកន្លែងផ្សេងៗទៀត ក្នុងករណីចាំបាច់។ រីឯអ្នកដែលពាក់ព័ន្ធនឹងអ្នកជំងឺនៅខេត្តសៀមរាប សូមអញ្ជើញទៅធ្វើតេស្តនៅសាលាគរុកោសល្យ ខេត្តសៀមរាប ចាប់ពីថ្ងៃទី២៩ ខែវិច្ឆិកា ឆ្នាំ២០២០ វេលាម៉ោង ០៧និង៣០ព្រឹក ដែលរៀបចំដោយមន្ទីរសុខាភិបាលខេត្តសៀមរាប។ នៅតាមបណ្តាខេត្តពាក់ព័ន្ធ សូមអញ្ជើញធ្វើទំនាក់ទំនងជាមួយមន្ទីរសុខាភិបាលខេត្ត ដើម្បីធ្វើតេស្ត បានទាន់ពេលវេលាជាការចូលរួមទាំងអស់គ្នាក្នុងការកាត់ផ្ដាច់ការចម្លង វីរុសកូវីដ-១៩ បន្តគ្នានៅសហគមន៍ផងដែរ។
សម្រាប់បងប្អូនប្រជាពលរដ្ឋទូទៅ សូមបន្តការរស់នៅធម្មតាតាមបែបគន្លងថ្មី ដោយពាក់ម៉ាស់ (ក្នុងករណីចាំបាច់) ជាពិសេសនៅក្នុងកាលៈទេសៈនេះ សូមមើលការខុសត្រូវកូនចៅខ្លួនដោយកុំឲ្យដើរចេញក្រៅផ្ទះរហេតរហូតបើមិនចាំបាច់ តែបើអាក់ខានមិនបាននោះ នៅពេលចេញដើរ ត្រូវពាក់ម៉ាស់ជាប់ជានិច្ច ហើយសូមកុំឲ្យមានការជួបជុំគ្នាកុះករច្រើនពេក (កាត់បន្ថយជាអតិបរិមានូវចំនួនមនុស្ស ជួបជុំគ្នា) ត្រូវលាងសម្អាតដៃជាមួយសាប៊ូ និងទឹកស្អាត ឬជាមួយអាល់កុល ឬទឹកដែលសម្រាប់លាងដៃ ឲ្យបានញឹកញាប់ កុំយកដៃដែលមិនបានលាងសម្អាត មកប៉ះផ្ទៃមុខមាត់របស់ខ្លួន និងត្រូវរក្សាសុវត្ថិ ភាពសង្គម និងសុវត្ថិភាពបុគ្គលឲ្យលើសពីមួយម៉ែត្រកន្លះឡើងទៅជាចាំបាច់។ ពេលនេះ ជាដំណាក់កាលសំខាន់បំផុត ដែលប្រជាជនទាំងអស់ សូមចូលរួមសាមគ្គីគ្នាក្នុងការអនុវត្តន៍វិធានការសុខាភិបាល ដ៏ មានសារសំខាន់នេះ ដើម្បីទប់ស្កាត់ការចម្លងរាលដាលក្នុងសហគមន៍ក្នុងទ្រង់ទ្រាយធំ និងដើម្បីបងប្អូនអាចបន្តការរស់នៅជាធម្មតាតាមបែបគន្លងថ្មី។ សូមកុំភ្លេចវីរុសកូវីដ-១៩ ព្រោះវីរុសកូវីដ-១៩ មិនទាន់ទៅណាឆ្ងាយពីយើងនៅឡើយទេ ហើយវីរុសដ៏កាចសាហាវនេះ ក៏មិនភ្លេចយើងដែរ បើយើងធ្វើប្រហែស វីរុសកាចសាហាវនេះ នឹងវ៉ៃលុកសរីរាង្គកាយយើងហើយ។ ដូច្នេះ មានតែវិធីការពារខ្លួនឲ្យបាន ខ្ជាប់ខ្ជួនតាមការណែនាំខាងលើនេះទេ ដែលអាចជួយទប់ស្កាត់បានជាអតិបរិមានូវការចម្លងពីបុគ្គលទៅបុគ្គល ពីបុគ្គលទៅក្រុមគ្រួសារខ្លួន និងមិនចម្លងពីបុគ្គលរាតត្បាតក្នុងសហគមន៍ទ្រង់ទ្រាយធំ។
ប្រសិនបើមានបងប្អូនប្រជាពលរដ្ឋណាម្នាក់មានបញ្ហាសុខភាពដែលសង្ស័យជាជំងឺកូវីដ-១៩ សូមរាយការណ៍ទៅក្រុមគ្រូពេទ្យជាបន្ទាន់ ដោយសូមទាក់ទងមកទូរស័ព្ទទាន់ហេតុការណ៍របស់ក្រសួងសុខាភិបាល លេខ១១៥ ដោយឥតគិតថ្លៃ ឬទំនាក់ទំនងក្រសួងសុខាភិបាលតាមលេខទូរស័ព្ទ៖ ០១២ ៨២៥ ៤២៤ ឬ ០១២ ៤៨៨ ៩៨១ ឬ ០១២ ៨៣៦ ៨៦៨ ។
