កំពង់ចាម៖ ប្រជាពលរដ្ឋនៅស្រុកព្រៃឈរ ស្រុកចំការលើ ព្រៃឈរ ក្រុងកំពង់ចាម និងស្រុកជើងព្រៃចំនួន៨នាក់ដែលពាក់ព័ន្ធដោយផ្ទាល់និងដោយប្រយោល ព្រឹត្តិការណ៍សហគមន៍២៨វិច្ឆិកាគឺទទួលលទ្ធផលអវិជ្ជមាន។
លោកអ៊ុន ចាន់ដា អភិបាលខេត្តកំពង់ចាមបានថ្លែងថា យោងតាមលទ្ធផលពីវិទ្យាស្ថានជាតិប៉ាស្ទ័រ ការពិនិត្យលើសំណាកប្រជាពលរដ្ឋដែលពាក់ព័ន្ធព្រឹត្តិការណ៍សហគមន៍២៨វិច្ឆិកា នៅស្រុកចំការលើ ព្រៃឈរ ក្រុងកំពង់ចាម និងស្រុកជើងព្រៃដែលពាក់ព័ន្ធដោយប្រយោល និងប្រជាពលរដ្ឋនៅស្រុកព្រៃឈរចំនួន៨នាក់ ដែលពាក់ព័ន្ធដោយផ្ទាល់គឺទទួលលទ្ធផលអវិជ្ជមានទាំងអស់។
លោកបានឲ្យដឹងថា “សូមពុកម៉ែ បងប្អូនប្រជាពលរដ្ឋ បន្តប្រុងប្រយ័ត្ន និងការពារខ្លួនគ្រប់ពេលវេលាកុំឲ្យឆ្លងជំងឺកូវីដ១៩ ចូលក្នុងសហគមន៍យើង។ ខ្ញុំ សូមលើកដៃជូនពរ ពុកម៉ែ បងប្អូន រួចផុតពីជំងឺរាតត្បាតកូវីដ១៩ និងទទួលបានសេចក្តីសុខ សេចក្តី ចម្រើនគ្រប់ៗគ្នា”។
លោកថា សូមបងប្អូនសាធារណជនកុំមានការយល់ច្រលំលើហេតុការណ៍ដែលបានកើតកន្លងមក។ មកដល់ពេលនេះក្រុមការងារជួរមុខកំពុងបន្តស្វែងរកអ្នកពាក់ព័ន្ធផ្សេងៗទៀតដើម្បីអនុវត្តតាមវិធានសុខាភិបាល។
រដ្ឋបាលខេត្តកំពង់ចាម មានកិត្តិយសសូមជម្រាបជូនសាធារណជនដែលនិយមប្រើប្រាស់បណ្តាញ ទំនាក់ទំនងសង្គម អំពីការបែកធ្លាយនូវរបាយការណ៍របស់ឯកឧត្តម អ៊ុន ចាន់ដា អភិបាលនៃគណៈ អភិបាលខេត្តកំពង់ចាម គោរពផ្ញើជូនសម្តេចតេជោនាយករដ្ឋមន្ត្រី ដែលត្រូវបានធ្វើការចែករំលែក និង ផ្សព្វផ្សាយក្នុងបណ្តាញសង្គមនានា។ ដើម្បីជៀសវាងនូវការយល់ច្រឡំ ឬបកស្រាយខុសទាក់ទងនឹងហេតុការណ៍នេះ រដ្ឋបាលខេត្តកំពង់ចាមសូមធ្វើការបំភ្លឺថា ហេតុការណ៍នេះបានកើតឡើងតាំងពីថ្ងៃទី២៤-២៥ ខែវិច្ឆិកា ឆ្នាំ២០២០ មុនពេលដែលក្រសួងសុខាភិបាល បានរកឃើញករណីវិជ្ជាមានកូវីដ-១៩ លើអ្នកទាំង០៦នាក់នេះ។ ហើយនៅព្រឹកថ្ងៃទី១ ខែធ្នូ ឆ្នាំ២០២០នេះ បន្ទាប់ពីទទួលបានព័ត៌មានពីក្រសួងសុខាភិបាល ដែលបានរាយការណ៍ជូនមក រដ្ឋបាលខេត្តកំពង់ចាមថាអ្នកទាំង៦នាក់ មានវិជ្ជមានកូវីដ- ១៩ ហើយពួកគាត់បានធ្វើដំណើរមកកាន់ ស្រុកព្រៃឈរ ខេត្តកំពង់ចាម ដើម្បីសួរសុខទុក្ខបងប្អូនកាលពីថ្ងៃទី២៤-២៥ ខែវិច្ឆិកាកន្លងទៅ។ ក្រោយពីទទួលបានព័ត៌មាននេះភ្លាម ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានចាត់វិធានការបន្ទាន់ឱ្យមន្ត្រីសុខាភិបាល និងអាជ្ញាធរស្រុកព្រៃឈរ ចុះធ្វើការស្រាវជ្រាវរកអ្នកដែលបានប៉ះពាល់ដោយផ្ទាល់នឹងអ្នកទាំង០៦នាក់ ដោយបានរកឃើញ ចំនួន ៨នាក់ និងយកពួកគាត់មកពិនិត្យសុខភាព យកសំណាក និងបញ្ជូនអ្នកប៉ះពាល់ទាំង៨នាក់ដែលមានការប្រឈមកម្រិតខ្ពស់ មកធ្វើចត្តាឡីស័កកម្រិត២ របស់រដ្ឋបាលខេត្តកំពង់ចាម នៅសណ្ឋាគារមេគង្គ ក្រុងកំពង់ចាម។
នោះមានន័យថា អ្នកវិជ្ជមានកូវីដ-១៩ ទាំង៦នាក់ មិនបានមកខេត្តកំពង់ចាមក្នុងពេលថ្មីៗ ឬនៅព្រឹកថ្ងៃទី១ ខែធ្នូ ឆ្នាំ២០២០នោះឡើយ ពោលគឺអ្នកទាំង៦នាក់ បានមកខេត្តកំពង់ចាមតាំងពីថ្ងៃទី២៤ ២៥ ខែវិច្ឆិកាមកម្ល៉េះ មុនពេលដែលក្រសួងសុខាភិបាលបានរកឃើញករណីវិជ្ជមានកូវីដ-១ ៩លើពួកគាត់។ អាស្រ័យដូចបានជម្រាបជូនខាងលើ សូមសាធារណជន និងបងប្អូនអ្នកនិយមប្រើប្រាស់បណ្តាញសង្គម សូមមេត្តាជ្រាប និងសូមកុំមានការយល់ច្រឡំ ថាអ្នកមានជំងឺកូវីដ-១៩ ទាំង៦នាក់នោះ បានធ្វើដំណើរមកទឹកដីខេត្តកំពង់ចាមក្នុងពេលថ្មីៗ ឬព្រឹកថ្ងៃទី១ ខែធ្នូនេះឡើយ៕រក្សាសិទ្ធិដោយ៖បញ្ញាស័ក្តិ