ខេត្តព្រះសីហនុ៖ សមត្ថកិច្ច នៃស្នងការដ្ឋាននគរបាលខេត្តព្រះសីងនុ បានអោយដឹងថា ចូលមកដល់ថ្ងៃទី៣ នៃពិធីបុណ្យចូលឆ្នាំប្រពៃណីជនជាតិចិន គឺមានភ្ញៀវទេសចរជាតិ-អន្តរជាតិច្រើនកុះករ បាន ចេញទៅកម្សាន្តតាមបណ្តាកោះនានាក់។
លោកវរសេនីយ៍ទោ ប៉ោ ប៊ុណ្ណារ៉ា នាយការិយាល័យនគរបាលទេសចរាចរណ៍ បានឲ្យដឹងថា នៅ ថ្ងៃទី១៧ ខែ កុម្ភៈ ឆ្នាំ២០១៨នេះ មានភ្ញៀវទេសចរចម្រុះជាតិសាសន៍ បានទៅលេងកម្សាន្តតាមបណ្តាកោះនានា នៅខេត្តព្រះសីហនុ មានចំនួនសរុប ៤.៤៥៨នាក់ និងមានស្រី ២.០៩០នាក់។ ក្នុងនោះមានភ្ញៀវទេសចរជាតិចំនួន ២.៦៤១នាក់ ស្រី១.២១៤នាក់ និង ភ្ញៀវទេសចរណអន្តរជាតិ ចំនួន១.៨១៧នាក់ ស្រី ៨៧៦នាក់។
លោក ប៉ោ ប៊ុណ្ណារ៉ា បានអោយដឹងថា ទិន្នន័យចំនួនភ្ញៀវទេសចរខាងលើនេះ គឺទទួលបានពីការកត់ត្រា ច្បាស់លាស់ នៅតាមកំពង់ផែដឹកជញ្ជូនភ្ញៀវទេសចរចេញទៅតាមកោះទាំង៣ទីតាំង នៅខេត្តព្រះសីហនុ។
ចំណែក លោកវរសេនីយ៍ទោ ខឹម សុផល នាយការិយាល័យនគរបាល ចរាចរណ៍ផ្លូវទឹក បានអោយដឹងដែរថា នៅថ្ងៃទី១៧ ខែកុម្ភៈ ឆ្នាំ២០១៨នេះអាកាសធាតុ លើផ្ទៃសមុទ្រ មានសភាពស្ងប់ស្ងាត់ល្អ ដោយពុំមានព្យុះភ្លៀង ឬរលកសមុទ្របោកបក់ខ្លាំងនោះ។ ទោះបីយ៉ាងណា លោកថា កងកម្លាំងនគរបាលចរាចរណ៍ផ្លូវទឹក បន្តត្រួតពិនិត្យណែនាំ ឲ្យភ្ញៀវធ្វើដំណើរតាមផ្លូវទឹក ត្រូវប្រុងប្រយ័ត្ន និងពាក់អាវពោងសុវត្ថិភាពឲ្យបានគ្រប់ៗគ្នា បង្ការមានហានិភ័យផ្សេងៗកើតឡើងជាយថាហេតុ៕ ដែន សីមា
