បាត់ដំបង៖ពលរដ្ឋរស់នៅឃុំជ្រោយស្ដៅក្នុងស្រុកថ្មគោល បានសម្ដែងនូវការសប្បាយរីករាយ បន្ទាប់ពីរាជរដ្ឋាភិបាលនិងក្រុមការងារ ចុះជួយមូលដ្ឋាននិងអាជ្ញាធរខេត្ត ធ្វើការអភិវឌ្ឍនូវហេដ្ឋារចនាសម្ព័ន្ធនានា ហើយធ្វើឲ្យសេដ្ឋកិច្ចរបស់ពលរដ្ឋ ក្នុងមូលដ្ឋានមានការរីកចម្រើនផងដែរនោះ។
ប្រជាពលរដ្ឋរស់នៅឃុំជ្រោយស្ដៅ បាននិយាយប្រាប់ថា ទោះបីកម្ពុបានជួបនូវវិបត្តិជំងឺកូវីដ១៩ ដូចបណ្ដាប្រទេសក្នុងសកលលោក ប៉ុន្តែក្នុងមូលដ្ឋានរបស់ពួកគាត់នៅតែមានការអភិវឌ្ឍជាបន្ត នូវហេដ្ឋារចនាសម្ព័ន្ធ ដែលមានទាំងផ្លូវគមនាគមន៍ អគារសិក្សា ភ្លើងអគ្គិសនី ការដាក់ភ្លើងសូឡាតាមដងផ្លូវពីសំណាក់អាជ្ញាធរខេត្ត ជាពិសេសក្រុមការងារដែលចុះជួយនៅក្នុងឃុំនេះផ្ទាល់។ ការអភិវឌ្ឍន៍នូវហេដ្ឋារចនាសម្ព័ន្ធទាំងអស់នេះ គឺពិតជាបានឆ្លើយតបទៅនឹងតម្រូវការចាំបាច់ របស់ប្រជាជនក្នុងមូលដ្ឋាន ងាយស្រួលក្នុងការធ្វើដំណើរទៅមក ការដឹកផលកសិកម្មទៅកាន់ទីផ្សារ ហើយសមិទ្ធផលទាំងនេះ នឹងកាន់តែធ្វើឲ្យជីវភាពពួកគាត់ មានភាពរីកចម្រើនបន្ថែមទៀត។
ក្នុងឱកាសនិមន្តព្រះសង្ឃសូត្រមន្ត បើកឡើងស្នាក់ការថ្មីរបស់គណបក្សឃុំ ដែលជាអំណោយរបស់សម្ដេចក្រឡាហោម ស ខេង និងលោកជំទាវ ឯកឧត្តម លី ឌីនូរី អនុប្រធានក្រុមការងារថ្នាក់កណ្ដាល ចុះជួយឃុំជ្រោយស្ដៅ បានមានប្រសាសន៍ថា ក្រុមការងាររបស់រាជរដ្ឋាភិបាល តែងតែចុះផ្សារភ្ជាប់ជានិច្ចជាមួយពលរដ្ឋតាមមូលដ្ឋាន ដើម្បីសួរសុខទុក្ខនិងទទួលយកសំណើពួកគាត់ មកដោះស្រាយបន្ទាន់ ទៅតាមលទ្ធភាពនិងសំណើខ្លះ បានដាក់ស្នើបន្តទៅថ្នាក់ជាតិ ជួយដោះស្រាយជូនពលរដ្ឋ។
គួរបញ្ជាក់ថា ឃុំជ្រោយស្ដៅ មានការចម្រើនច្រើនទាំងផ្នែកហេដ្ឋារចនាសម្ព័ន្ធ និងជីវភាពរបស់នៅរបស់ប្រជាពលរដ្ឋ ដែលពលរដ្ឋភាគច្រើនក្នុងឃុំនេះ ជាអ្នកប្រកបរបរកសិកម្មធ្វើស្រែចម្ការ ហើយឃុំមួយនេះ ក៏មានទីតាំងស្ថិតនៅជាប់បណ្ដោយផ្លូវជាតិលេខ៥ និងកំពុងទទួលបាននូវសមិទ្ធផល នៃផ្លូវជាតិមួយខ្សែនេះផងដែរ៕ ដោយ៖អ៊ុងសារុំ
