កំពង់ឆ្នាំង ៖ កម្លាំងកងរាជអាវុធហត្ថខេត្តកំពង់ឆ្នាំង បានឲ្យដឹងថា ដោយមានការសម្របសម្រួល ពីលោកព្រះរាជអាជ្ញាអមសាលាដំបូងខេត្ត បានចុះធ្វើការឃាត់ខ្លួនជនសង្យ័យចំនួន ២ នាក់ពាក់ព័ន្ធករណីឃាតកម្មសម្លាប់ស្ត្រីម្នាក់។
កងរាជអាវុធហត្ថខេត្តកំពង់ឆ្នាំង បានបញ្ជាក់ថា នៅវេលាម៉ោង ១៧និង៣០ នាទី ថ្ងៃទី៣ ខែធ្នូ ឆ្នាំ២០២០ នៅចំណុចផ្លូវថ្មី ឃុំឆ្នុកទ្រូ ស្រុកបរិបូណ៌ កម្លាំងកងរាជអាវុធហត្ថខេត្តចំនួន ៥ នាក់ មធ្យោបាយរថយន្ត ១ គ្រឿង ដឹកនាំដោយលោកវរសេនីយ៍ទោ ហង្ស សុជាតិ មេបញ្ជាការរង ទទួលផែនយុត្តិធម៌ និងដោយមានការសម្របសម្រួលពី ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្ត បានចុះធ្វើការឃាត់ខ្លួនជនសង្យ័យចំនួន ២ នាក់ ១-ឈ្មោះ កាន់ ឈុនឡេង ភេទប្រុស អាយុ ៣៦ ឆ្នាំ ទីលំនៅភូមិកំពង់ថ្គោល ឃុំផ្សារចំបក់ ស្រុកក្រគរ ខេត្តពោធិ៍សាត់ ២-ឈ្មោះ លន សុខឡូត ភេទប្រុស អាយុ ២២ ឆ្នាំ ទីលំនៅភូមិផាត់សណ្តាយ ឃុំសណ្តាយ ស្រុកកំពង់ស្វាយ ខេត្តកំពង់ធំ ដែលជាប់សង្ស័យ ពាក់ព័ន្ធនិងករណីឃាតកម្ម កាលពីថ្ងៃទី៣ ខែធ្នូ ឆ្នាំ២០២០ ។
វត្ថុតាងដកហូតរួមមាន : ទូរស័ព្ទ ២ គ្រឿង ។ បច្ចុប្បន្នជនសង្ស័យ និងវត្ថុតាង ការិយាល័យជំនាញកសាងសំណុំរឿងបញ្ជូនទៅសាលាដំបូងខេត្ត ។
តាមប្រភពពីក្រុមគ្រួសារបានឱ្យដឹងថា យុវតីរងគ្រោះខាងលើឈ្មោះ ឡាំ រដ្ឋា អាយុ១៩ឆ្នាំ ជាសិស្សវិទ្យាល័យហ៊ុនសែនបរិបូណ៌ មានទីលំនៅក្នុងភូមិឃុំកើតហេតុខាងលើ ។ មុនពេលកើតហេតុ កាលពីល្ងាចថ្ងៃទី៣ ខែធ្នូ ឆ្នាំ២០២០ យុវតីរងគ្រោះបានត្រឡប់មកពីរៀនវិញ ហើយក៏បានបើកកាណូតបាឡាស្មាច់ ជូនមិត្តភក្តិទៅផ្ទះដូចសព្វដង ។ លុះដល់វេលាម៉ោង៧យប់ថ្ងៃដដែល មិនឃើញនាងត្រឡប់មកផ្ទះវិញឡើយ ធ្វើឱ្យក្រុមគ្រួសារមានការព្រួយបារម្ភ ហើយក៍តាមរកគ្រប់ទីកកន្លែង នៅតែមិនឃើញ ។ ស្រាប់តែព្រឹកឡើងថ្ងៃទី៤ ខែធ្នូ ក៏បានប្រទះឃើញសពនាងអណ្តែតទឹកនៅចំណុចផ្លូវថ្មី និងបានឃើញកាណូតបាឡាស្មាច់ដែលនាងជិះនៅមិនឆ្ងាយពីសពយុវតីរងគ្រោះប៉ុន្មាន ។ ប៉ុន្តែកាណូតបាឡាស្មាច់ សល់តែសំបកកាណូតបាឡា ចំណែកម៉ាស៊ីន បានបាត់មិនដឹងទៅណា។
នៅព្រឹកថ្ងៃដដែលនោះដែរ សមត្ថកិច្ចនគរបាល ស្រុក ខេត្ត បានទៅពិនិត្យធ្វើកោសល្យវិច័យ ហើយបានសន្និដ្ឋានបឋមថា យុវតីរងគ្រោះអាចជួបគ្រោះថ្នាក់ចរាចរណ៍ផ្លូវទឹក ប៉ុន្តែភាគីម្ខាងទៀតបានគេចបាត់ ។ ទោះបីជាយ៉ាងនេះក្តី សមត្ថកិច្ចបានបញ្ជាក់ថា៖ នេះគ្រាន់តែការសន្និដ្ឋានបឋមតែប៉ុណ្ណោះ នឹងបន្តស្រាវជ្រាវបន្ថែមទៀត ជុំវិញករណីយុវតីរងគ្រោះបាត់ខ្លួនមួយយប់ ស្រាប់តែប្រទះឃើញសពអណ្តែតទឹកបែបនេះ ៕រក្សាសិទ្ធិដោយ៖បញ្ញាស័ក្តិ
