ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍បញ្ជាក់ថា តាមព័ត៍មានពីលោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានឲ្យដឹងថា អ្នកដែលនៅផ្ទះសម្តេច (សម្តេចក្រឡាហោម ស ខេង) ជាង ៩០នាក់ យកសំណាកទៅអវិជ្ជមានទាំងអស់ និងមិនមានអ្នកណាម្នាក់វិជ្ជមានទេ។ ប៉ុន្តែនេះគ្រាន់តែជាជំហានដំបូង ហើយត្រូវយកសំណាកពីរដងទៀត។
សូមជម្រាបថា ក្រសួងសុខាភិបាលបានសុំគោលការណ៍ពីថ្នាក់ដឹកនាំ ដើម្បីពិនិត្យរកមេរោគកូវីដ១៩ ចំពោះថ្នាក់ដឹកនាំជាន់ខ្ពស់ក្រសួងមហាផ្ទៃដែលបានចូលរួមនៅក្នុងកិច្ចប្រជុំកាលពីថ្ងៃទី ២៤ ខែវិច្ឆិកា ឆ្នាំ២០២០ នៅក្រសួងមហាផ្ទៃដែលកិច្ចប្រជុំនេះក៏មានវត្តមានលោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារ ដែលមានមេរោគកូវីដ១៩។
ការស្នើសុំគោលការណ៍នេះបានធ្វើឡើង បន្ទាប់ពីក្រសួងសុខាភិបាល បានរកឃើញថាភរិយារបស់លោកឆែម សាវុធ អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃមានផ្ទុកមេរោគកូវីដ១៩។
សូមជម្រាបថា នៅក្នុងកិច្ចប្រជុំកាលពីថ្ងៃទី២៤ ខែវិច្ឆិកាឆ្នាំ២០២០ គឺដឹកនាំដោយសម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដើម្បីពិនិត្យពិភាក្សាលើសេចក្តីព្រាងព្រះរាជក្រឹត្យស្ដីពីការបន្ធូរបន្ថយលើកលែងទោស។ ដោយនៅក្នុងកិច្ចប្រជុំនេះមានការចូលរួមពីរដ្ឋមន្ត្រីក្រសួងយុត្តិធម៌ អគ្គស្នងការនគរបាលជាតិ រួមទាំងមន្ត្រីជាន់ខ្ពស់សំខាន់ៗមួយចំនួនទៀត៕
ដោយ៖CEN
