និស្សិតបរទេសដែលកំពុងសិក្សានៅឯប្រទេសសិង្ហបុរី បានប្រឈមមុខនឹងប្រតិកម្មយ៉ាងខ្លាំង កាលពីចុងសប្តាហ៍មុននេះ បន្ទាប់ពីរូបថតមួយសន្លឹកដែលនាងបានបង្ហោះនៅលើ Instagram ក្នុងឱកាសចូលឆ្នាំចិន២០២០ ដែលគេចោទប្រកាន់ថាមានលក្ខណៈមិនសមរម្យទាល់តែសោះ។
នៅលើគណនី Instagram របស់ខ្លួនមានឈ្មោះថា @louisepzn និស្សិតស្រីជនជាតិបារាំងរូបនេះ អាចត្រូវបានគេមើលឃើញថា ស្លៀកសម្លៀកបំពាក់ប្រពៃណីចិន ដែលត្រូវបានគេស្គាល់ថាជា qipao ខណៈដែលធ្វើកាយវិការមានន័យថាប្រមាថប្រជាជនអាស៊ី។
យ៉ាងណាមិញ ក្រោយពីបានឃើញបែបនេះ នារីម្នាក់ដែលមានគណនីឈ្មោះ @ beforeik.o ក៏បានចេញប្រតិកម្មខ្លាំងៗដោយនិយាយបែបនេះថា៖ «យើងសូមស្វាគមន៍អ្នក ចំពោះការមកកាន់ប្រទេសរបស់យើង ប៉ុន្តែប្រសិនបើអ្នកធ្វើដូចអ្នកប្រកាន់ពូជសាសន៍បែបនេះ សូមអ្នកចាកចេញទៅ!»។
កាលពីថ្ងៃសុក្រ (ថ្ងៃទី ៤ ខែធ្នូ) អ្នកប្រើ Instagram @ beforeik.o បានបង្ហោះអំពីរឿងរ៉ាវរបស់ Louise ដែលបានបង្ហាញឲ្យឃើញថានិស្សិតបារាំងរូបនេះ បានប្រើម្រាមដៃទាំងពីរទាញស្បឺតចុងភ្នែករបស់នាងមកក្រោយ ខណៈពេលស្ថិតក្នុងសម្លៀកបំពាក់ប្រពៃណីចិន និងដាក់ Caption ថា “ching chong”។
ក្រោយមក នាង @ beforeik.o ក៏បានចែករំលែករូបថតអេក្រង់ជាច្រើននៃសារផ្ទាល់ ដែលក្នុងនោះ Louise បានអះអាងថា «នាងពិតជាមិនប្រកាន់ពូជសាសន៍ទេ ហើយរូបថតនោះ គឺគ្រាន់តែដើម្បីភាពសប្បាយរីករាយប៉ុណ្ណោះ»។
Louise ក៏បានចង្អុលបង្ហាញការពិតថា ប្រជាជនចិនអាចនឹងទទួលការវះកាត់នៅលើភ្នែករបស់ពួកគេ ដើម្បីឱ្យមានលក្ខណៈពិសេសរបស់អឺរ៉ុបបន្ថែមទៀត ហើយបានសួរថា តើរឿងនោះនឹងត្រូវចាត់ទុកជាការរើសអើងជាតិសាសន៍ដែរ ឬទេ។
Louise បានសរសេរថា «ប្រសិនបើយើងនៅលើពិភពលោកដែលរូបភាព ឬចម្លើយទាំងអស់ ប្រែទៅជាការរើសអើងជាតិសាសន៍ នោះជានឹងលែងមានការរស់នៅទេ»។
តែយ៉ាងណា នាង @ beforeik.o បានឆ្លើយតបថា Louise គួរតែអប់រំខ្លួនឯង ដករូបចេញ ហើយសុំទោស “កុំឲ្យរឿងនេះកាន់តែផ្ទុះខ្លាំងឡើង” ។
តែជាការឆ្លើយបកទៅវិញ នាង Louise ក៏នៅបានសរសេរថា៖ «ប្រសិនបើអ្នកចង់ឃើញការរើសអើងជាតិសាសន៍នៅក្នុងរូបភាពនេះ វាស្ថិតនៅលើចិត្តនិងគំនិតរបស់អ្នកប៉ុណ្ណោះ… ប្រតិកម្មប្រភេទនេះគឺមកពីការឆោតល្ងង់ និងជាមនុស្សមិនចេះស្គាល់គ្នា» ។
ដោយឡែក កាលពីថ្ងៃសៅរ៍ (ថ្ងៃទី ៥ ខែធ្នូ) នៅលើទំព័រ Instagram ផ្លូវការរបស់សាលារបស់នាង Essec Business បានធ្វើការអត្ថាធិប្បាយទៅលើការបង្ហោះលើទំព័រ Instagram របស់ @ beforeik.o ដោយសរសេរថា ពួកគេកំពុង «ពិនិត្យមើលស្ថានភាព ហើយនឹងចាត់វិធានការសមស្រប» ។
ចាប់តាំងពីពេលនោះមក និស្សិតឈ្មោះ Louise បានចេញសេចក្តីសុំទោសនៅលើគណនី Instagram ឯកជនរបស់នាង ហើយសាលា Essec Business ដែលជាកន្លែងដែលនាងសិក្សាបាននិយាយថា ពួកគេកំពុង“ ពិនិត្យមើលស្ថានភាព” ។
កាលពីថ្ងៃអាទិត្យ (ថ្ងៃទី ៦ ខែធ្នូ) នាង Louise បានបង្ហោះរឿងរ៉ាវមួយនៅលើគណនី Instagram របស់នាង ដោយបានសុំទោសចំពោះរូបថតមួយនេះរបស់នាង។
នាងបាននិយាយថា វាមិនមែនជាគោលបំណងរបស់នាងក្នុងការធ្វើឱ្យសហគមន៍អាស៊ីឈឺចាប់នោះទេ ហើយថា «ខ្ញុំដឹងថាអ្វីដែលខ្ញុំបានធ្វើគឺខុសនិងមិនគោរព ខ្ញុំពិតជាមានការសោកស្តាយជាខ្លាំង» ។
នាងបានបន្ថែមទៀតថា៖ «ខ្ញុំសូមទោសដោយស្មោះ ចំពោះអ្នករាល់គ្នាដែលមានអារម្មណ៍ឈឺចាប់ ដោយសារអាកប្បកិរិយារបស់ខ្ញុំ! ខ្ញុំមិនមានចេតនានោះទេ។ ខ្ញុំពិតជាសោកស្តាយដោយស្មោះចំពោះអ្នកទាំងអស់គ្នា…»៕ រក្សាសិទ្ធិដោយ៖ លឹម ហុង