ក្រុងព្រះសីហនុ ៖សមត្ថកិច្ចឲ្យដឹងថា នៅព្រឹកថ្ងៃទី២៩ ខែ វិច្ឆិកា ឆ្នាំ២០២០ នៅកាស៊ីណូ រលកធំ ក្រុម១៣ ភូមិ៣ សង្កាត់លេខ៤ ក្រុងព្រះសីហនុ មានបុគ្គលិកកាស៊ីណូប្រមាណ១០០នាក់ ធ្វើកូដកម្មមិនចូលធ្វើការងារ ក្នុងគោលបំណង ទាមទារសុំថៅកែបើកប្រាក់ឈ្នួល មុនថ្ងៃកំណត់។
បើតាមសមត្ថកិច្ចបញ្ជាក់ថា មូលហេតុដែលនាំទៅដល់ការតវ៉ានេះ កើតឡើងក្រោយបុគ្គលិកឮដំណឹងថាថៅកែ មានភាគហ៊ុន ត្រូវបានភាគហ៊ុនក្នុងកាស៊ីណូ សុំដកលុយហ៊ុនចេញ ហើយបុគ្គលិកឃើញដូចច្នេះ សង្ស័យថៅកែក្ស័យធុន ក៏ប្រមូលផ្តុំគ្នាតវ៉ាសុំបើកលុយមុនខែ ។
ក្រោយហេតុការណ៍នេះ ថៅកែកាស៊ីណូ បានចេញមកសម្របសម្រួលជាមួយបុគ្គលិក ហើយសន្យាបើកជូនតាមកាលកំណត់របស់កាស៊ីណូ (រៀងរាល់ថ្ងៃទី៣០) ក្នុងនោះបុគ្គលិកក៏បានយល់ព្រមតាមការសន្យារបស់ថៅកែ រួចបានឯកភាពគ្នា រំសាយការប្រមូលផ្តុំ ចូលធ្វើការធម្មតាវិញនៅព្រឹកថ្ងៃដដែល៕ ដោយ៖បញ្ញាស័ក្តិ