ភ្នំពេញ៖ ឯកឧត្តម ប្រាក់ សុខុន និងឯកឧត្តម Michael Tanបានកោតសរសើរចំពោះទំនាក់ទំនងដ៏ល្អប្រសើររវាងប្រទេសកម្ពុជា និងសិង្ហបុរី ដែលត្រូវបានធ្វើឱ្យកាន់តែស៊ីជម្រៅ តាមរយៈ ដំណើរទស្សនកិច្ចជាន់ខ្ពស់ និងកិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ និងទំនាក់ទំនងរវាងប្រជាជននិងប្រជាជន។
នៅថ្ងៃទី២ ខែធ្នូ ឆ្នាំ២០២០ ឯកឧត្តម Michael Tan ឯកអគ្គរដ្ឋទូតសិង្ហបុរីប្រចាំកម្ពុជា បានចូលជួបសម្តែងការគួរសម និងជម្រាបលាទៅដល់ ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី ក្រសួង ការបរទេស និងសហប្រតិបត្តិការអន្តរជាតិ។
ឯកឧត្តមទាំងពីរ បានកោតសរសើរចំពោះទំនាក់ទំនងដ៏ល្អប្រសើររវាងប្រទេសកម្ពុជា និងសិង្ហបុរី ដែលត្រូវបានធ្វើឱ្យកាន់តែស៊ីជម្រៅ តាមរយៈ ដំណើរទស្សនកិច្ចជាន់ខ្ពស់ និងកិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ និងទំនាក់ទំនងរវាងប្រជាជននិងប្រជាជន។ បើទោះបីជាមានជំងឺរាតត្បាត កូវីដ -១៩ ការធ្វើពាណិជ្ជកម្មរវាងប្រទេសទាំងពីរក្នុងរយៈពេល ៨ ខែដំបូងនាឆ្នាំនេះ មានទំហំសរុបជិត ៣ ពាន់លានដុល្លារសហរដ្ឋអាមេរិក។ ប្រទេសសិង្ហបុរីក៏បានបណ្តុះបណ្តាលមន្ត្រីកម្ពុជាជាង ១៥.៤០០ នាក់ក្រោមកម្មវិធី សហប្រតិបត្តិការសិង្ហបុរី នៅមជ្ឈមណ្ឌលសហប្រតិបត្តិការកម្ពុជា – សិង្ហបុរី នៅរាជធានីភ្នំពេញ និងនៅប្រទេសសិង្ហបុរី។
ឯកឧត្តមទាំងពីរក៏បានរំលឹកឡើងវិញនូវ កម្មវិធីសិល្បៈគំនូរលើជញ្ជាំង ឬ Street Art Fest++ ដែលត្រូវបានប្រារព្ធឡើងក្នុងរយៈពេលពីរសប្តាហ៍នៅខែកុម្ភៈឆ្នាំ ២០២០ ដើម្បីអបអរសាទរខួបលើកទី ៥៥ នៃទំនាក់ទំនងទ្វេភាគីរវាងប្រទេសសិង្ហបុរី និងប្រទេសកម្ពុជា ហើយនឹងបន្តទន្ទឹងរង់ចាំកិច្ចសហប្រតិបត្តិការលើផ្នែកផ្សេងៗនៅក្នុងវិស័យហេដ្ឋារចនាសម្ព័ន្ធដែលដឹកនាំដោយទីភ្នាក់ងារសិង្ហបុរីហេដ្ឋារចនាសម្ព័ន្ធអាស៊ី (Infrastructure Asia)៕រក្សាសិទ្ធិដោយ៖បញ្ញាស័ក្តិ