ភ្នំពេញ៖ ក្រសួងអប់រំ យុវជន និងកីឡា បានចេញសេចក្តីណែនាំការបញ្ចប់ឆ្នាំសិក្សា ២០១៩-២០២០ សម្រាប់គ្រឹះស្ថានសិក្សាសាធារណៈ នៅថ្ងៃទី៣០ ខែវិច្ឆិកា ឆ្នាំ២០២០ និងបើកបវេសនកាលឆ្នាំសិក្សា២០២០-២០២១ នៅថ្ងៃទី១១ ខែមករាឆ្នាំ២០២១។
ដើម្បីចៀសវាងការឆ្លងជំងឺកូវីដ-១៩ ចូលក្នុងសាលារៀន និងរីករាលដាលក្នុងសហគមន៍ ក្រសួងអប់រំ យុវជន និងកីឡា សូមណែនាំ លោក លោកស្រីប្រធាន មន្ទីរអប់រំ យុវជន និងកីឡារាជធានី ខេត្ត និងលោក លោកស្រី គណៈ គ្រប់គ្រងគ្រឹះស្ថានសិក្សាសាធារណៈទាំងអស់ ដូចខាងក្រោម៖
១.បញ្ចប់ឆ្នាំសិក្សា ២០១៩-២០២០ នៅថ្ងៃទី៣០ ខែវិច្ឆិកា ឆ្នាំ២០២០ សម្រាប់គ្រឹះស្ថានសិក្សាសាធារណៈ បន្ទាប់ពីបានវាយតម្លៃជាបឋមរួចមក និងបើកបវេសនកាលឆ្នាំសិក្សា២០២០-២០២១ នៅថ្ងៃទី១១ ខែមករា ឆ្នាំ២០២១។
២.បន្តការប្រឡងសញ្ញាបត្រមធ្យមសិក្សាបឋមភូមិ ឆ្នាំសិក្សា ២០១៩-២០២០ នាថ្ងៃទី៣០ ខែវិច្ឆិកា ឆ្នាំ ២០២០ ដែលនឹងប្រព្រឹត្តទៅនៅតាមគ្រឹះស្ថានមធ្យមសិក្សារៀងៗខ្លួន និងអនុវត្តតាមវិធានការសុវត្ថិភាពសុខភាព និងការណែនាំរបស់ក្រសួងសុខាភិបាល។
៣.សិស្សថ្នាក់ទី១២ នៅបន្តរៀនសូត្រ ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២១ ធ្នូ ២០២០។
អាស្រ័យដូចបានជម្រាបជូនខាងលើ សូម លោក លោកស្រី ប្រធានមន្ទីរអប់រំ យុវជន និងកីឡារាជធានី ខេត្ត និងលោក លោកស្រីគណៈគ្រប់គ្រងគ្រឹះស្ថានសិក្សាសាធារណៈទាំងអស់ ជ្រាប និងអនុវត្តប្រកបដោយស្មារតី ទទួលខុសត្រូវខ្ពស់៕ ដោយ៖បញ្ញាស័ក្តិ
