ភ្នំពេញ៖ ក្នុងរយៈពេល១០ខែ នៃឆ្នាំ២០២០ បានកាត់បន្ថយគ្រោះថ្នាក់ចរាចរណ៍ចំនួន ៧៧៨លើក ស្មើ២៣% (២.៦៧៥/ ៣.៤៥៣លើក) អ្នកស្លាប់បានថយចុះចំនួន ២៨៨នាក់ ស្មើ១៧% ( ១.៣៦៨/១.៦៥៦នាក់) និងអ្នករបួសថយចុះចំនួន ១.២០៧នាក់ ស្មើ២៣% (៤.០០៧ /៥.២១៤នាក់) បើប្រៀបធៀបរយៈពេលដូចគ្នានាឆ្នាំ២០១៩។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ចេញសេចក្ដីណែនាំស្តីពីវិធានការបង្ការ និងទប់ស្កាត់កំណើនគ្រោះថ្នាក់ចរាចរណ៍ផ្លូវគោក។
អនុវត្តតាមទិសដៅការងារសុវត្ថិភាពចរាចរណ៍ដែល គ.ស.ច.គ.បានកំណត់យកឆ្នាំ២០២០ ដើម្បី ធ្វើការរឹតបន្ដឹងអនុវត្តច្បាប់ស្តីពីចរាចរណ៍ផ្លូវគោក គ.ស.ច.គ.បានចង្អុលដឹកនាំ ដល់កងកម្លាំងនគរបាលចរាចរណ៍ ផ្លូវគោកធ្វើការរឹតបន្ដឹងអនុវត្តច្បាប់ស្តីពីចរាចរណ៍ផ្លូវគោក ទទួលបានលទ្ធផលល្អប្រសើរគួរជាទីមោទនៈ ដោយ ក្នុងរយៈពេល១០ខែ នៃឆ្នាំ២០២០ បានកាត់បន្ថយគ្រោះថ្នាក់ចរាចរណ៍ចំនួន ៧៧៨លើក ស្មើ២៣% (២.៦៧៥/ ៣.៤៥៣លើក) អ្នកស្លាប់បានថយចុះចំនួន ២៨៨នាក់ ស្មើ១៧% ( ១.៣៦៨/១.៦៥៦នាក់) និងអ្នករបួស ថយចុះចំនួន ១.២០៧នាក់ ស្មើ២៣% (៤.០០៧ /៥.២១៤នាក់) បើប្រៀបធៀបរយៈពេលដូចគ្នានាឆ្នាំ២០១៩។
គ .ស.ច.គ. សូមកោតសរសើរ និងវាយតម្លៃខ្ពស់ ចំពោះស្មារតីយកចិត្តទុកដាក់បំពេញភារកិច្ច ដ៏ថ្លៃថ្លាប្រកបដោយស្មារតីទទួលខុសត្រូវរបស់មន្ត្រីនគរបាលចរាចរណ៍ផ្លូវគោក មន្ត្រីសាធារណការ និងដឹកជញ្ជូន និងសមត្ថកិច្ចពាក់ព័ន្ធ ក្នុងការត្រួតពិនិត្យរឹតបន្តឹងអនុវត្តច្បាប់ស្តីពីចរាចរណ៍ផ្លូវគោក និងការផ្សព្វផ្សាយអប់រំច្បាប់ ដែលបាននាំឱ្យទទួលលទ្ធផលជាវិជ្ជមាន។
គ.ស.ច.គ. សូមកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះអ្នកប្រើប្រាស់ផ្លូវដ៏ច្រើនលើសលប់ ដែលបានចូលរួមគោរពច្បាប់ស្តីពីចរាចរណ៍ផ្លូវគោកប្រកាន់ខ្ជាប់នូវ ស្មារតីប្រុងប្រយ័ត្ន បើកបរប្រកបដោយសុជីវធម៌ និងការយោគយល់គ្រប់កាលៈទេសៈ។
