កំពង់ស្ពឺ ៖ រថយន្ដទូរដឹកទឹកកក និងរថយន្ដដឹកទំនិញប្រភេទសណ្ដោងបុកគ្នាស្លាប់ម្នាក់។ ករណីគ្រោះថ្នាក់ ចរាចរណ៍ នៅបន្ដកើតដោយសារតែការធ្វេសប្រហែសរបស់អ្នកបញ្ជាយានយន្ដមិនប្រុងប្រយ័ត្ននិងប្រតិបត្ដិគោរពច្បាប់ ។
នាព្រលឹមព្រឹកថៃ្ងច័ន្ទ ទី៣០ ខែវិច្ឆិកា ឆ្នាំ ២០២០ ម៉ោង០៥និង២០នាទីមានករណីគ្រោះថ្នាក់ចរាចរណ៍កើតឡើងនៅចំ ណុចផ្លូវជាតិលេខ ៤ ចន្លោះគីឡូម៉ែត្រលេខ ៤៨-៤៩ ភូមិព្រៃស្លឹក សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ បង្កឡើង រវាងរថយន្ដទូរដឹកទឹកកក និងរថយន្ដដឹកទំនិញប្រភេទសណ្ដោង ក្នុងហេតុការណ៍គ្រោះថ្នាក់ចរាចរណ៍នេះ តាមរបាយការណ៍បឋម របស់សមត្ថកិច្ចនគរបាលចរាចរណ៍ក្រុងច្បារមន ថាបណ្ដាលឱ្យបាត់បង់អាយុជីវិតមនុស្សម្នាក់នៅកន្លែងកើតហេតុ ករណីគ្រោះថ្នាក់ចរាចរណ៍គឺរថយន្ដទាំងពីរបើក ក្នុងទិសដៅបញ្ច្រាសទិសគ្នា ។
តាមការបញ្ជាក់ពីនគរបាលចរាចរណ៍ រថយន្តម៉ាកកូរ៉េ ពាក់ផ្លាកលេខ ភ្នំពេញ3C 7387 បើកពីកើតទៅលិច អ្នកបើកបរមានឈ្មោះម៉ូយ លីដែន ភេទប្រុស អាយុ១៨ឆ្នាំ រស់នៅភូមិសំពៅ សង្កាត់ច្បារមន ក្រុងច្បារមន ខេត្តកំពង់ស្ពឺ(ស្លាប់នៅកន្លែងកើតហេតុ)។
ចំណែករថយន្តសណ្ដោងសឺមីរឺម៉ក ពាក់ផ្លាកលេខ ភ្នំពេញ3D 5043 សឺមីផ្លាកលេខ ព្រះសីហនុ 4A-5020 អ្នកបើកបរបានចុះរត់គេចខ្លួន។
បច្ចុប្បន្ន មធ្យោបាយវត្ថុតាងទាំងពីរត្រូវបាននគរបាលចរាចរណ៍ខេត្តកំពង់ស្ពឺ យកមករក្សាទុកដើម្បីដោះស្រាយតាមនិតីវិធី៕ ដោយ ៖ CEN