ភ្នំពេញ៖ ស្ថានទូតកម្ពុជាប្រចាំប្រទេសវៀតណាម ណែនាំដល់បងប្អូនប្រជាពលរដ្ឋខ្មែរទាំងអស់ ដែលកំពុងមានវត្តមាន នៅទីក្រុងហូជីមិញ ត្រូវមានស្មារតីប្រុងប្រយ័ត្នខ្ពស់ បន្ទាប់ពីទីក្រុងហូជីមិញ មានករណីឆ្លងជំងឺកូវីដ-១៩ នៅក្នុងសហគមន៍ ជាលើកទី១ បន្ទាប់ពីស្ងប់ស្ងាត់រយៈពេល៣ខែកន្លងមក។
ស្ថានឯកអគ្គរាជទូតនៃព្រះរាជាណាចក្រកម្ពុជា ប្រចាំសាធារណរដ្ឋសង្គមនិយមវៀតណាម សូមជម្រាបជូននិស្សិត សិក្ខាកាមយោធា-នគរបាល និងបងប្អូនប្រជាពលរដ្ឋខ្មែរ ដែលកំពុងសិក្សា ស្នាក់នៅ ឬកំពុងមានវត្តមានក្នុងប្រទេសវៀតណាម មេត្តាជ្រាប ថា យោងតាមសារព័ត៌មានវៀតណាម (Viet Nam News) ចេញផ្សាយថ្ងៃទី១ ខែធ្នូ ឆ្នាំ២០២០ បានឱ្យដឹងថា នៅទីក្រុងហូជីមិញបានរកឃើញករណី ឆ្លងជំងឺកូវីដ-១៩ នៅក្នុងសហគមន៍ជាលើកទី១ បន្ទាប់ពីស្ងប់ស្ងាត់រយៈពេល ៣ខែកន្លងមក។ អ្នកឆ្លង ជំងឺជាបុរស រស់នៅក្នុងទីក្រុងហូជីមិញ និងត្រូវជាមិត្តភក្តិរបស់នារីបម្រើការងារលើយន្តហោះនៃក្រុមហ៊ុន អាកាសចរវៀតណាមអ៊ែរឡាញ ដែលបានធ្វើតេស្តឃើញលទ្ធផលវិជ្ជមានកូវីដ-១៩ កាលពីថ្ងៃទី២៩ ខែ វិច្ឆិកា ឆ្នាំ២០២០។
អាជ្ញាធរវៀតណាមកំពុងស្វែងរក និងកំណត់អត្តសញ្ញាណអ្នកធ្លាប់ទាក់ទងជាមួយអ្នកជំងឺនេះ។ រយៈពេលប៉ុន្មានថ្ងៃចុងក្រោយនេះ អ្នកជំងឺនេះបានចូលហាងការ៉ាអូខេ និងហាងកាហ្វេមួយកន្លែង។ បច្ចុប្បន្ន កន្លែងទាំងនោះត្រូវបានបិទ ហើយអាជ្ញាធរបានបញ្ជូនមន្ត្រីចុះធ្វើការបាញ់ថ្នាំសម្លាប់មេរោគ។ រហូតមកដល់បច្ចុប្បន្ន មានអ្នកទាក់ទងផ្ទាល់ (ក្រុម F1) ចំនួន ៣៨នាក់ និងអ្នកពាក់ព័ន្ធដោយប្រយោល (ក្រុមF2) ចំនួន ១៥៤នាក់។ ទន្ទឹមនេះ ក្រសួងសុខាភិបាលវៀតណាមបានចេញវិធានការណែនាំ ដល់មន្ទីរសុខាភិបាលទីក្រុងហូជីមិញ និងអាកាសចរវៀតណាមអ៊ែរឡាញ ត្រូវអនុវត្តឲ្យបានហ្មត់ចត់ តាមវិធានការសុវត្ថិភាព និងការធ្វើចត្តាឡីស័ក។
ស្ថានឯកអគ្គរាជទូត សូមនិស្សិត សិក្ខាកាមយោធា-នគរបាល និងបងប្អូន ប្រជាពលរដ្ឋខ្មែរ ដែលកំពុងមានវត្តមានក្នុងប្រទេសវៀតណាម មេត្តាអនុវត្តវិធានការការពារសុវត្ថិភ័ព ការពាក់ម៉ាស ការរក្សាអនាម័យ និងបន្តអនុវត្តតាមការណែនាំរបស់ក្រសួងសុខាភិបាល និងអាជ្ញាធរ វៀតណាមឱ្យបានខ្ជាប់ខ្លួន ដើម្បីការពារ កុំឱ្យឆ្លងជំងឺកូវីដ-១៩ ជាយថាហេតុ៕ ដោយ៖បញ្ញាស័ក្តិ
