ភ្នំពេញ៖ នៅថ្ងៃទី១៦ ខែកុម្ភៈនេះថា តំណាងអយ្យការអមសាលាដំបូងរាជធានីភ្នំពេញ បានទទួលបណ្តឹងពីអគ្គស្នងការដ្ឋាននគរបាលជាតិ ក្រសួងមហាផ្ទៃ ដែលបានប្តឹងមេដឹកនាំរបស់ចលនាសង្រ្គោះជាតិជាច្រើនរូប ដែលបាននិងកំពុងធ្វើចលនាខុសច្បាប់ នៅក្នុងប្រទេសកម្ពុជានិងនៅបរទេស ។
យោងតាមសំណុំរឿង៖ ចលនាសង្រ្គោះជាតិនេះត្រូវបានបង្កើតឡើង ដើម្បីញុះញង់ឲ្យប្រជាពលរដ្ឋ និងកំលាងប្រដាប់អាវុធធ្វើការបះបោរប្រឆាំង នឹងរាជការដែលជារដ្ឋអំណាចស្របច្បាប់។ អំពើដូចនេះ មិនខុសពីអំពើឧទ្ទាម ដែលជាអំពើប្រឆាំងនឹងសន្តិសុខជាតិ ខុសទៅនឹងក្រមព្រហ្មទណ្ឌ នៃព្រះរាជាណាចក្រកម្ពុជាឡើយ។ តំណាងអយ្យការកំពុងពិនិត្យ និងចាត់ការលើពាក្យបណ្តឹងនេះ ហើយថ្នាក់ដឹកនាំនៃចលនាខុសច្បាប់នេះ រួមទាំងបណ្តាញខ្សែរយៈ នៃចលនាខុសច្បាប់នេះ ទាំងក្នុងស្រុក ទាំងក្រៅស្រុក កំពុងស្ថិតក្រោមការស៊ើបអង្កេត របស់ស្ថាប័នមានសមត្ថកិច្ច។
សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ក្នុងឱកាសអញ្ជើញបិទសន្និបាតបូកសរុបការងារ ប្រចាំឆ្នាំ២០១៧ និងលើកទិសដៅឆ្នាំ២០១៨ របស់រដ្ឋបាលខេត្តតាកែវ នៅរសៀលថ្ងៃទី១៥ ខែកុម្ភៈ ឆ្នាំ២០១៨ បានបញ្ជាក់ថា ៖ ចលនាសង្រ្គោះជាតិ មិនអាចមានដង្ហើមរស់បាននោះទេ។សម្ដេចក្រឡាហោម ស ខេង បានធ្វើការណែនាំ ឲ្យអាជ្ញាធរខេត្តតាកែវ ក៏ដូចជាមន្រ្តីនៅតាមមូលដ្ឋានទាំងអស់ ត្រូវធ្វើយ៉ាងណាពន្យល់ប្រជាពលរដ្ឋ នៅមូលដ្ឋានរបស់ខ្លួន កុំឲ្យចាញ់បោកក្រុមអ្នកនយោបាយ អគតិមួយចំនួនតូច ដែលឃោសនាឲ្យប្រជាពលរដ្ឋ ចូលរួមចលនាខុសច្បាប់។
សម្ដេចក្រឡាហោម ស ខេង បានថ្លែងបន្តថា មានកត្តាមួយចំនួន ដែលធ្វើឲ្យចលនាសង្រ្គោះជាតិ មិនអាចរស់បាន គឺទី១៖ បន្ទាប់ពីបង្កើតចលនាសង្គ្រោះជាតិនេះហើយ មិនមានការរំជើបរំជួល ពីប្រជាពលរដ្ឋ នៅក្នុងប្រទេសនោះទេ។ ទី២៖ ចលនានេះ គឺជាចលនាខុសច្បាប់ ដែលបង្កើតឡើង ដើម្បីផ្ដួលរំលំរាជរដ្ឋាភិបាលស្របច្បាប់ ដែលកើតចេញពៅការបោះឆ្នោត គាំទ្រដោយប្រជាពលរដ្ឋ និងទី៣៖ តាំងពីបង្កើតចលនានេះ មកមិនមានប្រទេសមួយណាប្រកាស ទទួលស្គាល់នោះទេ។