បើទោះបីស្ថានភាពហាក់ប្រសើរជាងមុនក្ដី ក៏ប៉ុន្តែ គ.ស.ច.គ. ពិនិត្យឃើញថា គ្រោះថ្នាក់ចរាចរណ៍ ផ្លូវគោកនៅតែបង្កហានិភ័យខ្ពស់ធៀបទៅនឹងគ្រោះថ្នាក់សង្គមនានា ដែលបណ្តាលឱ្យបាត់បង់ជីវិត រងរបួស ខ្ញុំចខាតទ្រព្យសម្បត្តិ និងប៉ះពាល់ដល់ជីវភាពនៃគ្រួសាររងគ្រោះជាច្រើនទៀតផង។ ដូចនេះដើម្បីកាត់បន្ថយ ហានីភ័យនេះឱ្យថយចុះ និងដើម្បីជំរុញការរក្សាសុវត្ថិភាពចរាចរណ៍ផ្លូវគោក ឱ្យកាន់តែល្អប្រសើរថែមទៀត គ.ស.ច.គ. ដាក់ចេញវិធានការបង្ការ និងទប់ស្កាត់កំណើននៃគ្រោះថ្នាក់ចរាចរណ៍ផ្លូវគោក ដូចខាងក្រោម៖
១.អនុគណៈកម្មការសុវត្ថិភាពចរាចរណ៍ផ្លូវគោករាជធានី ខេត្ត ត្រូវជំរុញចាត់វិធានការដូចតទៅ៖ បង្កើនការរឹតបន្ដឹងអនុវត្តច្បាប់ ស្តីពីចរាចរណ៍ផ្លូវគោក តាមផែនការសកម្មភាពលេខ ០០៣/២០ ចុះថ្ងៃទី០៣ ខែកុម្ភៈ ឆ្នាំ២០២០ របស់អនុគណៈកម្មការទី២ និងតាមបទពិសោធន៍ជាក់ស្តែង ដោយផ្តោតលើ មុខសញ្ញាបង្កគ្រោះថ្នាក់ មូលហេតុនាំឱ្យមានគ្រោះថ្នាក់ ពេលវេលា និងទីកន្លែងដែលកើតឡើងនូវហេតុការណ៍ គ្រោះថ្នាក់ ដើម្បីដាក់ចេញវិធានការឱ្យបានសមស្រប និងមានប្រសិទ្ធភាពខ្ពស់។ ជាមួយនេះ ត្រូវចាត់ស្រាវជ្រាវ តាមចាប់ឱ្យបាននូវជនបង្កគ្រោះថ្នាក់ចរាចរណ៍ផ្លូវគោក ដែលរត់គេចខ្លួន ដើម្បីបញ្ជូនទៅតុលាការផ្ដន្ទាទោស តាមច្បាប់ និងត្រូវចែករំលែកព័ត៌មាន សាវតារជាតិរបស់ជនបង្កដែលរត់គេចខ្លួន ជូនដល់គ្រប់ក្រុមហ៊ុន សហគ្រាស ទាំងរដ្ឋ និងឯកជនដែលពាក់ព័ន្ធ ឱ្យបានជ្រាប និងចូលរួមសហការ។ បង្កើនការរៀបចំសណ្តាប់ធ្នាប់ចរាចរណ៍ ឱ្យមានរបៀបរៀបរយ ដោយធ្វើការរឹតបន្ដឹងអនុវត្តច្បាប់ ចំពោះករណ៍ល្មើសក្នុងការចតយានយន្ត ការមិនគោរពភ្លើងសញ្ញា ផ្លាកសញ្ញា គំនូសសញ្ញា និងការប្រើប្រាស់ ចិញ្ចើមផ្លូវដោយគ្មានការអនុញ្ញាត។ ជាមួយនេះ ត្រូវយកចិត្តទុកដាក់ដោះស្រាយ ការកកស្ទះចរាចរណ៍ឱ្យកាន់ តែមានប្រសិទ្ធភាពថែមទៀត។
បង្កើនការផ្សព្វផ្សាយអប់រំច្បាប់ស្តីពីចរាចរណ៍ផ្លូវគោក ឱ្យកាន់តែទូលំទូលាយថែមទៀត តាមគ្រប់រូបភាពជាប្រចាំ ដល់គ្រប់មូលដ្ឋាន និងគ្រប់វេទិកាសាធារណៈ ដើម្បីផ្តល់ចំណេះដឹងសុវត្ថិភាពចរាចរណ៍ផ្លូវគោក ដល់អ្នកប្រើប្រាស់ផ្លូវគ្រប់រូប។
ត្រូវពង្រឹងថែមទៀតនូវប្រព័ន្ធសង្គ្រោះបន្ទាន់ ដល់ជនរងគ្រោះថ្នាក់ចរាចរណ៍ផ្លូវគោក អំពីយន្តការ មធ្យោបាយ និងការទំនាក់ទំនងព័ត៌មាន សំដៅធ្វើការសង្គ្រោះប្រកបដោយជំនាញវិជ្ជាជីវៈ និងបានឆាប់ទាន់ ពេលវេលា។
