ភ្នំពេញ៖ ឃួង ស្រេង អភិបាលរាជធានីភ្នំពេញបានផ្តល់ម៉ាសចំនួន៤០០០០ម៉ាសនិងឧបករណ៍បំពងសំឡេងចំនួន៤០គ្រឿង ដល់ស្នងការដ្ឋាននគរបាលរាជធានីភ្នំពេញហើយនៅរសៀលថ្ងៃអាទិត្យទី៦ខែធ្នូ នេះលោកអភិបាលរាជធានីក៏បានចុះត្រួតពិនិត្យគ្រប់គោលដៅនៃស្តុបនីមួយ ខណៈកងកម្លាំងទាំងអស់កំពុងពង្រាយក្នុងចែកម៉ាសជូនអ្នកដំណើរនិងបំពងសំឡេងតាមឧគ្ឃោសនស័ព្ទ ដើម្បីឲ្យបងប្អូនប្រជាពលរដ្ឋចូលរួមទប់ស្កាត់ការរីករាលដាលនៃជំងឺកូវីដ-១៩ទាំងអស់គ្នា។
លោកឧត្តមសេនីយ៍ទោ ចេវ ហាក់ ស្នងការរងរាជធានីបានបញ្ជាក់ឲ្យដឹងថា លោកឃួង ស្រេង អភិបាលរាជធានីភ្នំពេញបានផ្តល់ម៉ាសចំនួន៤០០០០ម៉ាស មីក្រូសម្រាប់បំពងសំឡេងចំនួន៤០គ្រឿងមកស្នងការនគរបាលរាជធានីភ្នំពេញ ហើយលោកបានបន្តចែកទៅកម្លាំងមានសមត្ថកិច្ចចំនួន២២គោលដៅនៅតាមស្តុប ដើម្បីឲ្យកងកម្លាំងមានសមត្ថកិច្ច ពិសេសប៉ូលិសចរាចរណ៍ធ្វើការចែកបន្តទៅប្រជាពលរដ្ឋជាអ្នកដំណើរដែលមិនពាក់ម៉ាស។ ចំណែកមីក្រូបំពងសំឡេង ក៏បានផ្ញើសារទៅប្រជាពលរដ្ឋព្រមគ្នាផងដែរ ដើម្បីឲ្យបងប្អូនប្រជាពលរដ្ឋចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ទាំងអស់គ្នា ខណៈដែលជំងឺនេះកំពុងរីករាលដាលចូលដល់សហគមន៍ហើយនោះ។
ចំពោះគោលដៅសំខាន់ៗទាំង ២២ មានដូចជា គោលដៅ ១ – ស្តុប BKC ២- ស្តុប ពេទ្យចិន៣- ស្តប បូកគោ ៤- ស្តុបច្រមុះជ្រូកក្បាលថ្នល់៥- ស្តុបអង្គឌួង ៦- ស្តុបក្រសួងអប់រំ ៧- ស្តុបជលផល៨- ស្តុប ក្តាន់ពីរ ៩- ស្តុប អាងទឹក ១០ – ស្តុបចេនឡា ១១- ស្តុបទួលសង្កែ ១២- ស្តុប កាំកូ ១៣- ស្ពានអាកាស៧មករា ១៤- ស្តុប ២០០៤កែងទ្រុងមាន់១៥- ស្តុប២០០៤ កែង ២៧១ ,១៦- ស្តុប ២៧១ កែង ៣៧១, ១៧- ស្តុបស្ពានដែក ។
គោលដៅក្នុងខណ្ឌចំនួន៥ រួមមាន៖១- ខណ្ឌទួលគោក ស្តុបផ្សារដើមគរ ២- ខណ្ឌ៧មករា ស្តុបនាងគង្ហីង ៣- ខណ្ឌដូនពេញ ស្តុបនាគបាញ់ទឹក៤- ខណ្ឌចំការមន ស្តុបបឹងត្របែក ៥- ខណ្ឌបឹងកេងកង ស្តុបវត្តមហាមន្ត្រី ។
ចំពោះខ្លឹមសារតាមឧគ្ឃោសនស័ព្ទគឺសូមពុក ម៉ែ អ៊ំ ពូ មីង និងអ្នកប្រើប្រាស់ផ្លូវ ទាំងអស់ឲ្យបានជ្រាបថា៖ ដើម្បីចូលរួមទប់ស្កាត់ការរីករាលដាល ជំងឺកូវីដ-១៩ សូមមេត្តាអនុវត្តន៍នូវវិធានការរបស់ក្រសួងសុខាភិបាល ឲ្យបានខ្ជាប់ខ្លួន ដូចជា៖ ពាក់ម៉ាសជាប្រចាំទោះទៅទីកន្លែងណាក៏ដោយ លាងសម្អាតដៃ និងសាប៊ូ ឬអាល់កុលជាប្រចាំ រក្សាគម្លាតពីគ្នាឲ្យបានឆ្ងាយ មិនទៅទីកន្លែងដែលការប្រមូលផ្ដុំ ។
សង្ឃឹមថា ពុក ម៉ែ អ៊ំ ពូ មីង និងអ្នកប្រើប្រាស់ផ្លូវទាំងអស់ និងចូលរួមនូវវិធានការទាំងនេះ ដើម្បីសុខភាពយើងទាំងអស់គ្នានិងសូមធ្វើដំណើរដោយសុវត្ថិភាព ។
គួរបញ្ជាក់ថា៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសម្រាប់ដំណាក់កាលកូវីដ-១៩នេះ សម្តេចបានផ្តល់ម៉ាស មករដ្ឋបាលរាជធានីភ្នំពេញចំនួន៣លានម៉ាសដើម្បីចែកជូនប្រជាពលរដ្ឋនៅសហគមន៍ក្រីក្រដែលមិនមានលទ្ធភាពទិញម៉ាសយកមកប្រើប្រាស់ ចែកអ្នកដំណើរតាមដងផ្លូវ។បន្ថែមពីលើនេះទៀតកាលពីថ្ងៃទី ៣០ ខែវិច្ឆិកា ឆ្នាំ២០២០ ក្នុងពិធីបើកការដ្ឋានសាងសង់ និង កែលម្អផ្លូវទាំង៣៨ខ្សែក្នុងក្រុងសៀមរាប ខេត្តសៀមរាប សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសឧបត្ថម្ភថវិការបស់រាជរដ្ឋាភិបាលជូនបងប្អូនប្រជាពលរដ្ឋ ដែលធ្វើចត្តាឡីស័កទាំងអស់នៅរាជធានីភ្នំពេញ ដោយក្នុង១ គ្រួសារទទួលបានថវិកាចំនួន ៣០ម៉ឺនរៀល សម្រាប់រយៈពេល១៥ថ្ងៃ មានន័យថា ក្នុង១ថ្ងៃ២ម៉ឺនរៀលថែមទៀត ៕រក្សាសិទ្ធិដោយ៖បញ្ញាស័ក្តិ