ភ្នំពេញ៖ករណីសង្ស័យពុលស្រា ស នៅខេត្តកំពង់ឆ្នាំង នាថ្ងៃទី២៨ ខែវិច្ឆិកា ឆ្នាំ២០២០ គឺអ្នកមានអាការសង្ស័យពុលស្រាស នៅមន្ទីរពេទ្យខេត្ត កំពង់ឆ្នាំង មានចំនួន ១០៥នាក់ (ស្រី ៦នាក់) ក្នុងចំណោមនោះ អ្នកមានស្ថានភាពធ្ងន់ធ្ងរចំនួន ៦នាក់ និងបានបញ្ជូន ទៅមន្ទីរពេទ្យកាល់ម៉ែតចំនួន ០៥នាក់ (ស្លាប់នៅតាមផ្លូវ ពេលបញ្ជូនចំនួន ០២នាក់ និងករណីនៅធ្ងន់ធ្ងរកំពុងសង្គ្រោះ ០១នាក់) មានករណីស្លាប់នៅមន្ទីរពេទ្យខេត្ត កំពង់ឆ្នាំង ០១នាក់ ស្លាប់នៅផ្ទះ ០១នាក់ និងបានព្យាបាលនៅមណ្ឌលសុខភាពអភិវឌ្ឍន៍ ចំនួន ១០ នាក់។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា បានថ្លែងថា ករណីសង្ស័យពុលស្រា ស នៅខេត្តកំពង់ឆ្នាំង នាថ្ងៃទី២៨ ខែវិច្ឆិកា ឆ្នាំ២០២០ ៖ គិតត្រឹមម៉ោង១៨និង០០នាទីនៃថ្ងៃទី២៩ ខែវិច្ឆិកា ឆ្នាំ២០២០ ខ្ញុំសូមជម្រាបជូនសាធារណជនទាំងអស់ឲ្យបានជ្រាបថា យោងតាមរបាយការណ៍ របស់មន្ទីរសុខាភិបាលខេត្តកំពង់ឆ្នាំង ករណីសង្ស័យពុលស្រាសនៅខេត្តកំពង់ឆ្នាំង នាថ្ងៃទី២៨ ខែវិច្ឆិកា ឆ្នាំ២០២០ បានកើតឡើងនៅឃុំខ្លុងពពក ស្រុកទឹកផុស ខេត្តកំពង់ឆ្នាំង ដែលមានដូចតទៅ៖ បានទទួលព្យាបាល អ្នកមានអាការសង្ស័យពុលស្រាស នៅមន្ទីរពេទ្យខេត្ត កំពង់ឆ្នាំង មានចំនួន ១០៥នាក់ (ស្រី ៦នាក់) ក្នុងចំណោមនោះ អ្នកមានស្ថានភាពធ្ងន់ធ្ងរចំនួន ៦នាក់ និងបានបញ្ជូន ទៅមន្ទីរពេទ្យកាល់ម៉ែតចំនួន ០៥នាក់ (ស្លាប់នៅតាមផ្លូវ ពេលបញ្ជូនចំនួន ០២នាក់ និងករណីនៅធ្ងន់ធ្ងរកំពុងសង្គ្រោះ ០១នាក់) មានករណីស្លាប់នៅមន្ទីរពេទ្យខេត្ត កំពង់ឆ្នាំង ០១នាក់ ស្លាប់នៅផ្ទះ ០១នាក់ និងបានព្យាបាលនៅមណ្ឌលសុខភាពអភិវឌ្ឍន៍ ចំនួន ១០ នាក់។
ជាសរុប អ្នករងគ្រោះ ចំនួន ១១៥ នាក់ (ស្រី៦នាក់) ក្នុងនោះស្លាប់ ៥នាក់។
បច្ចុប្បន្នអ្នកជំងឺដែលកំពុងសម្រាកព្យាបាល មានការវិវត្តន៍មកស្ថានភាពល្អប្រសើរវិញហើយ។
មូលហេតុអ្នក ទាំងអស់ខាងលើបានមកចូលរួមកំដរបុណ្យសពក្នុងភូមិ ហើយជួបជុំគ្នាពិសាស្រាស រីឯការសន្និដ្ឋានរបស់ក្រុមការងារចុះស្រាវជ្រាវពិនិត្យ គឺជាករណីសង្ស័យពុលស្រាស។
វិធានការណ៍ និងអន្តរាគមន៍ជួយដល់អ្នកសង្ស័យពុលស្រាស មានដូចតទៅ ៖
– ពេលទទួលបានព័ត៌មាននៅល្ងាចថ្ងៃទី២៨ ខែវិច្ឆិកា ឆ្នាំ២០២០ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានចាត់ថ្នាក់ដឹកនាំជាន់ខ្ពស់ចំនួន ០៣រូប និងមានក្រុមឆ្លើយតបបន្ទាន់នៃនាយកដ្ឋានប្រយុទ្ធនឹងជំងឺឆ្លងនៃកហរសួងសុខាភិបាល ចុះធ្វើដំណើរទាំងយប់ទៅខេត្តកំពង់ឆ្នាំង ដើម្បីជួយការងារបច្ចេកទេសដល់មន្ទីរសុខាភិបាលខេត្តកំពង់ឆ្នាំង រហូតដល់ស្ថានភាពគ្រប់គ្រងបានទាំងស្រុង។
-ចាត់វិធានការណ៍ហាមការផឹកស្រាស និងបញ្ឈប់ការធ្វើចរាចរលក់ដូរស្រាសជាបន្ទាន់ ។
– បានសង្គ្រោះជនរងគ្រោះ បញ្ជូនមកព្យាបាលនៅមន្ទីរពេទ្យខេត្តកំពង់ឆ្នាំងបានទាន់ពេល លើកលែងអ្នកដែលមានសភាពធ្ងន់ធ្ងរពេក ដែលបានបាត់បង់ជីវិតគួរឲ្យសោកស្តាយជាទីបំផុត។
– បន្តអប់រំសុខភាពប្រជាពលរដ្ឋជាបន្តទៀត ជាពិសេសមិនត្រូវពិសារស្រាស ដែលផលិតគ្មានបច្ចេកទេសត្រឹមត្រូវ។
នៅថ្ងៃ អាទិត្យ ទី២៩ ខែ វិច្ឆិកា ឆ្នាំ ២០២០ កម្លាំងចម្រុះចំនួន ២៨ នាក់ក្នុងនោះមាន -នគរបាលស្រុកកំពង់លែង ចំនួន ០១ នាក់
-នគរបាលប៉ុស្តិ៍ទាំង ០៩ ចំនួន ២៥ នាក់ -កងរាជអាវុធហត្ថស្រុក ០២ នាក់ ដឹកនាំដោយលោក វរសេនីយ៍ត្រី សៀង ប៊ុនសាន អធិការរងទទួលការងារនគរបាលយុត្តិធម៌ ដោយបានទទួលបទបញ្ជារបស់ថ្នាក់ដឹកនាំ បានដឹកនាំកម្លាំងសហការ ចុះផ្សព្វផ្សាយតាមតៀមមានលក់ស្រាសឲ្យផ្អាកលក់ និងបិទទីតាំងបិតស្រាសជាបន្ទាន់ ដែលមានលទ្ធផលដូចជា ១-តៀមលក់ស្រាសមានចំនួន ៣៤៧ កន្លែង ២-ទីតាំងបិតស្រាស មានចំនួន ៣៦ កន្លែង ៕ ដោយ៖បញ្ញាស័ក្តិ