ករណីជនកំហូច ឬ ហៅថាមនុស្សរោគចិត្ត ដែលតែងតែដើរលួចថតស្ត្រីៗដូចជានៅតាមបន្ទប់ទឹក ឬ ទីកន្លែងផ្សេងៗ ដែលអាចធ្វើទៅបានយ៉ាងសម្ងាត់ គឺនៅតែកើតមានឡើងជារឿយ ហើយគេក៏មិនដឹងដែរថា មានមនុស្សស្រីប៉ុន្មាននោះទេ ដែលក្លាយជាជនរងគ្រោះនៅក្នុងអំពើដ៏គួរឲ្យស្អប់ខ្ពើមបំផុតនេះ។
តែយ៉ាងណា ទង្វើដ៏អាក្រក់នេះ យូរនិងឆាប់គង់តែអស់លក្ខណ៍នោះទេ។ ជាក់ស្តែង កាលពីថ្មីៗនេះ ជនកំហូចម្នាក់នៅក្នុងប្រទេសថៃ ត្រូវបានស្ត្រីម្នាក់ រួមនិងប្រជាពលរដ្ឋ បានចាប់បានស្តែងៗ ក្រោយពីរូបនាងបានបញ្ឆោតឲ្យអន្ទាក់ នៅក្នុងការ៉ាស់សាំងមួយ ដែលរូបគេតែងឆ្មក់ចូលធ្វើសកម្មភាពលួចថតស្រីក្នុងបន្ទប់ទឹក។
ហេតុការណ៍ខាងលើនេះ បានកើតឡើងកាលពីថ្ងៃទី២៦ ខែវិច្ឆិកា ឆ្នាំ២០២០ នាវេលាម៉ោង ១០ យប់ ស្ថិតក្នុងការ៉ាស់សាំងមួយកន្លែងនៅក្នុងស្រុក Bang Bua ខេត្ត Nonthaburi។ ជនសង្ស័យរូបនោះមានឈ្មោះ Wuttichai អាយុ ៤៨ ឆ្នាំ។
ស្ត្រីម្នាក់ក្នុងចំណោមជនរងគ្រោះជាច្រើននាក់មានឈ្មោះ Po អាយុ ២៩ ឆ្នាំ បានប្រាប់ឲ្យដឹងថា ករណីនេះបានកើតឡើងមកលើរូបនាងកាលពីមុន នៅឯការ៉ាស់សាំងតែមួយ នៅក្នុងខែមិថុនា ឆ្នាំនេះ។ ហើយនៅពេលនោះ នាងក៏បានទៅដាក់ពាក្យបណ្តឹងនៅឯប៉ុស្តិ៍ប៉ូលិស Bang Bua Thong ហើយនៅពេលសុំមើលវីដេអូនៃកាមេរ៉ាសុវត្ថិភាព ក៏បានឃើញរូបរាងបុរសរូបនេះផងដែរ។
ស្ត្រីរងគ្រោះខាងលើក៏បានបញ្ជាក់ឲ្យដឹងថា មានជនរងគ្រោះជាច្រើននាក់ ដែលប្រើប្រាស់បន្ទប់ទឹកនៅក្នុងការ៉ាស់សាំងនេះ ត្រូវបានបុរសរូបនេះលួចថតយ៉ាងសម្ងាត់។
តែទោះយ៉ាងណា នៅថ្ងៃទី២៦ ខែវិច្ឆិកា នាងបានចូលទៅប្រើបន្ទប់ទឹកដដែលនោះម្តងទៀត ហើយក៏បានឃើញមុខបុរសរូបនេះ កំពុងឈរនៅក្នុងការ៉ាស់សាំង។ នៅពេលនោះ នាង Po ក៏បានឲ្យមិត្តប្រុសរបស់នាងនៅចាំខាងក្រៅដើម្បីបុរសនោះ ខណៈនាងធ្វើពុតជាចូលបន្ទប់ទឹក ដើម្បីថតរាល់សកម្មភាពរបស់បុរសនេះ។
ដូចការរំពឹងទុកមែន គ្រាន់តែឃើញនាងដើរតម្រង់ទៅកាន់បន្ទប់ទឹក ជនសង្ស័យរូបនេះ ក៏បានដើរតាមពីក្រោយជាមួយកាមេរ៉ាត្រៀមរួចស្រេច។ ខណៈបុរសនេះបានចាប់ផ្តើមធ្វើសកម្មភាព នាងបានស្រែកខ្លាំងៗឡើងឲ្យគេជួយ ហើយបុរសកំហូចនេះក៏បានព្យាយាមរត់ចាកចេញ។ ប៉ុន្តែ ម្តងនេះមិនអាចរួចខ្លួនបានឡើយ ដោយបុរសនេះត្រូវកម្លាំងសង្គ្រោះក្នុងស្រុក និងប្រជាពលរដ្ឋ តាមប្រដេញចាប់ចងស្លាបសេក និងវាយឡើងទ្រោមខ្លួន មុនពេលប្រគល់ឲ្យសមត្ថកិច្ចចាត់ការបន្តតាមផ្លូវច្បាប់។
ជាមួយគ្នានេះផងដែរ នាង Po ក៏បានផ្តល់ដំបូន្មានដល់ស្ត្រីដទៃទៀត ដែលបានក្លាយជាជនរងគ្រោះនៅក្នុងបន្ទប់ទឹកស្ថានីយ៍ប្រេងឥន្ធនៈ និងក៏ដូចទីកន្លែងផ្សេងៗទៀត គួរមកធ្វើរបាយការណ៍ជាមួយប៉ូលិស ដើម្បីកុំឲ្យបញ្ហានេះកើតឡើង ព្រោះជនសង្ស័យនឹងបន្តប្រព្រឹត្តទង្វើដ៏អាក្រក់បែបនេះទៀត៕ រក្សាសិទ្ធិដោយ៖ លឹម ហុង