ឧត្តមភរិយាឯកឧត្តមបណ្ទិត ម៉ុង ឬទ្ធី គ្រាន់តែធ្លាក់ខ្យល់ត្រជាក់ពីជើងភ្លាម បាននាំកូនចៅចាប់ត្រីឆ្តោរាប់តោនដើម្បីធ្វើប្រហុកស្តុកទុក ដែលជាទំនៀមទម្លាប់របស់ប្រជាកសិករខ្មែរយើងតែងធ្វើជារៀងរាល់ឆ្នាំ ឃើញហើយធ្វើឲ្យអ្នកទីក្រុងដែលធ្លាប់រស់នៅជនបទនឹករលឹកជីវភាពស្រុកស្រែចំការជាខ្លាំង។
តាមរយៈផេកហ្វេសប៊ុកផ្ទាល់របស់ឯកឧត្តមបណ្ទិត ម៉ុង ឬទ្ធី បានបង្ហោះនៅមុននេះបន្តិចបានរៀបរាប់ថា «វេលាម៉ោង៥ព្រឹក ថ្ងៃសុក្រ ទី០៤ ខែធ្នូ ឆ្នាំ២០២០ ដូចការគ្រោងទុកដើម្បីឲ្យរដូវកាលធ្វើត្រីប្រហុក ជាទំនៀមទម្លាប់របស់ប្រជាកសិករខ្មែរយើង ឲ្យតែធ្លាក់ខ្យល់ត្រជាក់មកពីទីសខាងជើងជារដូវចម្រូតផង តែងតែនាំគ្នាធ្វើត្រីប្រហុក ហើយព្រឹកនេះយាយខ្ញុំគាត់បានបញ្ជាឲ្យកូនចៅទៅចាប់ត្រីឆ្តោចំនួន១២តោនយកមកធ្វើប្រហុក សម្រាប់ថ្ងៃទីមួយ ក្នុងគំរោង១៥០តោនរយៈពេល១៥ថ្ងៃ ប្រហុកនេះធ្វើនៅតំបន់ឆ្នេរសមុទ្រកែវផុស»។
គ្រាន់តែបង្ហោះភ្លាមមានអ្នកលេងបណ្តាញសង្គមជាច្រើន បានចូលមកខមិនសរសើរពីភាពឧស្សាហ៍ព្យាយាមរបស់ភរិយាបណ្ឌិត ម៉ុង ឬទ្ធី ថាបើទោះបីជាមានលុយចាយលែងអស់យ៉ាងណាក៏ដោយ ក៏លោកជំទាវនៅតែរក្សាឥរិយាបទនិងរបៀបរស់នៅដូចដើម ចំណែកអ្នកខ្លះទៀតបានខមិនបែបកំប្លែងថា កាដុមឆែបគ្រាន់តែប្រហុក១៥០តោន តាំងពីកើតពោះម៉ែមកមិនដែលឮ ឬឃើញប្រហុកខ្នាតយក្សអញ្ចឹងទេ ក្មួយសូមសរសើរលោកអ៊ំអស់ពីចិត្ត ។
គួរបញ្ជាក់ថា ប្រហុកជាប្រភេទអាហារផ្អាប់ម្យ៉ាង ធ្វើឡើងពីសាច់ត្រី ដែលប្រជាជនខ្មែរយើងនិយមចូលចិត្តទទួលទាន និងច្នៃជាម្ហូបអាហារបានច្រើនប្រភេទដូចជាប្រហុកខ្ទិះ ទឹកគ្រឿងប្រហុក ប្រហុកស្វាយខ្ចី ប្រហុកចិញ្ច្រាំឆៅញាំជាមួយបន្លែស្រស់ ប្រហុកឆៅម្ជូរក្រសាំង និងសម្រាប់បង់សម្លរខ្មែរជាច្រើនមុខ ដើម្បីបង្កើនរសជាតិផងដែរ៕ រក្សាសិទ្ធដោយ៖ កូលាប ក្រហម