សូមជម្រាបថា រាជរដ្ឋាភិបាលកម្ពុជា បានសម្រេចបិទផ្សារអ៉ីអន១ ជាបណ្តោះអាសន្ន ក្រោយពេលរកឃើញវិជ្ជមានមេរោគកូវីដ១៩ លើខ្លួនស្ត្រី ខ្មែរម្នាក់ ដែលជាភរិយារបស់អគ្គនាយកពន្ធនាគារ បានចូលទៅកាន់ផ្សារនេះ ដើម្បីញ៉ាំអាហារ និងទិញអីវ៉ាន់មួយចំនួន។
លោកស្រី យក់ សម្បត្តិ បានអះអាងថា ស្ត្រីខ្មែររូបនេះត្រូវបានធ្វើតេស្តឃើញថា មានវិជ្ជមានមេរោគកូវីដ១៩ នៅល្ងាចថ្ងៃទី២៨ ខែវិច្ឆិកា ឆ្នាំ២០២០នេះ បន្ទាប់ពីរូបគាត់ចេញរោគសញ្ញាសង្ស័យ ហើយភ្លាមៗនេះក្រសួងសុខាភិបាល ក៏បាននិងកំពុងស្វែងរកអ្នកពាក់ព័ន្ធជាមួយគាត់នៅក្នុងផ្សារអ៉ីអន១ ដើម្បីយកមកធ្វើតេស្ត និងធ្វើចត្តាឡីស័កផងដែរ។
លោកស្រី យក់ សម្បត្តិ បានបញ្ជាក់ថា ការសម្រេចបិទផ្សារអ៉ីអន១ រយៈពេលប៉ុន្មានថ្ងៃសិន ដើម្បីតាមដានរកអ្នកពាក់ព័ន្ធមកធ្វើតេស្ត និងទប់ស្កាត់ការចម្លងមេរោគកូវីដ១៩ បន្តទៀត។ ស្ត្រីដែលមានផ្ទុកមេរោគកូវីដខាងលើនេះ រស់នៅក្នុងបុរីប៉េងហួត ផ្លូវ៦០ម៉ែត្រ នេះជាការបញ្ជាក់បន្ថែមពីលោកស្រី យក់ សម្បត្តិ។
ពាក់ព័ន្ធការរកឃើញអ្នកវិជ្ជមានដែលអាចចាត់ទុកជាការឆ្លងចូលសហគមជាលើកដំបូងនៅកម្ពុជានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅយប់ថ្ងៃទី២៨ ខែវិច្ឆិកា ឆ្នាំ២០២០នេះ បានផ្ញើសារណែនាំពិសេសបន្ទាន់មួយទាំងយប់ផងដែរ។
ក្នុងសារសំឡេងណែនាំនេះ សម្តេចតេជោនាយករដ្ឋមន្ត្រី បានណែនាំឱ្យមានការប្រមូលផ្តុំ និងធ្វើចត្តាឡីស័កបន្ទាន់សម្រាប់អ្នកពាក់ព័ន្ធ។ ក្នុងនោះរួមមានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក កើត រិទ្ធ រដ្ឋមន្ត្រីក្រសួងយុត្តិធម៌ និងមន្ត្រីពាក់ព័ន្ធជាច្រើនរូបទៀត។
សម្តេចតេជោ ហ៊ុន សែន ក៏បានថ្លែងសុំការអធ្យាស្រ័យចំពោះការបិទផ្សារទំនើបអ៉ីអនទី១។
សម្តេចតេជោ ហ៊ុន សែន បានស្នើដល់ប្រជាពលរដ្ឋមេត្តាកុំមានការស្លន់ស្លោ ឬឆោឡោរហូតបាត់បង់ការគ្រប់គ្រង តែត្រូវបង្កើនការយកចិត្តទុកដាក់ ពាក់ព័ន្ធការការពារខ្លួនតាមរយៈការពាក់ម៉ាស់ ការលាងដៃ ការអនាម័យតាមការណែនាំរបស់ក្រសួងសុខាភិបាល។ ក្នុងករណីមានការសង្ស័យត្រូវរកការបញ្ជាក់ពី គ្រូពេទ្យឱ្យបានឆាប់។ សម្តេចតេជោ ក៏បានស្នើសុំកុំឱ្យមានការប្រមូលផ្តុំណាមួយ៕ដោយ៖បញ្ញាស័ក្តិ