សូមបញ្ជាក់ថា បន្ទាប់ពីមានការចម្រូងចម្រាសលើការបង្កើតចនាសង្រ្គោះជាតិនោះមក នៅថ្ងៃទី២៩ ខែមករា ឆ្នាំ២០១៨ ចលនារបស់លោកសម រង្ស៊ី មួយនេះបានបង្កើតជាផ្លូវការរួចហើយ ដោយបានប្រកាសចេញពីទីក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក។ ប៉ុន្តែអតីតប្រធានគណបក្សសង្រ្គោះជាតិលោកកឹម សុខា បានប្រកាសមិនគាំទ្រចលនានេះទេ ហើយថាការទៅចូលរួមរបស់សមាជិកគណបក្សសង្រ្គោះជាតិមួយចំនួន នៅក្នុងចលនានេះ គឺជាសិទ្ធិរបស់បុគ្គលតែប៉ុណ្ណោះ។
នៅក្នុងពិធីប្រកាសជាផ្លូវការ នៃការបង្កើតចលនាសង្រ្គោះជាតិ នៅក្រុងឡុងប៊ិច រដ្ឋកាលីហ្វញ៉ានោះ ក្រៅពីលោក សម រង្ស៊ី គេឃើញមានវត្តមានអតីតតំណាងរាស្ត្រ នៃគណបក្សសង្រ្គោះជាតិ រួមមាន លោកស្រី ជូឡុង ស៊ូម៉ារ៉ា ភរិយារបស់លោក សម រង្ស៊ី លោក ហូ វ៉ាន់ លោក អេង ឆៃអ៊ាង លោក នុត រំដួល លោក អ៊ុច សេរីយុទ្ធ និងលោកសៀ ភារម្យ ប្រធានក្រុមការងារពិសេសសិទ្ធិលំនៅឋានជាដើម។
លោក សម រង្ស៊ី បានឲ្យដឹងថា ចលនាសង្រ្គោះជាតិនេះ មិនចាំបាច់ចុះឈ្មោះ នៅក្រសួងមហាផ្ទៃនោះទេ ហើយក៏គ្មាននរណាអាចរំលាយបានឡើយ។ អ្នកដែលបង្ហាញវត្តមាន នៅក្នុងពិធីនេះ គឺគ្រាន់តែនិមិត្តរូបប៉ុណ្ណោះ ដោយលោកថា លោកមិនចង់ឲ្យអ្នកគាំទ្រចលនានេះ ជាច្រើននាក់ទៀតចេញមុខ និងចេញឈ្មោះឡើយ។
លោក សម រង្ស៊ី បានបន្តថា បេសកកម្មរបស់ចលនាសង្រ្គោះជាតិ គឺ “បំផុសបំផុលឲ្យពលរដ្ឋ និងកម្មករ ធ្វើបាតុកម្ម ដោយអហិង្សាដើម្បីទាមទារសិទ្ធិសេរីភាព អំពាវនាវឲ្យកងទ័ពកុំស្តាប់បញ្ជាពីមេបញ្ជាការរបស់ខ្លួន តាមអ្វីដែលលោក សម រង្ស៊ី ថាជាបញ្ជារបស់ជនផ្តាច់ដើម្បីបាញ់ប្រហារមកលើពលរដ្ឋស្លូតត្រង់ និងការទាក់ទាញមន្រ្តីគណបក្សប្រជាជនកម្ពុជាមួយចំនួន ដែលលោក សម រង្ស៊ី ថា ពួកគេកំពុងតែខឹងនឹងលោក ហ៊ុន សែន និងការបញ្ចុះបញ្ចូលម្ចាស់កម្ចី និងអ្នកជំនួញ កុំឲ្យរកស៊ីជាមួយរដ្ឋាភិបាល តាមអ្វីដែលលោក សម រង្ស៊ី ថាខុសច្បាប់ ”។
