ភ្នំពេញ៖ បច្ចុប្បន្ន កម្ពុជាមានវារីអគ្គិសនីចំនួន៧កន្លែង ដែលកំពុងដំណើរការ និងបានផ្តល់អនុភាពផលិតថាមពលអគ្គិសនីសរុប ១,៣២៨.១ មេហ្កាវ៉ាត់។
ទីតាំងវារីអគ្គិសនីទាំងនោះ រួមមាន ៖ វារីអគ្គិសនីអាតៃ ឫស្សីជ្រុំ កំចាយ គីរីរម្យ១ គីរីរម្យ៣ វារីអគ្គិសនីតាតៃ និងវារីអគ្គិសនីសេសានក្រោម២។
វារីអគ្គិសនីគីរីរម្យ១ ជាគម្រោងវារីអគ្គិសនីទី១ របស់ប្រទេសកម្ពុជា ដែលបានស្តារឡើងវិញនៅឆ្នាំ២០០២ មានអានុភាពផលិតអគ្គិសនីបាន១២មេហ្កាវ៉ាត់។ វារីអគ្គិសនីនេះ មានទីតាំងគម្រោងស្ថិតនៅស្ទឹងច្រាល មានទំនប់ស្ថិតក្នុងស្រុកភ្នំស្រួច ខេត្ដកំពង់ស្ពឺ និងស្ថានីយវារីអគ្គិសនី ស្ថិតក្នុងស្រុកកំពង់សីលា ខេត្តព្រះសីហនុ។ គម្រោងវារីអគ្គិសនីដំបូងគេរបស់កម្ពុជានេះ មានទុនវិនិយោគ ២៦លានដុល្លារ។
ទី២ វារីអគ្គិសនីកំចាយ ខេត្តកំពត ជាគម្រោងវារីអគ្គិសនីទី២ មានអានុភាពផលិតអគ្គិសនី ១៩៤.១ មេហ្កាវ៉ាត់ និងជាគម្រោងវារីអគ្គិសនីទី២របស់កម្ពុជា ដែលបានដាក់ឱ្យដំណើរការនៅក្នុងឆ្នាំ២០១១ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ទី៣ វារីអគ្គិសនីគីរីរម្យ៣ ជាគម្រោងទី៣ មានអានុភាពផលិតអគ្គិសនី១៨មេហ្កាវ៉ាត់ និងជាគម្រោងវារីអគ្គិសនីទី៣របស់កម្ពុជា ដែលបានដាក់ឱ្យដំណើរការនៅក្នុងឆ្នាំ២០១៣ មានទីតាំងស្ថិតនៅតាមដងស្ទឹងពង្រួល ដែលជាដៃមួយរបស់ព្រែកកំពង់សោម ក្នុងឃុំដងព្រែក ស្រុកស្រែអំបិល ខេត្តកោះកុង។
វារីអគ្គិសនីស្ទឹងអាតៃ ជាវារីអគ្គិសនីទី៤របស់កម្ពុជា មានអានុភាពផលិតអគ្គិសនី១២០មេហ្កាវ៉ាត់ ដែលបានដាក់ឱ្យដំណើរការនៅក្នុងឆ្នាំ២០១៤ ។ វារីអគ្គិសនីនេះ មានទីតាំងក្នុងតំបន់ត្រីកោណ ស្ថិតនៅភូមិសាស្ត្រខេត្តកំពង់ស្ពឺ ខេត្តកោះកុង និងខេត្តពោធិ៍សាត់ (ក្នុងឃុំអូរសោម ស្រុកវាលវែង ខេត្តពោធិ៍សាត់)។
វារីអគ្គិសនីឫស្សីជ្រុំ ជាវារីអគ្គិសនីទី៥ របស់កម្ពុជា មានអានុភាពផលិតអគ្គិសនី៣៣៨មេហ្កាវ៉ាត់ និងបានដាក់ឱ្យដំណើរការនៅក្នុងឆ្នាំ២០១៥ ។ វារីអគ្គិសនីស្ទឹងឫស្សីជ្រុំក្រោម មានទីតាំងគម្រោង នៅឃុំបាក់ខ្លង ស្រុកមណ្ឌលសីមា ខេត្តកោះកុង។
វារីអគ្គិសនីតាតៃ ជាវារីអគ្គិសនីទី៦ ដែលមានទីតាំងស្ថិតនៅក្នុងឃុំប្ញស្សីជ្រុំ និងឃុំតាតៃ ស្រុកថ្មបាំង ខេត្តកោះកុង មានកម្លាំងថាមពល២៤៦មេហ្កាវ៉ាត់ បានសម្ពោធដាក់ឱ្យដំណើរការជាផ្លូវការនៅថ្ងៃទី២៣ ខែធ្នូ ឆ្នាំ២០១៥ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បន្ទាប់ពីផ្តើមសាងសង់កាលពីដើមឆ្នាំ២០១១ ដោយក្រុមហ៊ុនសារជីវកម្មចិន ចំណាយថវិកាប្រមាណ ៥៤០លានដុល្លារ។
និងទី៧ វារីអគ្គិសនីសេសានក្រោម២ ដែលស្ថិតនៅក្នុងខេត្តស្ទឹងត្រែង ផ្តល់ថាមពលអនុភាព ៤០០មេហ្គាវ៉ាត់ ជាការវិនិយោគរួមគ្នារវាងរវាងក្រុមហ៊ុនចំនួនបី។ វារីអគ្គិសនីសេសានក្រោម២នេះ ប្រើទុនវិនិយោគសរុបជិត ៨០០លានដុល្លារអាមេរិក។
គួរបញ្ជាក់ថា តម្រូវការថាមពលអគ្គិសនីបន្តកើនឡើងជាលំដាប់ ដោយឆ្នាំ២០១៩ កើនដល់ ៣,៣៨២មេហ្គាវ៉ាត់ ដែលធ្វើឱ្យនៅឆ្នាំ២០២០ កម្ពុជាទាំងមូលនៅត្រូវការថាមពលអគ្គិសនីបន្ថែម ពិសេសនៅភ្នំពេញខេត្តព្រះសីហនុ និងសៀមរាប។ ក្នុងនោះ ប្រភពថាមពលវារីអគ្គិសនីទាំង៧ ចំនួន១,៣២៨.១ មេហ្កាវ៉ាត់ ប្រភពថាមពលពីស្ថានីយដុតធ្យូងថ្មចំនួន៣ អនុភាពសរុបចំនួន ៦៧៥ ថាមពលពីរោងចក្រដុតប្រេងខ្មៅ និងម៉ាស៊ូត ដែលមានអនុភាព៦២៧ មេហ្កាវ៉ាត ថាមពលកកើតឡើងវិញមានសូឡា(ពន្លឺព្រះអាទិត្យ) ចំនួន ១២៣ មេហ្កាវ៉ាត និងថាមពលនាំចូលពីប្រទេសជិតខាង មានថៃ វៀតណាម និងឡាវ ចំនួនសរុប ៦២៦ មេហ្កាវ៉ាត៕ ដោយ ៖ CEN
