កណ្តាល៖ គណនីហ្វេសប៊ុកឈ្មោះ Ah Mey Mey បានបង្ហោះផ្សព្វផ្សាយសារថា ស្នងការនគរបាលខេត្តកណ្តាលបានឆាតមកសុំខ្ញុំធ្វើជាស្រីលួចលាក់ ដោយនិយាយចេញមកមិនផ្តល់កិត្តិយសឱ្យខ្ញុំសោះ នេះឬចរិតពិតរបស់ស្នងការខេត្តកណ្តាល។ប៉ុន្តែករណីនេះលោកស្នងការដ្ឋាននគរបាលខេត្តកណ្តាល សូមបដិសេធទាំងស្រុងចំពោះខ្លឹមសារនិងរូបភាពដែលគណនីហ្វេសប៊ុកឈ្មោះ Ah Mey Mey បង្ហោះផ្សព្វផ្សាយ គឺជាព័ត៌មានមិនពិត។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមជម្រាបជូន សាធារណជន និងអ្នកនិយមប្រើប្រាស់បណ្ដាញសង្គមហ្វេសបុកមេត្តាជ្រាបថា គណនីហ្វេសបុកឈ្មោះ Ah Mey Mey បានធ្វើការបង្ហោះផ្សព្វផ្សាយលើគណនីហ្វេសបុករបស់ខ្លួនដែលធ្វើឱ្យប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំ នៃស្នងការដ្ឋាននគរបាលខេត្តកណ្តាល ។
គណនីហ្វេសប៊ុកឈ្មោះ Ah Mey Mey បានបង្ហោះផ្សព្វផ្សាយថា “បងប្អូនមកស្គាល់មុខស្នងការនគរបាលខេត្តកណ្តាល ឈ្មោះឈឿន សុចិត្រ នេះទៅវាបានឆាតមកសុំខ្ញុំធ្វើជាស្រីលួចលាក់របស់វា វានិយាយចេញមកមិន ផ្តល់កិត្តិយសឱ្យខ្ញុំសោះ នេះឬចរិតពិតរបស់ស្នងការខេត្តកណ្តាល ពិតជាថោកណាស់ “។
ស្នងការដ្ឋាននគរបាលខេត្តកណ្តាល សូមធ្វើការបដិសេធទាំងស្រុងចំពោះខ្លឹមសារនិងរូបភាពដែលបានផ្សព្វផ្សាយនេះ ជាព័ត៌មានមិនពិត និងសូមឱ្យម្ចាស់គណនីហ្វេសបុកឈ្មោះ Ah Mey Mey ចូលមកធ្វើការបំភ្លឺ និងបកស្រាយ ព្រមទាំងសហការជាមួយសមត្ថកិច្ច ក្នុងការស្រាវជ្រាវស្វែងរកជនដែលបានបង្កើតគណនីក្លែងក្លាយដោយបានប្រើប្រាស់រូបថត និងឈ្មោះថ្នាក់នាំ នៃស្នងការដ្ឋាននគរបាលខេត្តកណ្តាល យកមកផ្តន្ទាទោសតាមច្បាប់ ។
ជាថ្មីម្តងទៀត ស្នងការដ្ឋាននគរបាលខេត្តកណ្តាល សូមអំពាវនាវដល់សាធារណជនដែលនិយមតាមដានបណ្ដាញសង្គម សូមបញ្ឈប់នូវការចែករំលែករាល់ព័ត៌មានប្រឌិតទាំងនេះ និងចូលរួមសហការជាមួយសមត្ថកិច្ច ក្នុងការស្រាវជ្រាវវែកមុខជនល្មើសមកផ្តន្ទាទោស និងសូមថ្លែងអំណរគុណយ៉ាងជ្រាលជ្រៅបំផុតដល់បងប្អូនដែលបានយល់អំពីទង្វើទុច្ចរិតរបស់ក្រុមជនមួយក្តាប់តូចបាននិងកំពុងប្រើប្រាស់បណ្តាញសង្គមហ្វេសបុកបម្រើឱ្យផលប្រយោជន៍ផ្ទាល់ខ្លួន ដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមផងដែរ ។
ស្នងការដ្ឋាននគរបាលខេត្តកណ្តាល សូមសាធារណជន ដែលនិយមប្រើប្រាស់បណ្តាញសង្គម កុំមានការភ័ន្តច្រឡំ ៕ រក្សាសិទ្ធិដោយ៖បញ្ញាស័ក្តិ