ភ្នំពេញ៖ ឯកឧត្តមទេសរដ្ឋមន្ត្ រីអៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានថ្លែងអំពីជោគជ័យរបស់កម្ពុជាក្នុងការគ្រប់គ្រងជំងឺឆ្លងរាលដាលជាសកល ដោយការចូលរួមពីសហគមន៍បានធ្វើឱ្យករណីឆ្លងថ្មីបានធ្លាក់ចុះ៦២% និងការស្លាប់ដោយសារជំងឺអេដស៍បានធ្លាក់ចុះ៥៤%នៅចន្លោះឆ្នាំ២០១០ ដល់២០១៩។
នៅរសៀលថ្ងៃពុធ ទី២ ខែធ្នូ ឆ្នាំ២០២០ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញធ្វើបទអន្តរាគមន៍ក្នុងកិច្ចពិភាក្សាតុមូលលើប្រធានបទ “ការទាញយកប្រយោជន៍ពីរចនាសម្ព័ន្ធឆ្លើយតបនៃមេរោគអេដស៍ ដើម្បីឆ្លើយនឹងការរើសអើង និងផលប៉ះពាល់សង្គម-សេដ្ឋកិច្ចដែលប្រឈមមុខដោយប្រជាជនគន្លឹះ និងអ្នកដែលគេទុកនៅកន្លៀតក្នុងអំឡុងការឆ្លងរាលដាលសកលមេរោគកូវីដ-១៩” ដែលរៀបចំដោយកម្មវិធីរួមអង្គការសហប្រជាជាតិស្តីពីជំងឺអេដស៍ (UNAIDS) តាមបណ្តាញវីដេអូ។ កិច្ចប្រជុំនេះធ្វើឡើងក្រោមអធិបតីភាពដ៏ខ្ពង់ខ្ពស់សម្តេចព្រះអង្គម្ចាស់ក្សត្រី សោមសាវាលី ក្រុម មឿន សុត្ថាណារិនាថា (HRH Princess Soamsawali Krom Muen Suddhanarinatha) និងការចូលរួមពីលោកស្រី វីនី ប៊ីយ៉ានយីម៉ា (Mrs Winnie Byanyima) អគ្គនាយក UNAIDS និងលោក អៀម៉ុន មឺហ្វី (Mr Eamonn Murphy) នាយកUNAIDS ប្រចាំតំបន់អាស៊ីប៉ាស៊ីហ្វិក។
បទអន្តរាគមន៍របស់ឯកឧត្តមទេសរដ្ឋមន្ត្រីនេះធ្វើឡើងនៅក្នុងកិច្ចប្រជុំតំបន់អាស៊ី និងប៉ាស៊ីហ្វិកស្តីពី ការបើកពីការបិទទ្វារ ប្រទេស : ចីរភាព វិធីសាស្ត្រផ្តោតលើមនុស្សក្នុងការឆ្លើយតបនឹងការឆ្លងរាលដាលសកលមេរោគកូវីដ-១៩ ដែលទាញយកប្រយោជន៍ពីមេរៀនជាបទពិសោធន៍ពីមេរោគអេដស៍ នៅអាស៊ី និងប៉ាស៊ីហ្វិក នៅទីក្រុងបាងកក និងតាមបណ្តាញវីដេអូ។
មានប្រសាសន៍ទៅកាន់កិច្ចប្រជុំ ឯកឧត្តមទេសរដ្ឋមន្ត្រីបានថ្លែងអំពីជោគជ័យរបស់កម្ពុជាក្នុងការគ្រប់គ្រងជំងឺឆ្លងរាលដាលជាសកល។ ក្នុងនៅភាពជាអ្នកដឹកនាំ សេវាផ្អែកលើភ័ស្តុតាង និងការចូលរួមពីសហគមន៍បានធ្វើឱ្យករណីឆ្លងថ្មីបានធ្លាក់ចុះ៦២% និងការស្លាប់ដោយសារជំងឺអេដស៍បានធ្លាក់ចុះ៥៤%នៅចន្លោះឆ្នាំ២០១០ ដល់២០១៩។ ជាមួយគ្នានេះ អាជ្ញាធរជាតិប្រយុទ្ធនឹងជំងឺអេដស៍ ដោយរួមសហការជាមួយ UNAIDS បានធ្វើការវាយតម្លៃអំពីមេរោគអេដស៍ និងការគាំពារសង្គម ដើម្បីរកឱ្យឃើញនូវរបាំងដែលប្រជាជនគន្លឹះប្រឈមក្នុងការទទួលបានសេវាគាំពារសង្គម និងសេវាសុខាភិបាល។ អាជ្ញាធរជាតិប្រយុទ្ធនឹងជំងឺអេដស៍ និងUNAIDS បានធ្វើការជាមួយក្រសួង និងដៃគូគន្លឹះមួយចំនួនដើម្បីពិនិត្យមើលសកម្មភាពឆ្លើយតបនឹងរបាំងទាំងនោះ។
ឯកឧត្តមទេសរដ្ឋមន្ត្រីបានបន្តថា ក្នុងរយៈពេលពីរបីឆ្នាំចុងក្រោយនេះ អាជ្ញាធរជាតិប្រយុទ្ធនឹងជំងឺអេដស៍ ក្នុងភាពជាដៃគូជាមួយUNAIDS និងកម្មវិធីអភិវឌ្ឍន៍អង្គការសហប្រជា ជាតិ (UNDP) បានធ្វើការងារជាមួយក្រសួងផែនការដើម្បីធានាថា អ្នកផ្ទុកមេរោគអេដស៍ និងប្រជាជនគន្លឹះឱ្យទទួលបានប័ណ្ណក្រីក្រ និងបានប្រយោជន៍ពីគម្រោងគាំពារសង្គម។ កិច្ចការនេះបាននាំឱ្យគ្រួសារអ្នកផ្ទុកមេរោគអេដស៍ចំនួន២៩១០គ្រួសារបានទទួលអត្តសញ្ញាណប័ណ្ណគ្រួសារក្រីក្រក្នុងឆ្នាំ២០១៩។
នៅទីបញ្ចប់នៃបទអន្តរាគមន៍ ឯកឧត្តមទេសរដ្ឋមន្ត្រីបានសង្កត់ធ្ងន់ថា នៅក្នុងបរិបទនៃការឆ្លើយតបនឹងកូវីដ-១៩ រាជរដ្ឋាភិបាលកម្ពុជាបានចំណាយថវិកាប្រមាណ២០លានដុល្លារក្នុងមួយខែ ដែលជាថវិកាសង្គ្រោះបន្ទាន់ដើម្បីជួយដល់អ្នកក្រ ក្នុងនោះមានអ្នកផ្ទុកមេរោគអេដស៍ផងដែរ៕ រក្សាសិទ្ធិដោយ៖បញ្ញាស័ក្តិ