លោក សម រង្ស៊ី បានថ្លែងនៅក្នុងពិធីបង្កើតចលនាសង្រ្គោះជាតិនោះថា “ចលនាសង្រ្គោះជាតិ មិនធ្វើឡើង ដើម្បីប្រឆាំងនឹងលោក ហ៊ុន សែន នាយករដ្ឋមន្រ្ដី នៃព្រះរាជណាចក្រកម្ពុជានោះទេ គឺចលនានេះធ្វើឡើង ដើម្បីប្រឆាំងនឹងការឈានពានរបស់យួនកុម្មុយនីស្ដ ដើម្បីស្រោចស្រង់ប្រទេសកម្ពុជា ឲ្យរួចផុតពីការឈ្លាពានពីយួនឈ្លានពាន”។
ទាក់ទិននឹងចលនាសង្រ្គោះជាតិរបស់លោក សម រង្សី នោះ លោក សុខ ឥសាន អ្នកនាំពាក្របស់យគណបក្សប្រជាជនកម្ពុជា បានព្រមានជាមុនថា បើមិនចង់មានបញ្ហាដល់ខ្លួននោះទេ មន្ត្រីអតីតបក្សប្រឆាំងទាំង១១៨នាក់ដែលត្រូវតុលាការកំពូល ហាមធ្វើនយោបាយ នេះ ចូរកុំឲ្យចូលទៅពាក់ព័ន្ធនឹងចលនានេះឲ្យសោះ។ លោក សុខ ឥសាន បន្តថា “ដាច់ខាតប្រជាជនកម្ពុជា ទូទាំងប្រទេស ចង់បានសន្តិភាព ស្ថេរភាពនយោបាយ និងជីវភាពរស់នៅរីកចម្រើន មានសិទ្ធិសេរីភាពគ្រប់បែប យ៉ាងដូចសព្វថ្ងៃ មិនចង់បានអ្វីក្រៅពីនេះទេ”។
លោក សុខ ឥសាន អ្នកនាំពាក្យគណបក្ស ប្រជាជនកម្ពុជា (CPP) បានលើកឡើងថា ទណ្ឌិត សម រង្ស៊ី អតីតប្រធានគណបក្សសង្គ្រោះជាតិ (CNRP) និងបក្ខពួកមួយចំនួនទៀត នៅតែផ្គើនប្រកាសបង្កើត ចលនាសង្គ្រោះជាតិ ហើយប្រើពាក្យញុះញង់៥ចំណុច ប្រឆាំងទៅនឹងរាជរដ្ឋាភិបាលកម្ពុជា របស់សម្ដេចតេជោ ហ៊ុន សែន ។
លោក សុខ ឥសាន លើកឡើង តាមរយៈបណ្ដាញសង្គម តេឡេក្រោម ថា “គ្មានអ្នកណាយកត្រចៀកទៅស្តាប់ នឹងធ្វើតាមទេ ប្រជាជនកម្ពុជា និងកងកម្លាំងប្រដាប់អាវុធ កាន់តែប្តេជ្ញា ឆន្ទៈមោះមុត ដើម្បីចាត់ការបង្ក្រាប និងកម្ទេចចោលគ្រប់ពេល ដែលបានឃើញពួកឧទ្ទាមក្រៅច្បាប់នេះ ។ សកម្មភាពញុះញង់ ចង់បំផ្លាញសន្តិភាព និងការរស់នៅប្រកបដោយ សុខដុមរមនា របស់ប្រជាជនគឺជាអំពើក្បត់ជាតិ ដែលលោក សម រង្ស៊ី បន្តវេនពីលោក សម សារី ជាឪពុកក្បត់ជាតិរបស់ សម រង្ស៊ី “៕ ដោយ៖បញ្ញាស័ក្តិ
