ភ្នំពេញ៖ អាជ្ញាធររាជធានីភ្នំពេញសហការជាមួយក្រសួងសុខាភិបាលបានសម្រេចជ្រើសរើសយកទីតាំងពហុកីឡដ្ឋានជាតិអូឡាំពិកធ្វើជាកន្លែងសម្រាប់យកសំណាកលើកទី២ សម្រាប់ប្រជាពលរដ្ឋដែលសង្ស័យថាមានវីរុសcovid -19 ក្នុងព្រឹត្តិការណ៍សហគមន៍ ២៨វិច្ឆិកា នៅថ្ងៃទី៨ធ្នូខាងមុខនេះ។
ដើម្បីដំណើរការនៃការរៀបចំទីតាំងថ្មីខាងលើនេះដំណើរការទៅបានរលូន លោកឃួង ស្រេង អភិបាលរាជធានីភ្នំពេញនិងលោកស្រី យក់ សម្បត្តិ រដ្ឋលេខាធិការក្រសួងសុខាភិបាលនាល្ងាចថ្ងៃទី៣ធ្នូនេះ បានដឹកនាំមន្ត្រីនិងអាជ្ញាធរចុះពិនិត្យទីតាំងខាងលើជាមួយនឹងការណែនាំឱ្យរៀបចំ សណ្ដាប់ធ្នាប់ ការរៀបចំណតសម្រាប់បងប្អូនប្រជាពលរដ្ឋដែលត្រូវមកពិនិត្យយកសំណាកជាលើកទី២ និងការរៀបចំរោងបំពាក់ដោយម៉ាស៊ីនត្រជាក់និងបង្គន់អនាម័យផងដែរ។
លោកឃួង ស្រេង អភិបាលរាជធានីភ្នំពេញក្នុងឱកាសនោះ បានណែនាំមន្ត្រីនិងកម្លាំងពាក់ព័ន្ធ ក្នុងនាមជាអាជ្ញាធរដែនដីនឹងប្រើប្រាស់កម្លាំងប្រមាណ៥០នាក់ដើម្បីជួយទៅលើ ការរៀបចំសណ្តាប់ធ្នាប់ សន្តិសុខពីខាងក្នុងនិងក្រៅពហុកីឡដ្ឋានជាតិអូឡាំពិកនេះ។
លោកស្រី យក់ សម្បត្តិ បានថ្លែងថា សម្តេច ទ្រង់ ឯកឧត្តម អស់លោក លោកស្រី ដែលជាប់ពាក់ព័ន្ធផ្ទាល់ និងប្រយោល សូមអញ្ជើញទៅធ្វើតេស្តលើកទី២ នៅថ្ងៃទី៨ ខែធ្នូ ឆ្នាំ២០២០ និងលើកទី៣ នៅថ្ងៃទី១២ ខែធ្នូ ឆ្នាំ២០២០ តាមទីតាំងដែលបានកំណត់សម្រាប់រាជធានីភ្នំពេញនៅក្រសួងមហាផ្ទៃ និងពហុកីឡដ្ឋានជាតិអូឡាំពិក៕រក្សាសិទ្ធិដោយ៖បញ្ញាស័ក្តិ