ភ្នំពេញៈ ប្រធានគណៈមេធាវីនៃព្រះរាជាណាចក្រកម្ពុជា លោក លី ច័ន្ទតុលា បានបញ្ជាក់ថា ការបំពេញតួនាទីរបស់លោកស្រី ស៊ឹម សុវណ្ណារិទ្ធ ជាសមាជិកក្រុមប្រឹក្សាខេត្តកំពង់ធំ មិនមានបញ្ហាវិសមិតភាពជាមួយនឹងការប្រកបវិជ្ជាជីវៈមេធាវីទេ។
ការបញ្ជាក់របស់ប្រធានគណៈមេធាវីបានធ្វើឡើងបន្ទាប់ពីប្រធានសាលាដំបូងខេត្តកំពង់ធំ កាលពីថ្ងៃទី២៨ ខែតុលា ឆ្នាំ២០២០បានស្នើសុំការបញ្ជាក់អំពីវិសមិតភាពក្នុងការបំពេញតួនាទីជាសមាជិកក្រុមប្រឹក្សាខេត្ត និងការបំពេញតួនាទីជាមេធាវីការពារសិទ្ធនៅក្នុងសំណុំរឿងព្រហ្មទណ្ឌ។
លោក លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជាបានមានប្រសាសន៍ប្រាប់ CEN នៅល្ងាចថ្ងៃទី៨ ខែធ្នូ ថា គណៈមេធាវីទើបតែទទួលបានលិខិតស្នើសុំការបញ្ជាក់កាលពីថ្ងៃទី៧ ខែធ្នូ ឆ្នាំ២០២០ នឹងកំពុងតែរៀបចំធ្វើការឆ្លើយតបជាសាធារណៈដើម្បីបញ្ជាក់អំពីបញ្ហានេះឲ្យបានច្បាស់។
ប្រធានគណៈមេធាវីបានបញ្ជាក់ថា “ប៉ុន្តែអ្វីដែលអាចប្រាប់បាន គឺបើបកស្រាយទៅតាមអ្វីដែលមានចែងនៅក្នុងច្បាប់ គឺការងារជាសមាជិកក្រុមប្រឹក្សាខេត្ត គឺមិនមានបញ្ហាវិសមិតភាពជាមួយនឹងការប្រកបវិជ្ជាជីវៈមេធាវីទេ។ ដោយសាមាត្រា ៥៣ និងមាត្រា ៥៤ នៃច្បាប់លក្ខន្តិកៈមេធាវី គឺមិនមានចែងពាក់ព័ន្ធជាមួយនិងបញ្ហាហ្នឹងទេ ក្នុងនោះគឺនិយាយពីវិសមិតភាពជាមួយនឹងមុខងារសាធារណៈ ហើយនិងមុខងារជាតំណាងរាស្ត្រ ប៉ុន្តែដល់ពេលក្រុមប្រឹក្សាខេត្តជាមន្ត្រីអាណត្តិ ហើយមិនមែនជាមន្ត្រីមុខងារសាធារណៈទេ ហើយជាគោលការណ៍មិនមានបញ្ហានឹងទេ”។
លោក លាង សួគ៌ ប្រធានសាលាដំបូងខេត្តកំពង់ធំ កាលពីថ្ងៃទី២៨ ខែតុលា ឆ្នាំ២០២០ បានធ្វើលិខិតស្នើសុំប្រធាននគណៈមេធាវី នៃព្រះរាជាណាចក្រកម្ពុជា បញ្ជាក់អំពីវិសមិតភាពក្នុងការរបស់លោកស្រី ស៊ឹម សុវណ្ណារិទ្ធ ជាសមាជិកក្រុមប្រឹក្សាខេត្ត និងការបំពេញតួនាទីជាមេធាវីការពារសិទ្ធនៅក្នុងសំណុំរឿងព្រហ្មទណ្ឌ។
លោក លាង សួគ៌ បានជម្រាបជូនប្រធានគណៈមេធាវីនៃព្រះរាជាណាចក្រកម្ពុជាថា សាលាដំបូងខេត្តកំពង់ធំ បានទទួលជំនុំជម្រះលើសំណុំរឿងព្រហ្មទណ្ឌលេខ ២០៣ ចុះថ្ងៃទី១២ ខែមីនា ឆ្នាំ២០១៣ ដែលមានជនជាប់ចោទ២នាក់ ម្នាក់នៅក្នុងឃុំ ហើយដែលជនជាប់ចោទទាំង២នាក់ នេះ ត្រូវបានចោទប្រកាន់ ថា បានប្រព្រឹត្តបទឧក្រិដ្ឋ (បទឃាតកម្ម) ។ នៅពេលចាប់ផ្តើមពិភាក្សាដេញដោល តំណាងអយ្យការបានស្នើសុំអោយក្រុមប្រឹក្សាជំនុំជម្រះ ធ្វើការពិចារណាអំពីវិសមិភាពក្នុងការបំពេញវិជ្ជាជីវៈជាមេធាវី ការពារសិទ្ធិអោយជនជាប់ចោទ ដោយជនជាប់ចោទខាងលើ មានមេធាវីការពារសិទ្ធិ ឈ្មោះ ស៊ឹម សុវណ្ណារិទ្ធិ អត្តលេខ៤៣៦ ដែលជាមេធាវីកំពុងប្រកបវិជ្ជាជីវៈ ហើយទន្ទឹមគ្នានេះ មេធាវីរូបនេះ ក៏កំពុងកាន់តំណែងជាសមាជិកក្រុមប្រឹក្សាខេត្តកំពង់ធំ លេងរៀងទី១០។ ក្រុមប្រឹក្សាជំនុំជម្រះបានជួបបញ្ហាដូចខាងលើ ពាក់ព័ន្ធនឹងសេចក្តីណែនាំលេខ ០២៧ សណន ចុះថ្ងៃទី៥ ខែសីហា ឆ្នាំ២០២០ របស់ក្រសួងមហាផ្ទៃ ដែលណែនាំអំពីវិសមិតភាព ក្នុងការបំពេញតួនាទីជាមេធាវីការពារសិទ្ធិអោយជនជាប់ចោទ ឬ មេធាវីតំណាងដោយអាណត្តិ នៅក្នុងសំណុំរឿងព្រហ្មទណ្ឌ និងសំណុំរឿងរដ្ឋប្បវេណី។
ប្រធានសាលាដំបូងខេត្តកំពង់ធំ សូមឲ្យប្រធានគណៈមេធាវី មេត្តាពិនិត្យនិងផ្តល់ការបញ្ជាក់អំពីវិសមិភាពក្នុងការបំពេញតួនាទីជាសមាជិកក្រុមប្រឹក្សាខេត្តកំពង់ធំ និង ការបំពេញតួនាទីជាមេធាវីការពារសិទ្ធិ ឬ មេធាវីតំណាងដោយអាណត្តិ នៅក្នុងសំណុំរឿងព្រហ្មទណ្ឌ និង សំណុំរឿងរដ្ឋប្បវេណី ។
គួរបញ្ជាក់ លោកស្រី ស៊ឹម សុវណ្ណារិទ្ធិ ត្រូវជាភរិយារបស់លោក ម៉ៅ ប៊ុនធូ នាយកទីចាត់ការអន្តរវិស័យនៃសាលាខេត្តកំពង់ធំ ដែលកំពុងជាប់ពន្ធនាគារនៅខេត្តសៀមរាប ពាក់ព័ន្ធករណីយកកាំបិតប៉ុនប៉ងចាក់លើលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ ៕ រក្សាសិទ្ធិដោយ ៖ CEN