កំពង់ស្ពឺ ៖ ជាងកាត់សក់ម្នាក់បានយកឯកសណ្ឋាននគរបាលជាតិ របស់លោកឧត្ដមសេនីយ៍ត្រី ង៉ាម រី ស្នងការរងទទួលការងារព្រហ្មទណ្ឌ នៃស្នងការដ្ឋាននគរបាលខេត្ដកំពង់ស្ពឺ មកពាក់លេងនិងបានថតបង្ហោះលើគណនីហ្វេសប៊ុកផ្ទាល់ខ្លួន ធ្វើឲ្យមានការយល់ច្រឡំពេញបណ្តាញសង្គម។
ករណីនេះ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានបញ្ជាក់ថា បុគ្គលឈ្មោះ ផាន សុភក្តី បានសារភាពទទួលស្គាល់កំហុស និងបានស្នើសុំការយោគយល់អធ្យាស្រ័យពីសមត្ថកិច្ច ធ្វើការអប់រំណែនាំ និងធ្វើកិច្ចសន្យាបញ្ឈប់សកម្មភាពនេះ ចំណែកលោកឧត្តមសេនីយ៍ត្រី ង៉ាម រី នោះ គណៈស្នងការ នឹងគោរពស្នើសុំមតិចង្អុល ដឹកនាំពីថ្នាក់ដឹកនាំ អគ្គស្នងការដ្ឋាននគរបាលជាតិ។
ក្រុមការងារប្រតិកម្មរហ័ស នៃអគ្គស្នងការដ្ឋាននគរបាលជាតិ ពិនិត្យឃើញមានការផ្សព្វផ្សាយ និងការចែករំលែកបន្តបន្ទាប់ លើបណ្ដាញទំនាក់ទំនងសង្គម ពាក់ព័ន្ធនឹងបុរសម្នាក់ ប្រើប្រាស់ឯកសណ្ឋានមន្ត្រីនគរបាលជាតិ ថ្នាក់ឧត្តមសេនីយ៍ ដោយពុំមានលក្ខណៈគ្រប់គ្រាន់ និងបង្ហោះផ្សព្វផ្សាយជាសាធារណៈ។
នាយកដ្ឋានបុគ្គលិក នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានធ្វើការស្រាវជ្រាវ ដើម្បីស្វែងរកអត្តសញ្ញាណបុរសខាងលើ និងស្វែងរកប្រភពអ្នកផ្គត់ផ្គង់ឯកសណ្ឋាននគរបាលនោះ។
រសៀលថ្ងៃទី ៨ ខែធ្នូ ឆ្នាំ២០២០ ដោយអនុវត្តតាមបទបញ្ជារបស់ថ្នាក់ដឹកនាំនៃនាយកដ្ឋានបុគ្គលិក លោកឧត្តមសេនីយ៍ទោ សម សាមួន ស្នងការនៃស្នងការដ្ឋាននគរបាលខេត្តកំពង់ស្ពឺ បានដឹកនាំកម្លាំងស្រាវជ្រាវកំណត់អត្តសញ្ញាណបុរសខាងលើ និងឈានដល់ការកោះអញ្ជើញ មកធ្វើការសួរនាំនៅស្នងការដ្ឋាននគរបាលខេត្ត។
នៅចំពោះមុខសមត្ថកិច្ច ឈ្មោះ ផាន សុភក្ដី ភេទប្រុស អាយុ ៣៨ឆ្នាំ មានមុខរបរ ជាងកាត់សក់ នៅចំណុច ភូមិពាណិជ្ជកម្ម សង្កាត់រការធំ ក្រុងច្បារមន ខេត្ដកំពង់ស្ពឺ បានឆ្លើយសារភាព និងទទួលស្គាល់ថា ឯកសណ្ឋាននគរបាលជាតិ (អាវនោះ) គឺជាកម្មសិទ្ធិលោកឧត្ដមសេនីយ៍ត្រី ង៉ាម រី ជាស្នងការរងទទួលការងារព្រហ្មទណ្ឌ នៃស្នងការដ្ឋាននគរបាលខេត្ដកំពង់ស្ពឺ ដែលកាលពីថៃ្ងទី៧ ខែធ្នូ ឆ្នាំ២០២០ វេលាម៉ោង ៨និង៣០ នាទីកន្លងទៅ លោឧត្តមសេនីយ៍ត្រី ង៉ាម រី បានបេីករថយន្ដពាក់ផ្លាកលេខនគរបាលមកតូប ដើម្បីកាត់សក់ គាត់បានដោះអាវព្យួរ ខ្ញុំ (ផាន សុភក្តី) ក៏បានសុំពាក់អាវថតរូប ដោយលោក ង៉ាម រី បានឆ្លើយថា ពាក់ៗទៅ ខ្ញុំសួរបន្តថា បេីថតផុសក្នុងហ្វេសប៊ុកបានអត់ គាត់ឆ្លេីយថា ផុសៗទៅ រួចខ្ញុំបានសុំខ្ចី សោរថយន្តដេីម្បីបេីកទ្វារអង្គុយថត គាប់ជួនពេលនោះ មានព្រះសង្ឃនិមន្តបិណ្ឌបាតឆ្លងកាត់ទីនោះ ខ្ញុំបានយកបច្ច័យ ដាក់បាតលោក ដោយគ្រងឯកសណ្ឋាននគរបាលជាតិផងដែរ។ ឈ្មោះ ផាន សុភក្តី បានបញ្ជាក់បន្ថែមថា ចំពោះ សកម្មភាពខាងលើ គឺខ្ញុំមិនបានដឹងថា ជាអំពេីខុសច្បាប់នោះទេ ព្រោះលោកឧត្ដមសេនីយ៍ត្រី ង៉ាម រី គាត់ជានគរបាលជាតិមានឋានៈខ្ពស់ បានយល់ព្រមឱ្យខ្ញុំថតរូបផុសក្នុងហ្វេសប៊ុក ។
លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺបានឲ្យដឹងថា ដោយបុគ្គលឈ្មោះ ផាន សុភក្តី បានសារភាពទទួលស្គាល់កំហុស និងបានស្នើសុំការយោគយល់អធ្យាស្រ័យពីសមត្ថកិច្ច គណៈស្នងការនៃស្នងការដ្ឋាននគរបាលខេត្តកំពង់ស្ពឺ និងដោយមានការយល់ព្រមពីថ្នាក់ដឹកនាំ នៃនាយកដ្ឋានបុគ្គលិក សម្របសម្រួលអនុវត្តត្រឹមកម្រិត ធ្វើការអប់រំណែនាំ និងធ្វើកិច្ចសន្យាបញ្ឈប់សកម្មភាពនេះ។
ដោយឡែកចំពោះលោកឧត្តមសេនីយ៍ត្រី ង៉ាម រី ស្នងការរងនៃស្នងការដ្ឋាននគរបាលខេត្តកំពង់ស្ពឺ គណៈស្នងការ នឹងគោរពស្នើសុំមតិចង្អុល ដឹកនាំពីថ្នាក់ដឹកនាំ អគ្គស្នងការដ្ឋាននគរបាលជាតិ ដើម្បីអនុវត្តបន្ត៕ រក្សាសិទ្ធិដោយ៖បញ្ញាស័ក្តិ