ត្រូវយកចិត្តទុកដាក់អនុវត្តចលនាប្រឡងប្រណាំង “តំបន់ពិសេសនៃសុវត្ថិភាពចរាចរណ៍ផ្លូវគោក ដែលបានចែងក្នុងសេចក្តីណែនាំលេខ ០០១/១៩ សណន. គ គ.ស.ច. ចុះថ្ងៃទី១៥ ខែកុម្ភៈ ឆ្នាំ២០១៩ របស់ គ. .ស. .គ។ ដើម្បីជំរុញចលនានេះ អគ្គលេខាធិការដ្ឋាននៃ គ.ស.ច.គ. ត្រូវចាត់ក្រុមការងារចុះត្រួតពិនិត្យ និង ផ្តើមស្នើការវាយតម្លៃលើកសរសើរដល់អង្គភាព និងបុគ្គល ដែលមានស្នាដៃក្នុងការបំពេញភារកិច្ចឆ្នាំ២០២០។
ត្រូវខិតខំបន្តពង្រឹងវិន័យ សីលធម៌ គុណធម៌ និងមនសិការវិជ្ជាជីវៈ រួមទាំងការបន្តលើកទឹកចិត្ត ដល់កងកម្លាំងមានសមត្ថកិច្ចអនុវត្តច្បាប់ស្តីពីចរាចរណ៍ផ្លូវគោកឱ្យបានជាប់ជាប្រចាំ។
២.គ្រប់ក្រសួង ស្ថាប័នរដ្ឋ និងសហគ្រាសសាធារណៈ ត្រូវយកចិត្តទុកដាក់អនុវត្តសេចក្តីណែនាំ លេខ ០១៣ គ.ស.ច.គ. ចុះថ្ងៃទី១១ ខែមីនា ឆ្នាំ២០១៩ របស់ គ.ស.ច.គ. ស្ដីពីការជំរុញការអប់រំផ្សព្វផ្សាយ លើកកម្ពស់សុវត្ថិភាពចរាចរណ៍ដល់មន្ត្រីរាជការ និយោជិក ក្រោមឱវាទក្រសួងស្ថាប័ន នៅថ្នាក់ជាតិ និងថ្នាក់ ក្រោមជាតិ ឱ្យមានស្មារតីគំរូក្នុងការគោរពអនុវត្តច្បាប់ស្តីពីចរាចរណ៍ផ្លូវគោក ដោយត្រូវបង្កើតកម្មវិធីអប់រំ ផ្សព្វផ្សាយសុវត្ថិភាពចរាចរណ៍ឱ្យបានទៀងទាត់យ៉ាងតិចមួយត្រីមាសម្តង ការបញ្ចូលខ្លឹមសារសុវត្ថិភាពចរាចរណ៍ ផ្លូវគោកក្នុងបទបញ្ជាផ្ទៃក្នុង ការបង្កើតកម្មវិធីប្រឡងប្រណាំងលើកទឹកចិត្តចំពោះមន្ត្រីរាជការ និយោជិតដែល អនុវត្តបានល្អនូវបទបញ្ជាផ្ទៃក្នុង និងត្រូវធ្វើរបាយការណ៍ប្រចាំឆ្នាំ២០២០ និងធ្វើរបាយការណ៍ប្រចាំខែក្នុង ឆ្នាំ២០២១ខាងមុខ អំពីសកម្មភាពអប់រំផ្សព្វផ្សាយសុវត្ថិភាពចរាចរណ៍ផ្លូវគោកឱ្យបានទៀងទាត់ ជូនមកកាន់ គ.ស.ច.គ. តាមរយៈអគ្គលេខាធិការដ្ឋាន នៃគ.ស.ច.គ.ដែលមានទីតាំងនៅក្នុងក្រសួងសាធារណការ និងដឹកជញ្ជូន។
សម្តេចក្រឡាហោម ស ខេង បានណែនាំដល់អគ្គលេខាធិការដ្ឋាន អនុគណៈកម្មការទី១ អនុគណៈកម្មការទី២ អនុគណៈកម្មការសុវត្ថិភាពចរាចរណ៍ផ្លូវគោករាជធានី ខេត្ត និងក្រសួង ស្ថាប័នដែលពាក់ព័ន្ធ ត្រូវចាត់អនុវត្ត ឱ្យទទួលបានជោគជ័យ ប្រកបដោយស្មារតីទទួលខុសត្រូវខ្ពស់ ចាប់ពីថ្ងៃចុះហត្ថលេខាតទៅ៕រក្សាសិទ្ធិដោយ៖បញ្ញាស័ក្តិ
