ស្ទឹងត្រែង ៖ ឈើរាប់សិបគំនរដាក់តាមគុម្ពោធព្រៃ ក្រោមផ្ទះ មាត់ច្រាំង ដូចមិនខ្លាចជំនាញ និងសមត្ថកិច្ចពាក់ព័ន្ធសោះ នៅឃុំស្តៅ ស្រុកសេសាន ខេត្តស្ទឹងត្រែង។
នៅថ្ងៃទី១ ខែធ្នូ ឆ្នាំ២០២០នេះ អ្នកយកព័ត៌មានយើងបានចុះទៅផ្ដិតរូបភាព ឃើញថាឈើដែលគេអារច្រៀកជាដុំៗបួនជ្រុង និងក្តាបន្ទះតូចធំវែងខ្លីជាគំនរ ទុករាប់សិបកន្លែងនៅឃុំស្ដៅ ស្រុកសេសាន។
ប្រជាពលរដ្ឋនៅទីនោះបានប្រាប់ថា មានឈ្មួញចាំប្រមូលទិញស្រាប់លក់បន្ត។ អ្នកភូមិដឹកឈើតាមទូក គោយន្ត មកទម្លាក់ក្នុងភូមិ ហើយថៅកែគេដើរមើលទិញដាក់រថយន្ត ឬក៏ម៉ូតូចូលទៅទីរួមខេត្ត។ ជួនពេលយប់គេដាក់ទូកដឹកទៅលក់ឲ្យសិប្បកម្ម ក្នុងក្រុងស្ទឹងត្រែង ដើម្បីកែច្នៃទៅជាគ្រឿងសង្ហារឹម។
ប្រភពបាននិយាយបន្ថែមទៀតថា សមត្ថកិច្ចមូលដ្ឋានគេមិនបង្ក្រាបទេ ព្រោះត្រូវរ៉ូវគ្នាអស់ហើយ តាំងពីឃុំដល់ស្រុក ខេត្ត រឿងអីគេទៅបង្ក្រាបនោះ។ គេបង្ក្រាបឈើដែលមិនបានបង់លុយតែប៉ុណ្ណោះ៕ ដោយ៖សុខុម
